1022/2022-2023
Aizawl the 23rd June, 2022: Department of School Education buatsaihin kumin 2022 HSLC (High School Leaving Certificate) leh HSSLC (Higher Secondary School Leaving Certificate) exam a topper te hnenah vawiin khan School Education Department Conference Hall-ah Chief Minister's Award hlanna neih a ni a. Chief Minister Pu Zoramthanga chuan HSLC topper mi pahnih te hnenah leh HSSLC topper mi pathum te hnenah Citation leh pawisafai Rs. 50,000 theuh a hlan a ni.

Chief Minister chuan HSLC leh HSSLC tithate hnenah CM Award pek a ni leh thei chu lawmawm a tih thu sawiin, zirlai tam tak zinga a ber nih chu thil ropui tak a nih thu leh, tumruhna nasa tak nen chuan Mizoram chauh nilo India rampum huapah pawh a ber an la nih theih thu a sawi. Chief Minister chuan hmanlai hun leh tunlai hun inkar a hlat hle tawh thu te, khawtlang nunphung inthlauh tawh zia atangin education in kan khawtlang nun a chawisan dan lang chiang hle a ni, a ti a. Lehkhathiamna chuan eizawnna tha - sawrkar emaw private hnuaiah emaw, sumdawnna emaw mahni kutkawih eizawnna a ni emaw, nei thei turin thiamna min pe a. Eizawnna piah lamah mihring hman tlak, ngaihtuah a changkang a thlen theih thu a sawi a. Amaherawhchu, chung zawng zawng chu zu leh ruihhlo laka kan fihlim loh chuan kan hriselna tihchhiata awmin, kan nih tur ang ni theilo dinhmunah kan awm thei thung dawn a ni, a ti a. Zu kaihhnawih natna tam lutuk te, HIV positive tam lutuk avanga khawtlang nun a tihbuai zia sawiin Chief Minister chuan "ruih theithil hi kan phek do a ngai a ni" tiin vawiina zirlai kalkhawmte chu zu leh ruihhlo, zuk leh hmuam laka fihlim tlat turin a chah a ni.

School Education Minister Pu Lalchhandama Ralte pawhin thu sawiin, zirlai hlawhtlinna changte leh an nu leh pate chungah a lawmpuina thu a hrilh a. Covid-19 hrilengin kum hnih chhung kawng hran hranga harsatna a thlen zingah zirna chu a langsar ber zing ami a nih thu a sawi a. Kuminah India state hmun tam taka an theihloh, offline a board exam kalpui theih a ni chu zavai thawhhona that zia lantirtu a nih thu a sawi a. Education huang chhungah infrastructure leh thil dang dang tihhmasawn a tihchangtlun ngai hmabak tam tak a la awm thu sawi bawkin School Education Minister chuan "zirna hi hmun sang kan chantir chuan kalkawng dik kan ram hian kan zawh dawn a ni" a ti a ni.

Chief Minister Award dawngtute chu hengte hi an ni:

HSLC toppers-
(a) Dinsawmkimi, d/o Lalhmachhuana, Hunthar, Aizawl, St. Joseph's HSS
(b) Lalramdina Ralte, s/o Lalthakima, Mission Veng, Aizawl, St. Paul's HSS

HSSLC toppers-
(Arts)
(a) Lalrohlui Ralte, d/o Lalduhawma Ralte, Durtlang Leitan, Synod HSS

(Commerce)
(b) Mercy Laltlansangi, d/o C. Zonunthara, Khatla East, Aizawl, Oikos HSS

(Science)
(c) Simon Lalremsiama Shangpliang, s/o Kyrshanbor Shangpliang, Falkland Veng, Aizawl, St. Paul's HSS

Kumin hian HSLC exam candidate zirlai 17,417 awmin zirlai 12,304 in hlawhtlinna an chang a, HSSLC ah zirlai 11,908 in exam ziakin 9,773 in hlawhtlinna an chang a ni.

Vawiin topper te chawimawina inkhawm tawiah hian School Education Secretary Dr. Lalzirmawia Chhangte chuan kaihruaiin zirlaite chu ram pum huap service ah tam zawk lut kan awm theih nan tun atanga tumna nghet nei turin a chah a. Director Dr. H. Lalthangliana pawhin thu sawiin, he Chief Minister's Award hi kum 2014 atang khan bultanin tum 10 semna a nih thu leh 2014 atanga award hlan a nih tawh thu a sawi a. Addl. Director Pu Lalthanzama chuan lawmthu sawiin hun a khar a ni.