Aizawl Art Festival 2017 chu vawiin khan Pi Lalnithangi MIS, Director, I & PR chuan Art Novelty, Chaltlang-ah a hawng.

Aizawl Art Festival hi Art & Craft Exhibition-cum-Seminar a ni a. December 16, 2017 thleng awh tur a ni. Hawnna thu sawiin Pi Lalnithangi chuan, Art hi mihring nuna bet tlat, mitin tena kan kawl a ni a. Pathianin thiam thil hreng hrang mitin hnena a dah zingah Paintings leh Crafts te hi thil pawimawh tak a ni, a ti. Thalaite tana nunkawng kaihhruaina petu Painting leh Art te hi sum hmuhna tha tak a ni thei a, artistes ni tur chuan ‘thluak, mit leh kut’ te thiam taka a chet a ngaih avangin a ngaihlutawm hle a ni, a ti. Pi Amawiin huaisen tak leh thahnemngai taka Art Festival a buatsaih chu lawmawm a tih thu Pi Lalnithangi chuan a sawi a. A ma Art Gallery  Art Novelty a artiste naupang te te an thiamthil tih hmasawnna tur a buatsaih thin chu fakawm hlea a hriat thu a sawi a ni.

Pu V. Laltlanmawia, Instructor, Art Novelty in hawnna inkhawm hi a kaihruai a. Guest of Honour, Most Rev. Stephen Rotluanga, Senior Adviser, MADS chuan Art ti hmasawn tura I & PR Department tanlakna chu fakawm a tih thu a sawi a. Artiste lo ni tawh te, la inzir chho zel tur ten mi tih sa copy mai lova, mahni style neih a, originalily neih kan tum a ngai a ni, a ti a. Chutianga kan tih theih chuan khawvelin kan hna te min pawmpui dawn a ni, a ti.

Pi Lalhmingmawii (Amawii) Art Novelty neitu in thu a sawi bawk a. Paintings a luhchilhna kawngah a chhung ten nasa taka an phurpui leh a sira an din tlat avanga tun hun thleng thei a nih thu a sawi.

Aizawl Art Festival hian 16 December, 2017 thleng a awh dawn a. A duh apiang tan man awm lovin a en theih a, mithiam kutchhuakte hi lei theih a ni bawk a ni. 15 december, 2017 hian Art Seminar neih a ni dawn bawk a. Hetah hian mithiamten zirtirna an pek bakah sawihona neih a ni ang.

Artiste 45 ten an kutchhuak 71 he Festival ah hian an pho chhuak a. State pawn atangin 12 tarlan a ni bawk a. Naupang 6 ten an kutchhuak an dah bawk a ni. Silchar University atangin Prof. Dr. Rajkumar Majumdar pawh he hunah hian a rawn tel a ni.