Impulse NGO Network, Shillong kaihhruaia nimin atanga tualchhung chanchinbumite tana mihring hmanga sumdawnna (human trafficking) chungchang zirtirna buatsaih chu vawiin chawhnu khan I&PR Conference Hall-ah Parliamentary Secretary, Home etc. Pu Lalrinmawia Ralte hovin a kharna inkhawm hman a ni.

Pu Lalrinmawia Ralte chuan thu sawiin mihring hmanga sumdawnna hi ruihlo leh ralthuam tawlhruk dawtah chuan khawvela sualna/dan kalha thiltih hluar ber 3-na a ni, a ti a. Khawvela eng hnam pawh, eng khawtlang pawh nise he sualna hian bu khuar lohna a nei lova, hemi lama mipui mimir te zirtirna leh fimkhur tura hrilhhriat tam chungchangah media chu hmarua tangkai tak a ni thei a ni, a ti. Tunlai khawvelin a rawn ken tel internet hmanga sualna chi hrang hrang dodal turin Mizoram sorkar pawhin Police hnuaia Cyber Cop Unit din a tum thu sawilangin Pu Lalrinmawia chuan dan leh thupek aia mihring khalh ngil thei chu mahni inthunun hi a ni fo zawk, a ti bawk. Media te chu khawtlang inkaihhruainaah chungnung leh mipui sukthlek lam tidanglam chak ber an nih avangin an thil ziahah leh lantirah te zalenna thui tak an nei rual rualin mawhphurhna sang tak an nei tel a ni tih hre reng turin a chah.

He ni 2 awh ‘Capacity Building Programme for Journalists on their role in addressing Human Trafficking Issues’ hi Impulse bakah Mizoram state NGO Centre for Peace & Development (CDP); CHAN, The Salvation Army; Vanglaini leh Zalen te tanghova buatsaih a ni.