No.6147/2020-2021

Dated Khawzawl, the 16th October, 2020: Vawiin chawhma dar 11 khan Pu Zothanmawia, Deputy Commissioner, Khawzawl District chuan DC Conference Hall, Darngawn Vengah tunhnaia Khawzawl District-in hmasawnna a neih zinga thenkhat E-District, DC Khawzawl Website leh Video Conference Room-te a hawng.

Pu Zothanmawia chuan DC Khawzawl Website, E-District leh Video Conference Room-te hman theiha peihfel a ni ta chu lawmawm a tih thu sawiin, District thar tan chuan hmasawnna rahbi pawimawh tak a ni, a ti a. Puitlin anih theihna kawnga taima leh thahnemngai taka thawktu DC Office-a thawk Officer leh Staff-te chungah lawmthu sawiin, Website leh E-district-te chu bultan mai duhtawk lova ngun taka vil zui reng a pawimawh thu a sawi a. Khawzawl District-a sawrkar hnathawk leh mipuiten tangkai taka an hman theih tura duhsakna hlan chungin a hawng a ni.

He hun kaihruaitu Pu Lalrohlua, Additional DC chuan DC Khawzawl Website hman theih tura hmalakna leh a tangkainate Powerpoint Presentation hmangin a sawifiah a. Pu H. Lalramenga, SDC leh Pu F. Hmingsangzuala, DA ten E-District kalphung leh a tangkainate an sawifiah bawk a ni.

Khawzawl DC Website hi Additional DC kaihhruaina hnuaiah Website Management Team-in a enkawla, a bultan nan District Administration kaihhnawih Central leh State sawrkarin Dan (Acts and Rules) a siam pawimawh 40 dah luh tawh niin, news item chi hrang hrang 42 bakah DC Office-a lehkha pawimawh zual 160 dah luh tawh a ni. Certificate hrang hrang dilna form-te pawh download theiha dah niin, Khawzawla Department hrang hrang 28 te chinchang kimchang dah luh kim a ni tawh bawk.

E-District Khawzawl project hi October Ni 12, 2020 atangin hman tan a ni a. Khawzawl District chhunga Common Service Centre pasarih (7) atanga certificate hrang hrang- Tribal, Residential, Income leh a dang dilna lut 191 te pawm a ni tawh a ni. Hemi kaltlang hian thingtlang miten hla tak tak atanga DC Office pan ngai lovin an kawtkai atangin Certificate hrang hrang an dilin an hmu thei tawh a ni.

Khawzawl DC office-ah hian Video Conference Room pawh peihfel tawh niin, Central leh State sawrkar buatsaih Online meeting pawimawhte chu thuthmun atangin a zawm ve theih zel tawh dawn bawk a ni.

Hawnna programme-ah hian Khawzawla Head of Office-te, khawtlang hruaitute leh MJA member-te an tel a ni.