No.6148/2020-2021

Aizawl, the 16th October 2020: Tukin khan zan 3 riaka Chalfilh bialchhung fang mek Speaker Pu Lalrinliana Sailo, bialtu MLA ni bawk chuan Suangpui lawnah Primary Health Centre(PHC) sak that hna bul tan nan lungphum a phum.

Speaker Pu Lalrinliana Sailo chuan Suangpuilawn leh a chhehvel khua ten tangkai taka an hman mek Damdawi in(PHC) chu a theih anga ranga sak a nih tur thu a sawi a. He Damdawi In hi pantu an tam avangin a thawktu ang zawng tih phuisui dan pawh a tul angin ngaihtuah a ni ang a ti. Speaker Pu Lalrinliana Sailo chuan mipui hriselna chu sawrkarin a dah pawimawh ber tih a sawi a. Tun Covid 19 hrileng karah pawh Mizoram chhungah chuan Covid 19 avang thi sawitur an awm lova a lawmawm hle a. Hei hi Chief Minister kaihruaina leh Health Minister thawhrimna te, a thawktu Doctor leh Nurse te inpekna leh mipui thuawihna rah a ni a ti.

Suangpuilawn PHC hi hun rei taka tang tawh khan Dispensary a bul tan a ni a.Kum 2000 khan PHC ah hlan kai a ni a.Hemi hma hian SHC tia sawi thin a ni .Tuna Building hi kum 1998 ah luah tan a ni a. A Building hi a upat tawh avang leh a chhiat tawh avangin tunah hian sak that turin hna thawh tan leh mek a ni. Damdawi In sak that rual hian Staff Quarters te pawh sak that nghal a ni dawn a ni.