Vawiin chawhma khan Women's Polytechnic, Durtlang chuan an College Auditorium-ah  Freshers' Social Cum Annual Magazine Release-na hun an hmang a. He hun hi Dr R. Lalthangliana, Higher & Technical Education chuan Khuallian niin a hmanpui a ni.

Women's Polytechnic, Durtlanga zirlai lut thar te puala programme buatsaih-ah hian zirlaite hlawhtlinna atan zirtirtute leh zirlaite chauh ni lovin nu leh pa te an pawimawh tel tih, H&TE Minister Dr R. Lalthangliana chuan a sawi a. Tunlai khawvelah  a bika thiam thil zirna a pawimawh chho telh telha, thiambik nei lo chu tu tan mah chhawr an itawm tawh lo  a ni a ti. Heng Women Polytechnic a Diploma Course te hi Mizo hmeichhia te tan hmasawnna leh an dinhmun chawikanna kawnga puitu thatak a nih a rin thu a sawi a. Ram pawn chu sawi loh State chhungah pawh vun leh hmai tihhnum leh chei bakah Thawmhnaw siam leh chei kawngah te eizawnna tling a awm  a ni a ti a. He college a tlawh chhan zinga pakhat chu  SEDP hnuaia Entrepreneur Development Scheme  nen Polytechnic a Diploma Course te hi  kaihkawp a rem chang em tih en thli-thlai te a remchan pah bawk vang a ni a ti. Mizoram a ni emaw hmundangah thleng pawh, a bei tak tak leh thiam thil nei bik nei tan hna hmuh loh a hlauhawm lova. "Tun kum zabi 21-naah chuan A bika thiam thil a nei em tih hian kan hmaa hun tha leh remchang, chona lian tak  leh inelna anga engkim hlawhchhuahna hunah hian kawngro a su em em a ni", a ti a. Hlawhtlinna atan thuruk a awmloh thu sawiin a kawng awm chhun chu mahnia hun insiam thiam, taihmak, tih tak takna leh tumruhna te a ni a ti.

Women's Polytechnic Freshers' Social-ah hian he college Annual Magazine, 'Thadang' chu Dr. R. Lalthangliana, H&TE Minister chuan a tlangzarh a. Report, zirlai lam atang leh College Principal Dr. H. Lalchhuanvela hnen atangin ngaihthlak a ni bawk a ni.

Women's Polytechnic hi kum 1998 khan din a ni a, tun thlengin zirlai 800 an zirchhuak tawh a. Hmun hrang hrangah eizawnna pangai tak tak leh hna nghet thawkin an zirlai kalchhuak ta te hi an awm tawh a ni. Kuminah zirlai 219 an nei a, zirtirtu 29 an nei bawk a ni. Women's Polytechnic-ah hian  kum 3 chhunga zir tur Diploma pali - Modern Office practice, Electronics & Telecommunication Engineering leh Garment Technology(Thawmhnaw lam siam leh chei zirna) bakah Diploma in Beauty Culture & Cosmetology a zir theih bawk a. Womens' Polytechnic-ah hian Hmeichhia pawl 10 pass chin ten admission an dil thei a; Modern Office Practice zir tur bik erawh chuan pawl 12 pass a ngai thung a ni.

Women's Polytechnic  chuan Student placement chungchangah Cell hran an nei a. He cell hian zirlai kalchhuak tawhte leh zir mek te tan hna zawn sak kawngah hma an la a ni. He thil hi  kum 2005  tan tawh a ni a. India khawpui hrang hrang, a five star hotel, garment export factories, motor part factories, Cruise Lawnglian-ah te leh mizoram sorkar pisa hrang hrang ah hna hmuh sak tawh  an ni a.Tin, mi dang hnuaia hnathawk an awm  bakah, mahni kukea dinga eizawng, pass chhuak tam tak chu an ni bawk a ni.