2967/2022-2023 

6.12.2022 : Vawiin December ni 6 khan, naktuk December ni 7 a ṭan tur Parliament Thlasik Ṭhutkhawm chhunga thawhho dan tur National Democratic Alliance, NDA a tel MP - ten Defence Minister Pu Rajnath Singh a hoin an sawiho a. Commerce and Industry Minister, Rajya Sabha a house leader ni bawk  Pu Piyush Goyal telna NDA hnuaia MP te ṭhutkhawmna hi Parliamentary Affairs Minister Pu Pralhad Joshi an a kaihhruai  a. A hmasa lama thusawiin  Lok Sabha Member Pu C Lalrosanga chuan Mizorama kuhva chingtuten Assam a kuhva hring phurhluh leh hralhchhuahna kawnga harsatna an tawh dante a sawichhuak a. Assam ah Mizoram leh Tripura thar kuhva hring hi danchah a nih tlat avangin a chingtuten harsatna nasa tak an tawk a ni tiin hemi chungchang hi house a auchhuahpuina hun a dil nghal a ni.

Pu C Lalrosanga chuan tunhnaia Bangladesh ramchhunga tharum thawhna avanga Mizoram chhim lama sahimna zawnga zo hnahthlak rawn tlanlutte hriatthiam leh chhawmdawl an ngaihzia a sawi bawk a. Ramri vengtu BSF hote pawh Bangladesh aṭanga rawn tlanlutte hi ngaihnathiamna lantir tura hriattir an ṭul a ni a ti bawk.

Myanmar aṭanga zo hnahthlak an sahimna zawnga Mizorama rawn tlanlutte laka sawrkar laipuiin hriatthiamna thui tak a neih avanga lawmthu sawi pahin MP chuan Bangladesh ram buaina avanga Mizorama zo hnahthlak rawn tlanlutte pawh hi dimdawi taka en nise tiin central sawrkar hotute chu a ngen nghal a ni.  

He ṭhutkhawmnaah hian Lok Sabha a Nagaland leh Manipur MP te chuan an ram buai avanga harsatna an tawh dante leh hmasawnna a tihṭhuanawp dante an sawi a. Nakum kumtir maia inthlang tur Nagaland ah  Remna tluantling an neih theihna tura helhote nena inbiakna hmawr bawk rang turin sawrkar laipui hotute an ngen a ni.