1021/2022-2023
Aizawl, the 23rd June 2022: Vawiin khan Reproductive & Child Health, National Health Mission buatsaihin Intensified Diarrhoea Control Fortnight (IDCF) 2022 hawnna Cultural Center cum Auditorium, Vaivakawn-ah neih a ni a. He hunah hian Health & Family Welfare Minister Dr. R. Lalthangliana chu khuallian a ni a. Tunkum IDCF thupui hi 'Zero Child Death due to Childhood Diarrhoea/ Naupang nunna suattu kawthalo avanga thihna tih tawp' a ni.

Minister Dr. R.Lalthangliana chuan kalkhawm zawng zawngte chibai bukin, Mizoram chhunga naupang kawthalo ten thihna an tawh loh nana hma la tu, vengtin leh khaw tina Health worker leh ASHA te chungah lawmthu a sawi a. Minister chuan India ramah Mizoram chu kum 5 chhung zet IMR nei tlem ber kan ni chu Health & Family Welfare Department-a thawktute tan hona rah a ni a ti a. Hriselna kawnga tan lak lehzual chu kan tih makmawh a ni a, India ram pum huapin naupang thihna 6.4% hi kawthalo vang a ni a, he dinhmun hi kan state dinhmun ni chiahlo mah se, kawthalo hi naupang natna tlanglawn tak, enkawl vat loh erawh chuan thihpui theih natna ni si, a ni a ti a. Kawthalo avanga thihna a thlenloh nan Primary Health Centre a pawimawh em em a, sawrkar pawhin PHC thuam that leh tihchak a ngai pawimawh a ni a ti a. Mizoram chu India ram puma kawthalo avanga naupang thih tlem ber-na state ni tura tan la turin thawktu zawng zawngte a sawm a, kawthalo venna atan thianghlimna uar leh faina lama tan lak leh zual inzirna pawh kalpui tha a tih thu a sawi a.

He hunah hian Kut silfai dan, kawthalo leh enkawl dan zirtirna leh entirna neih a ni a. IDCF National Steering Committee member Dr Pankaj Kumar leh UNICEF Consultant Dr Rakesh Singh leh department officials te an tel a ni.

India ramah kumtin naupang kum 5 hnuai lamah mi singruk velin kawthalo avangin an thih phah thin a. Ministry of Health & Family Welfare, Govt. of India kaihhruaina hnuaiah Intensified Diarrhoea Control Fortnight hi kum 2014 atang khan kumtin ram pumah hman a lo ni thin a, kuminah pawh 23th June - 7th July, 2022 chhung hian IDCF hi hman tur a ni.

IDCF denchhen Mizoram chhungah ORS sachet leh Zink tablet pekchhuah zat chu 550000 leh 584000 a ni a. IDCF denchhen hian ASHA ten an bial theuh ah home visit an nei ang a, naupang kum 5 hnuailam awmna in ah naupang pakhat tan ORS packet khat zel an sem ang a, ORS siamdan leh kawthalo chungchang zirtirna an pe bawk ang a. IDCF chhung hian SDH/CHC/PHC/SC leh Aganwadi Centre ah ORS-Zinc corner siam theuh a ni a.

Kawthalo, naupangah a lo awm hian ni 14 chhung zinc pek tur a ni a, khawthalo a reh pawhin ni 14 thleng pek chhunzawm tur a ni. ORS leh Zinc tablet pek hi naupang kawthalo enkawlna him tak a ni a, an dam hma bik a mi. Chaw pangngai an le tur a ni a, pek uar sauh zawk tur a ni bawk a, nau hnute hne lai pawh hnute pek zel tur a ni. Tui thianghlim in tur a ni a, kut sil fai that a pawimawh em em bawk a ni.

Attachment

  • Loading attachment...