2966/2022-2023

Aizawl, dated the 6th December 2022: Vawiin chawhnu khan Mizoram chhunga 5G Network Roll Out atana Mizoram Sawrkar inbuatsaihna leh hmalakna kal mek sawihona meeting ‘Consultative meeting on readiness of 5G Roll out in Mizoram’ chu ICT changtu Minister Pu Robert Romawia Royte, kaihhruaina hnuaiah e-Governance Conference Room, 3rd Floor, Old Secretariat Building, Aizawl-ah neih a ni. He meeting ah hian Mizoram Sawrkar hnuaia ICT Department, Power & Electricity Department, UD&PA Department, AMC, JERC (Manipur & Mizoram) leh Aizawl Smart City Ltd. te bakah Department of Telecom, Govt. of India, COAI (Cellular Operators Association of India), DIPA (Digital Infrastructure Providers Association), Reliance Jio leh Airtel aiawh Official thahnem tak an tel a ni.

ICT Minister Pu Robert Romawia Royte hian 5G chu Mizoram a hman a nih thuai theih nan Telecom Service Provider (TSP)-te chu chak zawka hma la turin a hrilh a; Krismas present atana Aizawl leh Lunglei khawpuiah tal kumin chhunga 5G Network hman a nih theih nan theihtawp chhuah turin a ngen a; hemi atana harsatna an neih chuan theihtawp chhuaha a puih tur thu leh a tul tulah lo puih a inhuam thu a sawi a ni. ICT Minister hian 5G network hman a nih theih nan hian a kaihhnawih Sawrkar department hrang hrang, a bikin P&E Dept., UD&PA Dept., AMC leh PWD leh adt. te an pawimawh zual thu sawiin theihtawp chhuah a hmalakpui turin a sawm a ni.

Meeting chuan Pu Robert Romawia Royte, ICT Minister hmalaknaa tun hnai 25th November 2022-a Government of India, Department of Expenditure-in Special Assistance to State for Capital Investment (SACSI) 2022-2023 hnuaiah Mizorama District leh Block zawng zawnga telecom tihchangtlunna atan Cheng Vaibelchhe Sawmnga (Rs. 50 crore) a sanction chu lawmawm a ti hle a; hei hian Mizorama Internet connectivity tha lehzual zawk neihna atan hmasawnna ropui tak a thlen ngei beisei a ni.

Meeting ah hian Pu Lalramsanga Sailo, Secretary, ICT Department chuan meeting neih a nih chhan leh a kaihhnawih tul dangte a sawifiah a ni. ICT Minister chuan Mizoramah Internet connectivity tha zawk kan neih nan chak taka hma lak a nih mek thu leh 5G service kan hman ve thuai theih nan Mizoram Sawrkar chuan 31st October 2022 khan hma latu tur ‘Working Committee for Roll out of 5G Network’ a din thu a sawi a. ‘5G network, fifth generation telecom network technology’ chu internet speed chak leh bandwidth sang tak a nih thu tarlangin, he 5G technology hi kan hmang thei a nih chuan mipui ten kan nitin nun leh khawsakna bakah kawng hrang hrang - Health, Education, Banking, Agriculture, Rural development, Governance, public service delivery, leh Industry ah te hmasawnna tam tak thlen theitu a ni dawn tih a sawi a ni. Tin, Information Technology (IT) pawimawhzia sawiin hmasawnna bultanna tur a nih thu leh a hmawr bawkna tur atan pawh a pawimawh thu a sawi a ni.

Meeting ah hian Pu C. Lalhmachhuana, Director, NELSA, Department of Telecom, Govt of India pawhin presentation pein 5G Services chungchang leh Mizoram a hman a nih ve thuai theih nan a hmalak dan tur hrang hrang leh hmachhawp te a tarlang a. India ram khawpui engemawzat leh airport thenkhatah Reliance Jio True 5G leh Airtel 5G plus te hman tan mek a ni a, India hmarchhakah Guwahati a lo thlen tawh thu te a sawi lang a; 5G chu mihring leh mihring te inbiakpawhna mai piahlamah technology hmanga khawl leh khawl te thlunzawmtu atan hman a nih thu a sawi a ni. Mizoram chhunga Mobile connectivity tihchangtlunna tura hmalakna kal mek te leh Telecom Service Provider (TSP) ten harsatna an tawh hrang hrangte a sawilansak bawk a ni.

He consultative meeting ah hian Pu Lalramsanga Sailo, Secretary ICT Department kaihhruaina in ‘5G network’ hman thuai a nih theih nan a kaihhnawih department leh organization te nen inrawn tlanna leh sawihona technical session pawh neih zui a ni a, Reliance Jio company hian Aizawl khawpui chhungah 5G Network pek chhuahna remchang tur hmun 56 an thlan chhuah thu leh chung zinga hmun 30 te chu an survey tawh thu an sawi a; Airtel company pawhin hemi atan hian Aizawl khawpui chhungah hmun 54 vel an ruahman thu an sawi bawk a ni.