No.2630/2020-2020

Vawiin khan Human Resource Development Board Vice-Chairman leh 21-Lengteng Bialtu MLA nibawk Pu L.Thangmawia chuan Higher Secondary School Examination Centre hrang hrang a tlawh kual.

Human Resource Development Board Vice-Chairman Pu L.Thangmawia chuan Covid-19 leng avanga Exam khaihlak, vawiina centre hrang hranga exam chhunzawm a ni leh thei ta chu lawmawm a tih thu a sawi a. Hripui leng kara exam neih chu duhthusam lo anih rualin sorkar, kohhran leh tlawmngai pawl leh zirnaa thawktute thawhhona lanchhuahtirtu a ni ve thung a, theihtawp an chhuahnaah lawmthu kan sawi a ni, a ti a. Pu L.Thangmawia chuan Exam beitu zirlai zawng zawngte chungah duhsakna a hlan a, lockdown boruakin zirna a keng lo viau chungin hlawhtlinna chang vek turin duhsakna ka hlan a ni a ti. Exam chhunzawm anih theihna atana thawktu MBSE te, zirna ina thuneitu leh thawktute, zirlaite hriselna endiktu Health Department leh Local/Village Level Task Force te chungah lawmthu a sawi bawk a ni.

Pu L.Thangmawia hian Govt. Mizo Higher Secondary School, Govt. Chaltlang Higher Secondary School leh St Paul's Higher Secondary School te a tlawh kual a, Exam Centre hrang hrangah hian zirlai exam an kal tha hle a, an centre a exam lo pawh an awmna atanga hnai zawk centre danga exam ta an awm nual tih Centre hotute hian an sawi.

Covid-19 lockdown avanga HSSLC Examination March thla tawp lama zawh fel theih tak loh chu vawiin hian centre hrang hrangah chhunzawm a ni a. Economics leh Chemistry zirlaite an exam a ni. Zirlai examte hi thermal screening hmangin an khua a sik leh sik loh en vek an ni a. Health Department a thawktute bakah LLTF ten zirlaite endik hna hi an thawk a ni.