1931/2024-2025

Aizawl, the 5th September, 2024: Women's Polytechnic Aizawl Students' Union (WPASU) buatsaih zirlai tharte lawmna 'Freshers' Social', Women's Polytechnic Aizawl Multipurpose Hall-a hman chu vawiin chawhma dar 10:30 khan Higher & Technical Education Minister Dr. Vanlalthlana chuan khuallian niin a hmanpui.

Dr. Vanlalthlana chuan kum 1998 a din Women's Polytechnic Aizawl (WPA) chu zirna in hlun tak, zirlai thahnem tak leh hlawhtling tak tak lo chher chhuak tawhtu a nih thu sawiin, zirlai thar lawmna hun buatsaih a ni chu lawmawm a tih thu a sawi a. Tuna Diploma Course pali (4) kalpui mekte chu tunlai khawvela pawimawh tak tak vek an nih thu sawiin, tun aia tha zawk tur leh hmasawn zual zel tura tan la chhunzawm turin a fuih a; kum zabi 21-naah kan cheng tawh a, hemi mil hian zirna kan kalpui zel hi a tul chho hle a ni, a ti. Zirlaite chu an course zirte hmanga eizawnna kalpui thiam tura fuihin, Sawrkar hnain min daih vek tawh lo tih hriaa course kalpuite chu mahni intodelha ei hmuh nana hman thiam zel tum turin a chah a. Khawvel hmasawn zel leh hnathawhna tur mil zela inherrem thiam turin a chah a. Marketing leh entrepreneurial rilru put a pawimawh thu sawiin, sumdawnna leh thil zirte suih zawm thiam chu eizawnna tha tak nei tura tul a ni, a ti a. Zirlaite chu tum mumal tak leh ruahmanna felfai tak siam tura chahin, huaisenna, beidawn duh lohna leh tawrh chhelna nena hmalam pan turin a fuih a, an kalzelna turah duhsakna a hlan a ni.

He hunah hian Lalmalsawmtluangi, Vice President, WPASU in inlawmna thu sawiin Saidingpuii, MOP V in hunserh a hmang a. Pu B. Lalhmuakluaia, Principal, Women's Polytechnic Aizawl hnen atangin thusawi ngaihthlak a ni a. Department of Modern Office Practice & Department of Beauty Culture and Cosmetology leh Department of Electronic and Telecommunication Engineering & Department of Garment Technology zirlaite'n inhmelhriattirna hun an hmang a. Program benglut tak tak neih a ni a, Vanlalroluahpuii, Gen. Secretary, WPASU in lawmthu sawiin hun hman a khar a ni.