No.6149/2020-2021

Aizawl, the 16th October 2020: Vawiin khan Sialkal Range Development Council (SRDC) hnuaia Council meeting chu Pu L. Thangmawia, MLA, Chairman SRDC kaihhruainain SRDC Cell office, Venghlui, Aizawlah neih a ni a. Champhai North bialtu MLA leh Health & Family Welfare Board Vice Chairman Dr. ZR Thiamsanga pawh a tel a ni.

He Council Meeting-ah hian thu hrang hrang rel a ni a, SRDC Manual ennawnna leh siamthat chungchang te, Council huamchhunga School hrang hrang a zirtirtu indaihlohna chungchang te ngaihtuah a niin, Council pawisa atangin heng zirtirtu indaihlohna khua ah hian zirtirtu rawih nise tih rel a ni.

Zirlai lehkha thiam thei, khawsak harsate tanpuina pek dan tur changchangte rel a ni a, kum danga lo tih tawh thin danin, heng zirlai harsate hi tanpuina pek leh ngei ni se tiin rel a ni.

Heng bakah hian, SRDC huamchhunga cheng mipuite hriselna lam, a bik takin tunlai Covid-19 hrileng mek lak a mipui kan him leh zual theihna tura hmalak dan te pawh rel tel a ni. Hmalak nghalna chikhat atan fumigator (Covid-19 hrik kahfaina khawl) leh a tui, disinfectant khaw tinah pek teuh an ni. Heng bakah hian, computer full set pakhat theuh Council area chhunga khaw tin tan pek nghal a ni.

SRDC hian tun dinhmunah khaw paruk (6) huam mekin, Headquarters hi Mimbung a ni a, Cell Office Aizawl Venghluiah a nei a ni. Council memberte zingah hian a huamchhunga MLA pahnih (2), 21-Lengteng (ST) A/C leh 23-Champhai North (ST) A/C te an tel a. 21-Lengteng (ST) A/C apiang chu SRDC Chairman a ni a, heng bakah hiang a huamchhung khawtin VCP te chu member an ni bawk a, SDO (Civil), Ngopa apiang chu Member Secretary an ni.

Vawiin SRDC Council meeting hi Village Council Election-2020 neih a nih hnua a vawi 1-na a ni a, member leh sawm bikte an kalkim thei vek a ni. Council term hi kum 2 a ni a, Vice chairman atan hian Mimbung VCP Pu Thanghuliana chu lakluh nghal a ni bawk.