1930/2024-2025

Dated Hnahthial, the 5th September, 2024:Vawiin khan Hnahthialah Teachers' day pualin "District Level  Observance Function of 63rd Teachers' Day" chu Horeb Lodge Conference Hall ah neih a ni a. Hnahthial District Bawrhsap, Pi Rita Lalnunmawii Pachuau chuan khuallian niin a hmanpui.

He hunah hian khuallian, Pi Rita Lalnunmawii Pachuau chuan zirtirtute ni puala hun hman naah khuallian a sawm a ni chu lawmawm a tih thu sawiin zirtirtute chu thiamna kawnga min chherchhuak tute an nih avangin zirtirtu kal khawm zawng zawngte chungah lawmthu sawi chungin zahna chibai a buk a. Zirtirtute chu ram leh hnam hruaitu ropui tak takte chherchhuaktu, kan theihna te min phochhuah saktu leh kan hma hun keu engtute an nih avangin fak leh chawimawi an phu a ti a. Chumi anih vang tak chuan an mawhphurhna pawimawh zia hre reng tura chahin zirlaite an enkawlna kawngah inthlahdah deuhva a hminga hna thawk mai mai lo turin leh mahni service chungchang ngawt ngaihtuah lova an hna thawh chhan dik tak, naupang zirtir chu urhsun leh rinawm taka thawk turin a chah a. Tunlai thiamna thang zel mila in siamrem thiam tura fuihin an zirlaite tan intuai thar zel a pawimawh thu a sawi bawk. 

Bawrhsap chuan Hnahthial chu zirna lama an tlahniam chu thil ngaihmawhawm tak anih thu sawiin zirtirtute chu tan la lehzuala, zirna uar thar leh turin leh zirlai taima, tuarchhel leh tumruh tak chherchhuak ngei thei tura theitawp chhuah turin a duh thu a sawi a ni. 

He hunah hian District Education Officer, Pu Micky R Lalenkawla chuan thu sawiin zirtirna chu skill ropui tak a nih thu a sawi a. Zirtirtute chu hlum ber siam tu ang an nih thu sawiin zirtirtu tha chuan zirlai tha tak a siam chhuak thin a ni a ti a. Academic line lampang ringawt a kal lovin skill development uar thar a tul thu sawiin zirlaite chu an zir chhuah hunah hna thawh hreh nei lo mai ni lova, hna engpawh thawk thiam thei tura chher chhuah a pawimawh thu a sawi a. Zirtirtute chu counsellor pawimawh tak an nih thu sawiin an zirlaite hnenah sulhnu hlu tak hnutchhiah ngei tura a duh thu a sawi a ni.

He hunah hian zirtirtu pensioners te chawimawina thlipek hlanna hun hman a ni a. TB awareness campaign hnuaia inter middle school essay and poster painting competition lawmman te chu sem niin consolation prize mi 10 hnenah pek niin he prize hian pawisa fai cheng 1000 a keng tel a. Pakhatna hi C. Lalhriatsaki (MM English School) niin citation leh cheng 10,000 a dawng a. Pahnihna hi Laltholehi ( Presbyterian English school) niin citation leh cheng 8000 a dawng a.

Pathumna hi Esther Lalremruati (St. Stephen's school) niin citation leh pawisa fai cheng 5000 a dawng a ni.

He hunah hian zirtirtute hnenah lawmman pekna hun hman niin Pu C. Lalzarliana, Dy. DPC, Samagra shiksha chuan he lawmna kharna hun a hmang a ni.