Vawiin khan Mizoram State Cooperative Union (MSCU) chuan Board of Directors (BoD) meeting, Registrar of Cooperative Societies Conference Hall-ah a nei.

He meeting hi Pu K.Lalchamreia, President, MSCU-in a kaihruai a. MSCU hmalak mekte thlirhona an neih bakah a hmachhawpte hetiang hian sawihoa rel a ni :-
1. Training & Education : Mizoram-ah hian Cooperative Society 1500 vel bawr a awm a, heng Cooperative Society te hi chi hrang hrang niin eibar zawn nana hmang mek tam tak an awm a. Cooperative kaltlanga thlai leh thil dang tam zawk tharchhuah a nih theih nan Society member-te hi thlan bik neiin thla khatah training hi tum hnih pek thin an ni. Society ten an mamawh dana zir zelin Development Department dang atang pawhin mithiam Resource Person-te pawh sawm thin an ni bawk.

Aizawl hmuna training mai bakah District hrang hranga Primary Cooperative Society te hi anmahni hmunah kal chilhin training hi pek thin a ni bawk.

2. One Month Certificate Course Training : Siaha leh Lawngtlai District chhunga Inspector te tan MSCU chuan August, 2019 chhung hian One Month Certificate Course training a pe mek.

3. District Level Seminar : Kum 2019-2020 chhung hian MSCU chuan Mizorama District awm zawng zawngte hnenah Seminar buatsaihin hma a la mek bawk a, ruahman ang chuan September 19, 2019 hian Seminar hi Champhai District tan Champai-ah neih leh tum a ni.

Tun dinhmunah Mizoram district 8-a MSCU hnuaia Cooperative Societies awm zat chu : Aizawl East-297, Aizawl West-246, Lunglei-250, Champhai-213, Serchhip-210, Kolasib-91 leh Mamit-68 a ni.