No.6150/2020-2021

Kum 2020 HSLC leh HSSLC result chhuaka zirlai zaah za pass tir thei Mizoram hmun hrang hranga sawrkar enkawl school 21 te lawmpuina programme vawiin khan School Education Directorate Conference Hall-ah neih a ni a. School Education Minister Pu Lalchhandama Ralte chu khuallian a ni.

Kum danga la tih ngai loh school result nei thate chawimawina hun buatsaih a ni chu Education Minister Pu Lalchhandama Ralte chuan lawmawm tiin hei hian kum dang zelah pawh inelna thianghlim a siam a beisei thu a sawi a. HSLC leh HSSLC result a zirlai zaah za pass tir thei sikul te chu an hlawhtlinna chhawm nung zel tur leh engtinnge hma an sawn zel ang tih ngaihtuah turin a chah. Zirtirtu indaihlohna nasa tak karah hripui leng vangin post ruak engemawzat hnawhkhah tura hmalak mek te a sukuk ta rih a, chuvangin, thawktu awm ang ang te theihtawp chhuaha tan lak leh zual a tul thu Minister chuan a sawi a. Thawktute hamthatna ngaihtuahin hmasawn zel dan tur kawng sawrkarin a dap mek tiin Mizoram Sawrkar department lian ber an nih angin inrelbawlna tha zawk nei turin hma lak mek a ni, a ti. Education Minister chuan sawrkar enkawl sikul, hmanrua leh bungrua nei tha zawk, zirtirtu thiam leh tha rualin an enkawl sikulten private school an tluklo fo mai chu pawi a tih thu a sawi a, kum lo la kal zel turah tan la thar turin zirtirtute a fuih a ni.

Education Secretary Pi Esther Lalruatkimi chuan zirlai naupang za ah za pass tir thei school tha Mizoram hmun hrang hranga kan nei chu lawmawm a tih thu a sawi a. School tha tehfung hrang hrang awm mahse tun dinhmunah school tha tehfung kan neih that ber chu result tha hi a ni, a ti.

Vawiina school tha lawmpuina dawngtute chu- Govt JM High School, Serchhip District; EKLAVYA Model Higher Secondary School, Serchhip District; Govt. Rawpuichhip High School, Mamit District; Pukzing RMSA Sec School, Mamit District; Lalhnuni High School, Tuipui D, Lunglei District; Rotlang E RMSA Sec School, Lunglei district; Govt Mizo HS Khawhai, Champhai District; Thangkunga Memorial HS, Tlangpui, Champhai District; Govt. Sialhawk High School, Champhai District; Govt. Bungzung High School, Champhai District; Pawlrang High School, Champhai District; Khawhri High School, Hnahthial; Govt. Hnahthial High School; Govt. Southern High School, Hnahthial District; Govt. Bethel High School, Pang khua, Lawngtlai District; Lungzarhtum RMSA Sec School, Lawngtlai District; Theiri RMSA Sec School, Siaha District; Govt Hrangchhunga High School, Aizawl District; Mutthi High School, Aizawl District; Govt. Awithangpa High School, Thiak, Aizawl District; Govt. Mizo Higher Secondary School, Aizawl District.

School tithate lawmpuina programme Pi Esther Lalruatkimi kaihhruaiah hian School Education Director Pu James Lalrinchhana’n thu a sawi a, Jt.Director Pu Lalhmachhuana’n report a pe a ni.