Indian Council of Social Sciences Research (ICSSR) bul tuma, Mizoram University-a Department of Education in hmarchhaka hmasawnna kawnga harsatna leh beiseina chungchang zirhona a buatsaih National Seminar ‘Development in North East India : Problems and Prospects’ tih chu vawiin khan a hawnna programme MZU Guest House-ah neih a ni a, Education Minister Pu Lalsawta’n a hmanpui.
Seminar hawnna inkhawm hi MZU Vice Chancellor, Prof. R. Lalthantluanga’n a kaihruai a. Seminar hmanpuitu Pu Lalsawta chuan Seminar chu hmarchhak bial pumpui tan a hlawkthlak hle dawn nia a hriat thu sawiin he Seminar hi harsatna kan neih te sutkianna kawngah a pawimawh hle dawn a ni, a ti a. Hmarchhak bial chu hausakna chi hrang hrang nei a nih thu sawiin heng kan hausakna neih te hi zirchian leh chhawr thiam a tul a, amaherawhchu hengte hi thil awlai a ni lo a, chuvangin a bialchhung mai nilo rampum anga kan thawhho a tul a ni, a ti. Hmarchhak biala kan harsatna te chu ram chung hmun dangte nen a in ang lo hle a, a danglam bik a ni, a ti bawk.
Seminar thupui sawi hawngtu Sikkim University Vice Chancellor lo ni tawh leh tuna JNU, Delhi-a Professor ni mek Prof. Mahendra P. Lama chuan hmarchhak bial hausakna, danglam bikna leh hmasawnna atana thil tul nia a hriat te chu chipchiar takin a sawi a. Hmarchhak bial hmasawnna atana Zirna In sang zawk te hnathawh a pawimawh thusawiin University te chuan graduate leh doctorate degree pe chhuaktu ni mai lova thiamna bik nei hmarchhak bial chhung hausakna chhawr tangkai thiam tur an chherchhuah a tul a ni, a ti. Global World atangin thil tam tak kan zir a, khawvel pawhin hmarchhak atangin zir tur tam tak a nei a, pipu atanga thiamna kan neih te khawvel in a hman tangkai theih nan heng thiamna te hi zirchian a humhalh a tul a ni, a ti bawk. chungte chu kan humhalh a tul thu a sawi bawk.
Seminar hawnna programme-ah hian Prof. Lalhmasa-i Chuaungo, Head, Department of Education chuan in lawmna thu a sawi a, Seminar chungchang sawizauna chu Prof. R. P. Vadhera chuan neiin Prof. B. B. Mishra chuan lawmthu a sawi.
Chawhnu khan Technical Session hmanzui nghal a ni a, hei hi naktuk ah pawh chhunzawm a ni ang a. Hmarchhak state hrang hrang bakah ram chhung hmun dang atang pawhin University zirtirtu leh Research Scholars eng emaw zat he Seminar-ah hian an tel a ni.
