Nimin atanga hman  Village Council Conference cum Panchayat Sammelan, Champhai Town Hall-a neih kharna hun chu vawiin chawhnu dar 3 khan neih a ni.

Kharna hun hi Champhai District Bawrhsap  Pu Vanlalngaihsaka IAS  chuan a kaihruai a. Kum 2016-2017 chhunga VC tinte MGNREGS leh State Finance Commission hnuaia hnathawk thate hnenah lawmman hlanna Pi Lalsangpuii Hmar, Additional DC-in a nei a. Lawmman pakhatna dawngtu chu Champhai Vengthlang VC – Construction of Health Sub-Centre Building a ni a. Sialhawk VC - Construction of Water Tanky cum Waiting Shed chuan pahnihna a hauh a. Champhai Vengtlang North VC- Contruction of  Retaining Wall chu pathumna a ni bawk a ni. Pu K. Lalhmuakliana, DLAO, Champhai District-in lawmthu sawina neiin hun a khar a ni.

Vawiin chawhma lamah Pu K.Lalhmuakliana kaihruaina hnuaiah hun hmanho niin VC mahni khua theuha Gram Sabha/ Faina/ hmasawnna kawnga hma la tha ten an hnathawh leh tawnhriatte sawina hun an nei a.  Chawhnu lamah Pu K. Lalmawia, President, Champhai District Village Council Association (CDVCA)  hovin rorelna hun an neia, resolution hrang hrang an pass nghal bawk a ni.