1929/2024-2025

Siaha the 5th September, 2024: Zirtirtute Ni (Teachers Day) vawi 63-na lawmna chu vawiin chawhnu Dar 1:30 khan MYA Multipurpose Hall, New Siaha-ah District Level Working Committee buatsaihin hman a ni a, Addl DC Pu Abraham Beirazi Khithie chuan Khuallian niin he hun hi a hmanpui.

Khuallian chuan zirtirtu kalkhawmte chu zahna chibai bukin an puala hun buatsaih chu hlim taka hmang theuh turin duhsakna a hlan. Zirtirtute chu Teachers’ Day-ah chauh niloin engtiklai pawha chawimawi phu an ni, a ti a, zirlai naupangte tana an pawimawhna hre thar turin leh an innghahna pawimawh tak an nih thu hre reng turin a chah. ‘A inzir tawp Ni chu zirtirtu a nih tawp Ni a ni’ (A teacher ceases to be a teacher when he/she ceases to learn) tiin Pu Abraham Beirazi Khithie chuan thiamna/ hriatna tak tak nen an zirtir chhawn theih nan an subject-te uluk taka ennawn fo tur te, ram leh khawtlang tana mihring puitling chherchhuaktu an nih theih nan in tuai thar fo turin leh tunlai khawvel changkang tawh tak, technology khawvelah naupangte zirtir thei turin in tat hriam fo turin a chah bawk. ‘Zirtirtu hna chu hna ropui chungchuang a ni’ (Teaching is a noble profession) ti bawkin profession đang nen a in ang lova, “kohhran leh khawtlangin beiseina nena an thlir, tu leh fate enkawl a, an bulah hun tam zawk ngaihngam taka kan dah ngamna an ni” a ti a, an mawhphurhna sang tak hlen chhuak thei tura theihtawp chhuah theuh turin leh an goal pui ber tur- naupangte kawng dik kawhhmuh a, nun kawng dik zirtirtu ni theuh turin leh ram siam that nana an chanpual pawimawh tak hre thar leh theuh turin kalkhawmte a sawm a ni.

Sr Education Officer (M/S) MADC Pu K Beingiachhie pawhin he hunah hian thu sawiin zirtirtute chu naupangte hawiher leh nun dan thlenga thlak danglam vek thei tu an ni a ti a, ‘next generation students’ tha chhuah thei tu an ni tiin an zirtirna kawngah theihtawp chhuah turin a sawm bawk.

Vawiina Teachers’ Day vawi 63 lawmnaah hian National, State leh District Teachers’ Award lo dawng tawhte chawimawina hun hman a ni a, National Teachers’ Awardee Pu S Zaluaia hnen atangin short speech ngaihthlak a ni bawk. Teachers Awardee-te hnenah hian Pi Jenny Thanhlupuii,Head Assistant, DEO chuan thilpek hlanna a nei a ni.

Pu S Lianzuala, Govt Middle School Headmaster, New Siaha chu District Teacher Award 2024 lawmman dawngtu atana thlan a ni a, he lawmman hian momento leh citation bakah pawisa fai cheng 5,000/- keng telin award dawngtu hnen atang hian thusawi tawi ngaihthlak a ni bawk.

Pu T Chatlua, Addl DPC, Samagra Shiksha, Siaha District chuan vawiin hun hi kaihruaiin Rev Chhuakhu Khithie, Executive Secretary, I/c Education ECM Assembly chuan hunserh a hmang. MSO Gen Hqrts President Pu Elson Eliasah Notlia hnen atangin thusawi tawi ngaihthlak a ni bawk a, Sr Education Officer (P/S) MADC Pu TT Kholaw chuan vote of thanks sawiin hun hi tih tawp a ni.

Kum 1962 atang khan India ram Vice President hmasa ber Dr Sarvepalli Radhakrishnan pianni pualin kumtin Teachers’ Day hi September ni 5 ah hman thin niin kumin Teachers’ Day theme chu “Empowering Educators for a Sustainable Future” tih a ni.

Vawiin Teachers’ Day lawmna-ah hian Mizoram sawrkar leh MADC a Department sawm bikte leh Teachers Awardee-te bakah Siaha khaw chhunga zirtirtute an tel a ni.