1330/2022-2023
Kolasib dated 22nd July 2022: Vawiin chawhnu khan Pu K.Lalrinliana, Minister of State, Food, Civil Supplies and Consumer Affairs Department chuan T.S.Luaia Middle School, Rengtekawn tlawhin thawktute leh Rengtekawn khawtlang hruaitute nen inkawm hona hun an hmang a. Builum Chhuak Welfare Society buatsaiha New Builum Middle School-a builum khua zirlai tițha lawmpuina hun a hmanpui bawk a ni.
T.S.Luaia Middle School, Rengtekawn a tlawhnaah hian thawktuten an mamawh hrang hrang lo thlenin Minister Pu K.Lalrinliana chuan school chung thawmțhat ngai laite leh a hungna tur te chu endik a, a țul anga hmalakpui a tum thu a sawi a. Ramria buaina leh hrileng avanga Mizoramin harsatna a tawh țhin ațangte hian kawng hrang hranga intodelh tur a mi tin kan inpuahchah a țul thu a sawi.
Builum khaw chhuak zirlai leh eizawnna kawng a hlawhtling mi 38 chawimawina hun hmannaah hian Pu.K.Lalrinliana chuan Mizorama kawlphetha kan siamchhuah ve theihna tur a Builum khawtlang inpekna chu ropui a tih thu leh mahni aia ram leh hnam hmasawnna atan a an inhuamna chu entawntlak a tih thu a sawi. New Builum khawtlangin khua din thar leh a nih mekna a an mamawh hrang hrang an lo thlen te chu Minister chuan a țul anga a lo bawhzui tur thu sawiin VC House sakna tur a ruahman sak tur thu a sawi a. Primary School sak țhatna tur leh New Builum panna kawng thawmthat dan tur pawh a mawhphurtu Department hotute a sawipui tur thu a sawi bawk a ni.
Pu K.Lalrinliana chuan zirlaite chu zirna kawng a an phur lehzual theih nan leh mahni inrintawkna kawng a hma an sawn zel theih nan hlawhtlingte lawmpuina buatsaih a ni chu lawmawm a tih thu a sawi a. Ruihhlo leh ruihtheih thil lak a fihlim turin leh khawtlang tan a mi țangkai, hmasawnna thlentu nih tum țheuh turin zirlai hlawhtlingte chu a chah bawk a ni.
New Builum zirlai hlawtling lawmpuina hun hi Pu F.Lalbiakliana, Chairman, Builum khaw chhuak Welfare Society-in a kaihruai a, Pu Lalhmingmawia, Secretary in report pein Pu R.Tlanglawma, President, Village Council-in thusawina hun a hmang bawk a ni. FCS & CA Minister hi Pu Timothy R.Lalhmangaiha, BDO, Bilkhawthlir leh Pu Hmingthanzuala, DIPRO-ten an țawiawm a ni.
Attachment
- Loading attachment...
