No.2631/2020-2020

Vawiin chhun khan DC Conference Hall, Kolasibah Dr R Lalthangliana, Health Minister hovin Kolasib District Level Task Force on Covid-19 te, Kolasib district Village Council Association aiawhte leh CMO office leh District Hospital a Medical Officer te leh district chhunga PHC a Medical Officer zawng zawngte nen thutkhawmna neih a ni a, Pu K Lalrinliana, Minister of State for Food, Civil Supplies & Consumer Affairs Department, bialtu MLA ni bawk chuan telpuiin, district chhunga hripui do nana hmalakna thlir letna leh Kolasib district PHC hrang hrang report te ngaihthlak a ni.

Dr R Lalthangliana, Health Minister chuan Covid-19 hri do kawng ah Mizoram hmalakna chu Sawrkar laipui fak a hlawh thu a sawi a, Airport Screening hi India ram a kalpui hmasa ber kan nih thu te, Mizoram a Covid-19 patient hmasa ber pawh ni 45 chhung mizo doctor rual te enkawlna hnuai a dam a nih thu a tarlang a. Covid-19 vei kan neih te chu ram pawn atanga lo haw deuh vek an nih thu leh heng hri vei tam zawk te chu harsatna awm lova enkawl dam zel an nih thu a sawi a, Covid-19 hri do tur a Sawrkar department hrang hrangte leh NGO te thawhhona chu ropui a tih thu a sawi bawk a ni. Minister chuan ram pum anga Covid-19 dona kawngah Kolasib district hmalakna chu a pawimawh zual hle a ni, a ti a, district dang a awm ve lem lo, mihring leh bungrua, ram pawn atanga lo lut buaipui reng ngai te, state pawn atanga tangkhang, rel leh motor hmang a lo haw dawnsawn ngai awm thin te leh ramri a kalkhan tam tak veng a duty thahnem tak indah reng ngai annih avanga an thawhrim zia a hriatpui thu a sawi a, hemi kawng a thawktute inpekna chungah lawmthu sawiin ," Theihtawp chhuah a hma la thintute chuan chunglam malsawmna an dawng thin a ni," a ti a, "In thawhrimna rah chu tunah hian ram pumah hmuh mek zel a ni," a ti bawk. Minister chuan Covid-19 dona kawng a kalphung tha famkim duan a buaithlak thu sawiin WHO leh ICMR te pawhin he hri do nan hian an kalphung duan te pawh an tihdanglam reng thu a sawi a,"Mimal leh department ang pawhin kan tih tur kan tih hmaihnaah te, kan tihsual leh kan hmalakna famkim tawk lohna zawng zawngah in mi ngaihdamna ka dil a ni" a ti.

Minister chuan Mizoram chu Pathianin mal a sawm a, positive kan neihte pawh an negative chho zel a, tunah chuan positive 37 chiah kan nei ta rih a. Thlamuang takin awm i la, kan tih tur chinah erawh thuawih leh strict takin awm ang u. Kan thenawm State Assam-ah pawh nikhat thil thuah a darh huk tih hriain i fimkhur em em zel ang u, a ti a. COVID-19 dona ah Chief Minister a fakawm zia sawiin, a hmalaknain Kolasib ah pawh enkawl hautak lo zawk, Doctor-te pawhin an handle theih mai TrueNAT-Quattro (mini real time - PCR) pawh dah thuai kan tum a, awlsam takin ZMC pan ngai lovin sample kan test zung zung thei ang. Covid hi kan mangtha hnuah pawh natna dang hmuh chhuah nan Kolasib District hian in la chhawr zel dawn a ni, a ti a. Sample test hautak runpui a zo tawh a, Zoram Medical College ah tlaivar deuhthaw a sample test ngai thin kha tunah chuan hahdam takin an test thei ta, sample test ngai, lo thlen belh tur a beisei pawh tam tawh lo tur a ngaih a ni, a ti a, hemi a nih avang hian ramri pawn atanga lo lut, passenger leh bungraw phur lirthei khalhtute pawh RT-PCR test neihpui zel turin Sawrkar chu a inpeih thu a tarlang bawk a ni. Dr R Lalthangliana chuan Covid-19 hri leng avang hian Mizoram a Health sector tihchak leh tihchangtlun mek tum a nih thu sawiin Kolasib district a khum 100 awmna Hospital sak vat chu Sawrkarin a ngaih pawimawh thu leh hemi tih puitlin nan hian hma chak tak a lak a nih thu a sawi bawk a ni. Food, Civil Supplies & Consumer Affairs Minister Pu K Lalrinliana'n Covid-19 inkharkhip kalpui a nih chhung a Mizoram mipuiten ei leh bar a harsatna an tawh loh nana a hmalakna zawng zawngah Health Minister chuan lawmthu a hrilh a, Kolasib district a sawrkar hotute leh Task Force leh mimal leh tlawmngai pawl, hripui do nana hma latute zawng zawng chungah lawmthu a sawi bawk a, hmalakna hrang hrang avanga thlamuang tak a nunphung pangai kan ban chhoh rual mek hian hri lak a kan him zel theihna turin Sawrkarin kalphung a duan te tha tak a zawm turin kalkhawmte a chah bawk a ni.

He hunah hian Kolasib bialtu MLA, Pu K.Lalrinliana, Supply Minister pawhin, "He hripui avanga inkaichhawn theih thila invennaah VC level ang pawhin tan kan lain, kan bei nasa hle a.He hri hi State chhunga awm sate chuan kan kai lova, State pawn atanga lo haw ten an kai a ni ber a. Chuvangin, fimkhur taka awmin kan inthlahdah tur a ni lo. Health Minister leh thawktu zawng zawng chungah lawmthu ka sawi a. Kolasib hi he hripui dona kawngah hian a hah fal, a luhka ber kan ni a. Vairengte leh Bairabi atanga lolut endik leh enkawl hi a hautak hle a, thawktu zawng zawngte chungah lawmthu ka sawi a ni," a ti.

Vawiin thutkhawm hi Dr H Lalthlangliana, Deputy Commissioner in a kaihruai a, Dr C Lalzepuii, Joint Director, DHS, Dr Lalmalsawmi, Joint Director, DHME, Kolasib SP, CMO leh PHC hrang hranga Medical Officer te, Joint NGO Coordination Committee aiawhte, Joint Village Council Association aiawhte leh DLTF member-te an tel a. PHC hrang hrang a Medical Officer te report ngaihthlak niin heng PHC a hman tur hand-sanitizer, glove leh hmanraw dangte hlanna hun a hmang a, District Hospital, Kolasib a tlawh nghal bawk a ni.

He hun hi Bukpui, Lungdai, Vairengte, Bilkhawthlir, Bairabi leh Kawnpui PHC ten an hmanpui bawk a, an bial chhunga damlo dinhmun te, Ambulance mamawh thu te, thawktu indaihlohna te, quarters/ building repair ngai leh sak that ngai leh mamawh hrang hrangte an thlen a ni.