1329/2022-2023
Aizawl, the 22nd July 2022 : Information Communication Technology changtu Minister Pu Robert Romawia Royte in vawiin khan NIELIT Zuangtui ah zirtirtute tana karkhat awh naupang zirtir kawnga IT hman tangkai chungchanga ‘Capacity Building of School Teachers on IECT Technologies’ tih training kharna a hmanpui a, he hunah hian NIELIT in July thla atanga course thar an tan tur, Mizorama a awmchhun – M. Sc. (Electronics) chu a hawng bawk a ni.

ICT Minister Pu Robert Romawia Royte chuan tunlai leh hmanlai ngaihtuahin zirna boruak a inthlak danglam nasat thu sawiin tunlaia IT leh a kaihhnawih - social media, cartoon leh games te hian naupang hun leh hriatna a ruksak nasa a, naupang hi kan chuh ti ila kan sawisual tam lovang, hei hi zirtirtute tan chona lian tak niin ka hria a. Chuvangin classroom chhungah engtin nge naupangten an zirlai, nuam takin an zir theih ang tih ngaihtuah chungin, IT leh computer hmangin, zirna hi classroom chhunga kan kalpui leh sengluh a pawimawh hle in ka hria, a ti. Zirtirtu an nih angin naupangten beidawnna an neih loh nan, thil reng reng a eng zawng leh a tha zawnga an thlir thiam theih nan positivism te chu naupangte nunah an tuh a tul hle tiin chutiang zelin an zirlai naupangte zirtir leh fuih thin turin a chah a ni.

Zirtirtute chu ram leh hnam siamtu an nih dante sawiin tunlai khawvel leh kan khawtlangah zirtirtu hian zah an la hlawh reng, mahse zirtirtute zahawmna vawngtu tur chu zirtirtute tho in ni a, chuvangin mi entawntlak nih a tul a, a bik takin tunlaia social media hmansualna a tam avangin hemi kawngah hian fimkhur a tul zuala, midangte pawh fimkhur a tulzia hrilhchhawngtu leh zirtirtu in nih a tul hlein ka hria a ti. IT chungchang leh a kaihhnawiha NIELIT in Mizoram Sawrkar hnuaia thawktu hrang hrang tana training chi hrang hrang an mahni hna mil leh puihna kawnga an buatsaih thin chu Mizoramin a chhawr tangkai hle tiin he zirna in hi Mizoram tan a hlu tiin a sawi a. ICT Department, Ministry of Minority Affairs leh NIELIT te tangkawpin Mizoram khaw kilkhawr 7 ah IT zirna an din thar dawn thu a tarlang a ni.

ICT Minister hian NIELIT in course thar tun thla atanga an kalpui tur M. Sc. (Electronics) Course chu a hawng nghal a, he course ah hian seat 20 awmin MZU hnuaia affiliation pawh an nei fel tawh a ni.

Training kharna programme hi Pu T Gunendra Singh, Director in charge, NIELIT, Aizawl in kaihruaiin Pu Lalthanzara, Additional SPD, Samagra Shiksha leh Dr. C Lalnuntluanga. President, Mizoram IT Society te pawhin hmanpuiin thusawina hun an nei a ni.

He training ‘Capacity Building of School Teachers on IECT Technologies’ tih hi Ministry of Electronics and Information Technology (MeitY) in “Capacity Building in IECT including training in Digital Skill Sets and Current Industry Demanding Technologies for various sections of society in the NE States” tih, NECB 2.0 project tia hriat hnuaia ruahman niin NIELIT in Samagra Shiksha, Mizoram tanpuina leh Mizoram IT Society thawhhona an kalpui a. Zirtirtu (primary atanga Plus 2) 572 in Batch ruk, kar khat zel an training a, kumin March ni 24 ah training hi kalpui tan a ni.