1119/2023-2024

2023 Vawkhniahzawn thla ni 12: Vawiin khan Lawngtlai District Level Standing Committee (DLSC) on 2nd Special Summary Revision of Photo Electoral Roll 2023 chu Deputy District Election Officer Pu Abraham Beirazi Khithie hovin Lawngtlai DC Conference Hall-ah an ṭhu khawm a, Lawngtlai District chhunga polling station ṭhenkhat awmna hmun thlak leh hming thlak chungchang an sawi ho.

Chairman, Pu Abraham Beirazi Khithie chuan polling station part hming thlak emaw, polling station hmun thlak emaw chu Election Commission of India (ECI) thu a nih thu leh chuti ang tura rawtna hun hawn a nih thu sawiin, polling station awmna hmuna Booth Level Officer, political party-te leh tlawmngai pawlte rem tihna leh official-te'n a hmuna an enfiah thlap hnua chuti ang rawtna lo lutte chu DLSC-in thlir ho va, ECI-a thlen chhawn leh tur a nih thu a sawi a. Chuti ang rawtna chhawp chhuahte chu ngun taka ngaihtuah turin member-te chu a chah a ni.

Lawngtlai Election Officer Pu Denny Lalchhuanawma chuan Lawngtlai District chhunga polling station part hming thlak tur leh a hmun sawn tura rawtna awmte tar langin, rawt a nih chhante a sawifiah a. He'ng rawtnate hi official, political party ai awh leh tlawmngai pawl ai awh kal khawmte chuan sawi hovin, rawtna lutte chu ECI-a thlen chhawn turin pawm a ni.

Vawiina Lawngtlai District chhunga polling station awmna hmun (building) sawn rawtna lutte chu 36/68-Parva-I, 37/46-Tuithumhnar, 37/61-Vaṭhuampui leh 38/28-Lungtian-II polling station te a ni a. Polling station pali hming thlak rawtna lut bawkin, 36/29-Serlui tih chu Jamersury tia thlak rawtna te, 36/36-Maniabapsora-I tih chu Mainabapsora-I tia thlak rawtna te, 36/37-Maniabapsora-II tih chu Mainabapsora-II tia thlak rawtna te leh 38/9-Mission Veng tih chu New Vengpui tia thlak rawtna te a ni.