1118//2023-2024

Aizawl the 12th July 2023 : Vawiin khan Higher & Technical Education Minister Dr. R. Lalthangliana chuan Govt. Aizawl College Mualpui Campus-ah RUSA 2.0 hnuaia cheng 1,60,00,000/- senga sak zawh tak Boys’ & Women’s Hostel Extension building a hawng.

Hostel building thar hawnna inkhawm GAC Principal Pu Lalbiakzuala kaihhruaiah Khuallian H&TE Minister Dr. R. Lalthangliana chuan Govt. College zingah kumin B.A. Result Arts Stream-ah Govt. Aizawl College chu pass percentage nei tha ber a nih vangin a lawmpui thu a sawi a. Student Enrolment sang ber pahnihna an nih avang leh Campus tha tak an nei chho mek avangin a lawmpui thu a sawi bawk. NAAC Accreditation-ah Mizoram chu rampumah Higher Education Institutions-ah pakhatna a hauh thei chu a lawmawmin a chhuanawm hle a; AISHE Report (2020-2021) ah khan Mizoram chuan 71% a hmuh laiin kumin July thlaah chuan 83% ah kaisangin rampum NAAC Accreditation-ah titha ber a ni ta a ni a ti. Tun dinhmunah Mizorama College 19-te chuan NAAC hnuaiah ‘valid accreditation’ an nei a, College 4-te chu accreditation validity a tawp hman a ni tih a tarlang a. Tun dinhmunah chuan a zavaiin Mizoramah UGC hnuaiah Recognised College 23 awm mek thei chu a lawmawm em em a, chutih rualin insiamthatna tur leh hmasawnna tur kawng tam tak a la awm a ni a ti. Sorkar laipuiin Zirna tihhmasawn nan ruahhmanna tharte a rawn siam reng a, RUSA 1.0 & RUSA 2.0 hmang zo tawhin tunah hian RUSA 3.0 chu hman theih turin buatsaih leh mek a ni a; amaherawhchu Central University leh College te inkara ‘affiliating system’ hman thin kha tih tawp a nih dawn avangin tuna Mizorama zirna insang neihchhun MZU pawh research tan bik chauh hman thuai a nih hmel avangin Mizoramin ama puala ‘State University’ a neih a ngai dawn a, State University neilote tan chuan RUSA leh higher education atana scheme dangte atangin sum dil/hmuh a theih dawn tawh loh avangin State University din a nih thuai theih nan Mizoram state sorkar pawhin chak takin hma a la ang tih H&TE Minister chuan a sawi.

Vawiina Hostel 2 hawnnaa khualzahawm H&TE Higher Education Director Pi Sangchin Chinzah pawhin zirlaite fuihna thu a sawi a. Dr. Zarzoliana. Addl. State Project Director, RUSA, Mizoram chuan Hostel Extension Technical Report-a a tarlan danin a sak hna hi September 2019 ah tan niin 31st May, 2021 khan zawhfel a ni a. He RCC Building Design-a sak Hostel building pahnihte hi lirnghing thlen thulah pawh him thei ang ber tura duan a ni. Dr. Lalsangzuala Khiangte, Vice-Principal & Chairman, Hostel Committee, GAC chuan lawmthu sawiin hun hnung a khar a ni.