Nimin khan Higher & Technical Education Minister leh Bialtu MLA ni bawk Pu R.Romawia chuan Govt. Zirtiri Residential Science College Campus, Durtlang-a DoNER leh RUSA bultuma Boys’ Hostel, Girls’ Hostel leh Laboratory Building thar a hawng.

Hawnna inkhawm Govt. Zirtiri Residential Science College (GZRSC) Principal Pu Laltanpuia kaihhruaiah Khuallian Pu R.Romawia chuan sorkarin zirna lam a ngaih pawimawh avangin Mizoram chhunga zirna in hrang hrangte tan Campus leh building changtlung tak an neih theihna tur a ngaihtuah reng a ni, a ti. H&TE Minister chuan GZRSC Campus thar-ah pawh sports leh zirlaite tana tangkai tur thildangte leng vek thei tura cheichho chakawm viau mahse a hmunin a zir loh avangin college building pawh a chho zawnga sak belh (vertical extension) tiha, chhawng 7 vela sak leh lift dah a awlsam zawk a rin thu a sawi bawk. Sorkar laipui chuan rampuma zirna sang zawkte tihhmasawn nan Rashtriya Uchchatar Shiksha Abhiyan (RUSA) a din zarah Mizoramah pawh College hrang hrangte tihchangtlun chho a, building tha bakah zirna tha zawk leh discipline tha zawk kan nei chho thei ta hi a lawmawm takzet a ni, a ti. Mizorama zirna sangin harsatna a tawh ber chu zirtirtu indaih lohna hi a ni ber a, vanneihthlak takin tunah hian College zirtirtu post 72 Cabinet ngaihtuah turin thehluh a ni tawh tih a sawi a. Mizo thalaiten B.A./M.A. zira sorkar hnaa luh ringawt tum tawh lovin, mahni kea dinga intodelh an tum ta hi a lawmawm hle a ni tiin Minister chuan GZRSC zirlaite pawh an zirna leh hmalam hun atan a duhsakna sang ber a hlan a ni.

He huna tel ve Dr.R.Lalengmawia, Co-ordinator, RUSA pawhin thusawiin RUSA Phase-I hnuaiah Mizoram College hrang hrangte tihhmasawn nana sum hmuh zat zawng zawng chu cheng vaibelchhe 87.6 a ni, a ti a. Mizoram Engineering College sak nan RUSA kaltlangin cheng vaibelchhe 26 dawn a ni a, a sak hna pawh zaa 99% chu thawh zawh tawh a nih thu a tarlang. RUSA chuan rampumah college enrollment hniam tihsanna turin hma a la mek a, Mizoramah chuan zirlai zaa 22% chauh college admission ti an awm a, hei hi rampuma 27% aiin a hniam hret avangin Mizoramah pawh tun aia tam zawk HSS zirlai pass chhuak ten college an luh zel theih nan hmalak a ni a. Chu bakah RUSA chuan a tum ber pakhat chu ‘quality education’ a nih avangin lehkha zirna ngawr ngawr piah lamah skill development, student counselling, student innovative programme leh a tul dangte atan cheng vaibelchhe 5 a pe a, chumi atang chuan college tinah cheng nuai 20 theuh pek a ni, a ti bawk. Tun dinhmunah RUSA Phase-II pawh tan a ni leh tawh a, hetah hian Mizoram-ah RUSA Model College 4 neih phalsak a ni a, heng tichangtlun nan cheng vaibelchhe 16 dah a ni, a ti bawk. 

H&TE Jt. Director (RUSA) Pu R.Lallianzuala pawhin thu sawiin ‘North East Higher Education Summit’ neih a nih tur thu te a tarlang a. Mizorama College 6-ah Post Graduate Course pawh hawn belh tum a nih thu leh Mizoram la awm ngai lo ‘Autonomous College’ din thar tum a ni bawk a, hei hi hun kal zelah University level-ah hial hlankai (upgrade) theih tura beisei a ni, a ti bawk. Mizoramah ‘quality education’ awm thei tur chuan zirna in piah lamah khawtlang leh chhungkuaa pawh zirlaite tan zirna lama an tuina tur leh thahnem an ngaih theihna tura boruak tha siam thiam a pawimawh a ni, a ti. 

Tun dinhmunah hian Mizoramah RUSA hnuaiah College 24 enkawl mek a ni a, RUSA Model College 2 - Govt. Hrangbana College leh Govt. Zirtiri Residential Science College te an awm bawk a. Nimina hawn tak GZRSC Boys & Girls Hostel sak nan cheng nuai 80 ve ve hman a ni a, ground floor leh a chhawng khatna te hi DoNER bultuma sak niin a chhawng hnihna ve ve chu RUSA bultuma sak a ni thung. GZRSC Laboratory Building sak nan RUSA bultumin cheng nuai 140 hman a ni a. Hostel 2 leh Laboratory te sak hna hi Mizoram Technocrats ten an thawk a ni.