“Intensified Diarrhoea Control Fortnight”  27th July - 8th August, 2015 chhunga neih tur chu vawiin khan Mamit District-ah hawn niin, Addl. DC Pi Lalbiaksangi’n a hawng.

Hawnna inkhawm hi Chief Medical Officer Office-ah neih niin, Dr. Hmingthanmawii, CMO in a kaihruai a, programme duan chhuah a nih dan leh hman dan tur tlangpui te sawi hawnna a nei a ni.

He hun hawngtu Pi Lalbiaksangi, Addl.DC chuan sorkar laipuiin kawthalo beihpui thlakna a duang chhuak chu lawmawm a tih thu sawiin, “tunlai fur ruahtui tlak nasat lai hi kawthalo vei tam hunlai a ni a, abik takin naupang kum 5 hnuailamah a tam thin a he “Intensified Diarrhoea Control Fortnight” hmalakna avang hian kawthalo venna kawngah kan district in nasa taka hlawkna kan neih ka beisei a ni,” a ti. ASHA te ORS sem mai piah lamah a siam dan te mipui mimir zirtir thin tur a chahin, Doctor leh Health Worker te pawh mahni bial theuhah thahnem ngai taka thawk tur leh ‘Tih dam aiin inven a tha zawk’ tih thupui vawng tlat turin a chah a ni.

Intensified Diarrhoea Control Fortnight chhung hian ASHA ten kum 5 hnuai lam awmna in ah ORS a thlawnin an sem anga, hei bakah Village Health & Sanitation Day-ah te thianghlimna leh kawthalo laka inven dan tur chungchang te zirtirna na pek te, naupang chaw hrai dan leh nu hnute pek dan dik zirtirna pek leh school hrang hrangah kut sil dan te inzirtir a ni ang.