Vawiin chawhma dar 10:30AM khan Saiha Health Main Centre-ah IDCF (Intensified Diarrhoea Control Forth night) kar hnih chhung awh tur chu India rama hmun dangte rualin Pu RT. Zachono, CEM, MADC in a hawng. He IDCF programme in a thil tum chu, “Naupang kum 5 hnuailam mi  kawthalo a vangin an thi tur a ni lo” (Zero child death due to childhood Diarrhoea)  tih a ni.

Vawiin atang hian ASHA ho chuan in tinah kalin naupang kum 5 hnuailam kawthalo an awm em; tih an en chhuak vek ang a. Naupang kum 5 hnuailam awmna inah ORS package an sem nghal ang. Sub-centre tin leh PHC tinah kawthalo damdawi Zinc an stock vek bawk ang a. PHC awmlohna khuaah te chuan Anganwadi Centre-ah kawthalo damdawi te hi dah a ni ang. He mi bakah hian ASHA ho chuan School-ah te  kalin naupang ho hnenah kutsil fai dan dik leh enkawl thianghlim dan te an zirtir bawk dawn a ni.

Pu RT Zachono, CEM, MADC chuan kan District-ah hian IMR sang viau mahse  kawthalo avanga nuna chan erawh chu kan la awm rih lem lo va, mithiamte sawi danah Diarrhoea hri hi boruaka leng ni lovin, kan ei leh in atanga kan kai te a nih thin avangin, naupangte hnenah thianghlimna zirtir hi kan zavaia mawhphurhna a ni, a ti a. Saiha District hi IMR a san avanga sorkar ngaihsak kan hlawh viaua a hriatthu sawi langin,  IDCF programme tihlawhtling turin Medical staff te, a bik takin ASHA ho te chu thawhrimna leh inpumpekna  nen thawk turin a ngen a ni.

Vawiin IDCF hawnna programme hi Dr.C.Hniechho, Sr.MO in a kaihruaia, Dr.Lalnunziri, MO leh Programme Officer ni bawk in IDCF programme kalphung leh hmalak dan tur te sawina hun a hmang a ni.