No.3377/2021-2022
Aizawl, the 13th December, 2021: Vawiin khan Serchhip District Disaster Management Authority chu an Chairman Pu Kumar Abhishek, IAS hovin Serchhip DC Meeting Hall-ah an thukhawm a, Krismas leh Kumthar hunpui lo thleng turah Covid-19 hri a darhlohna turin chak taka hmalak an rel.

Chairman Pu Kumar Abhishek chuan tunhnaiah Serchhip District chu hri kai an tamin dinhmun thalo takah kan ding mek a, Mizorama hri kai enkawllai tam lamah District hrang hrang zingah pahnihna kan ni mek, nasa taka tan lak a tul thu a ni, a ti. Krismas leh Kumthar hunpui lo thleng turah mipuiten thlamuang taka hun an hman theih nan hri kai dinhmunin san lam pan zel mahse inkharkhip puan chu thil remchang anih loh avangin CAB zawm thuah khauh takin dan leh thupek kenkawh a pawimawh dawn hle a ti a. Serchhip District chhung ah kar khat chhunga hri kai tam zualna bikte chu uluk lehzuala en thlithlai tur anih thu sawiin, test runpui neih a ngai anih chuan a rang lama hma la turin Health Department a thawktute a ngen a ni.

Covid vanga thihna thlirletin Covid-19 vaccine a dose kim a la tawhte chuan an tawrh dan a nep bik tih chiang takin a hmuh theih a, Vaccine lak chu mitinin kan ngaihpawimawh thar leh a ngai tih a sawi bawk. He thutkhawm a tel NGO aiawhte chu Vaccine lak a pawimawhna nasa lehzual a puanzar kawnga thawho puiah a sawm a ni.

Krismas leh kumthar hunpui lo thleng turah hri a darh loh nan khauh taka dan leh thupek kenkawh a ngai tih sawiin, Police te chu hemi kawnga tan la turin an ngen a, tin vengtina VLTF te pawh hunpui chhung chuan tharthawh leh a, chak zawka hma la thar leh tura ngen nise an ti. CAB tha taka zawm anih theih nan khawlai bakah dawr neitute pawhin an zawm that leh thatloh uluk taka endik thin nise tiin tun hunpui vuakvet-ah hian Executive Duty te pawh duty tir leh nise an ti bawk.

Vawiin a DDMA thutkhawm ah hian puipunna leh khawhar ina zaiho chungchang chu sawilan niin, zai chu hri inkaidarhna awlsam tak anih avangin a theih hram chuan zaiho rihloh nise an ti a, kohhran thenkhat ruai theh tum awm chungchang pawh sawi rik niin, hei pawh hi Health Department thurawn angin theh rih loh nise an ti a ni.

He hunah hian Dr. Christopher L. Hmar, Orthopaedic Surgeon, District Hospital Serchhip chuan COVID-19 hri leng meka Serchhip District dinhmun tarlangin Serchhip District-ah hian COVID-19 hri kai 5609 hmuhchhuah ni tawhin an zinga 5255 te chu enkawl dam an ni tawh a, hei hi hri kai hmuhchhuah atanga chhutin zaa 93.7 a ni a, hri kai enkawl lai 337 awmin an zinga 125 te chu kum 18 hnuai lam an ni a, a bak 212 te chu kum 19 chung lam an ni thung. Hri kai zingah mi 17 an boral tawh a, hri kai hmuh tawh atanga chhutin boral zat hi zaa 0.3 ang a ni. Serchhip District-a hri kai boral tawh zinga mi 13 te hi Vaccine la lo niin midang 4 te hi vaccine la zo tawh te an ni. Serchhip District-a hri kai enkawllai mi 337 zinga 156 te hi Vaccine la la lo an ni.