1763/2026-2027 

Dated Khawzawl, the 13th August, 2026: Vawiin khan Khawzawl Bawrhsap Pu K. Vanlalthiana chuan ICT@Schools Scheme hnuaia Khawzawl District-a school thlan thar 16-te hnena Computer set, Printer leh Projector semna hun chu District Project Office, Samagra Siksha-ah a hmanpui a. Khawzawl Sub-division Education Officer (SDEO) Pu Francis Lalruattluanga chuan hun kaihruaiin, ICT@Schools Scheme thiltum a sawifiah.

Bawrhsap Pu K. Vanlalthiana chuan Khawzawl District chhunga school 16-in computer set thar leh a kaihhnawih an dawn theihna tura hma latu District Education Office-a thawktute chungah lawmthu a sawi a. Khawvel inher danglam zel mila kan thiamna leh finna tihpun a pawimawh thu sawiin, thingtlanga zirlai naupangte pawhin computer leh IT lam an thiam ve theih nan an computer dawnte hmang tangkai ngei turin duhsakna a hlan a ni.

He hunah hian Khawzawl District Education Officer Pu Lalrawngbawla pawhin school aiawha kal hotute fuihna thu a sawi a. DEO Staff leh School aiawhte an tel a ni. ICT@Schools Scheme hi zirlai naupangten digital literacy leh e-learning lama hma an sawn theih nana sawrkar laipui duan a ni a. He programme-ah hian school tinin computer set 4 theuh, printer 1 leh projector 1 an dawng a, a dawngtute chu Pamchung, Govt. Khawzawl MS-II , Vankal UPS, Govt. Kawlkulh M/S-I, Govt. Kawlkulh M/S-II, Hmuncheng UPS, Govt. Riangtlei M/S, Govt. Biate M/S, Govt. Sialhawk M/S, Govt. Chhinlung M/S, Govt. Vangtlang M/S, Govt. Khawhai M/S, Govt. Tualpui M/S, Govt. New Chalrang M/S, Govt. Kawnzar M/S, Khawzawl leh Rabung Sr. Secondary School te an ni a, a vaiin Computer set 64, Printer 16 leh Projector 16 sem chhuah a ni.