Vawiin chawhma dar 10 khan Ramhlun Sports Complex-ah Tlangnuam Block chhunga khaw 13 te chuan Sports lama inelna leh thingtlang thalaite atanga sports lam ti thei zawnna hun PYKKA ni 14 - 17 September, 2009 chhung awh tur an hmang a, Pu R. Lalrinawma, MLA, Chairman Law Commission chuan khuallian niin a hmanpui.
Pu Rinawma chuan khaw 13 kalkhawmte hmaah thu sawiin, “Zokhaw lama thalaite zingah infiamna thei tak te thuhrukin an awm thin a, mahse he PYKKA Scheme hmang hian chung mite chu zawnchhuah a, Mizoram mai bakah India ram leh ram pawh thleng pawha Mizote hming chher tur siam tum a ni” a ti.

Infiamna lam tui mi Chief Minister chak tak leh Sports Minister la thalai tak leh thothang tha tak ten ‘Catch Them Young’ policy bawhzuiin, Sports Budget pangngai bakah cheng nuai 500 dang sports lam tih hmasawnnan an ruahman leh ta chu lawmawm tiin, thalaite hmasawnna hrang hrang sorkar-in a buatsaihte hi hlawhtling turin nun uluk turin kalkhawmte a chah bawk a, tun hnai 29.8.2009 ah mai pawh Sports lam tuimi 578 te hnenah Incentive Cash Award hlan a nih thu a tarlang bawk.

Pu Zosangzuali Pachuau, BDO, Tlangnuam Block chuan PYKKA Scheme hmanga a block chhunga Sports neih tur hawnna kaihruaiin, Tlangnuam Block chhung khaw 13 te hetiang intawh khawmna hun tha an nei thei chu lawmawm tiin Sports lam thanna mai bakah inhmelhriatna tha leh Mizoram hmasawnna atana thawhhona tha siamtu a nih ngei a beisei thu a sawi a ni.

PYKKA Scheme hmanga Tlangnuam Block khaw 13 te hi Football, Volleyball, Badminton, Table Tennis leh Athletics lamah an in el dawn a, a pumpui a ti tha ber hnenah Trophy leh Rs. 20,000/-, pahnihna hnenah Rs. 12,000/- leh pathumna hnenah Rs. 4000 leh trophy hlan a nih tur thu BDO Tlangnuam chuan a sawi bawk.