Tukin zing khan Lawngtlai Chief Medical Officer Office ah khawthalo zawn chhuah leh enkawl beihpui thlakna, (Intensified Diarrhoea Control Forthnight) hapta hnih awh tur (27th July – 8th Aug, 2015) hawnna hun hman a ni.

Inkhawm ah hian Dr. Zothanpari Chhakchhuak, District Nodal Officer chuan Intensified Diarrhoea Control Forthnight kalpui a nih chhan leh Lawngtlai Districy chhunga kalpui dan tur ruahmanna an siamte a tar langa. Ruahman dan chuan Hapta hmasa zawk chhungin Accredited Social Health Agency (ASHA) thawktuten in tin tlawh chhuakin naupang kum 5 hnuai lam te hriselna an en sak vek ang a, Oral Rehydration Solution (ORS) an sem bakah nu leh pate chu naupang khawthalo enkawl dan an zirtir hlawm ang. Chutiang bawkin Damdawiin, Public Health Centre, Sub-Centre leh hmun thlan bikah te inzirtirna leh inhrilhhriatna kalpui an ni bawk dawn a ni.

Hapta hnihna ah thawktute hian naupang ei leh in lama tlakchham neite (Malnutrition) zawn chhuah beihpui an thlak chhunzawm lehnghal anga, nu leh pate hnenah ei leh in tha pek dan te, nu hnute thatna te, kutsil fai pawimawhna an hrilh kual leh anga, kutsil dan dik zirtirna an nei nghal bawk ang. Hapta hnihna hi in tin tlawhchhuah bakah Primary leh Middle School thlan bikah te kalpui tura ruahman a ni bawk.

Khuallian Pu F. Hranglura, Executive Member, Education, LADC chuan Lawngtlai District mipuite chu hriselna hlut zia hriaa, hriselna kan neih theih nana thawktute lo tanpui tur leh mithiamte thurawn anga engkim ti zui turin a sawm a ni.

Inkhawm kaihruaitu Dr HC Thangkima, Chief Medical Officer pawhin thusawiin, hriatna tlakchham avanga harsatna kan tawh a tam hle a, chutiang harsatna min thlentu langsar tak pakhat chu Kawthalo natna hi a ni. He beihpui thlak chhung hian mitinten Kawthalo laka invent dan leh inenkawl dan chiang taka hriat hman i tum ang u, tiin mipuite a chah a ni.

India ramah hian kum tin kawthalo natna avangin naupang kum 5 hnuai lam nuai 2 vel boral ziah ang an ni a, chumi ven nan chuan Ministry of Health & Family Welfare chuan ram puma hman turin he Programme hi a siam a ni.