1731/2022-2023

Champhai, the 26th August, 2022: Champhai District chhunga Fostering Climate Resilient Upland Farming System in the North-East (FOCUS) hmalakna hrang hrangte zirchianga chamchilh mektu, International Fund for Agricultural Development (IFAD) Supervision Mission Team leh District Level Coordination Committee on FOCUS member-te chuan vawiin tlai dar 4 khan DC Conference Hall-ah FOCUS project kaltlanga District chhunga hmalakna hrang hrangte an thlirho.

He hun kaihruaitu District Bawrhsap Pu James Lalrinchhana, Chairman, District Level Coordination Committee on FOCUS chuan IFAD Supervision Mission Team-te lawmna thu sawiin, Champhai District chhunga FOCUS hnuaia hmalaknate chu lawmawm tiin, hmuh nuam a tih thu leh hmalakna tam zawk a awm theih zel a beisei thu a sawi a. IFAD kaltlang FOCUS project leh line department-te inkarah inpawhtlanna leh thawhhona tha neih a pawimawh thu a sawi a. Hamthatna leh hmasawnna tam thei ang ber hun bituk chhung ngeia siam a nih theih nan kalkhawmte thahnemngai taka thawhhopuiah a sawm nghal bawk a ni.

IFAD Supervision Mission Team Leader Pu Frew Behabtu, PO, IFAD chuan hrileng vanga hmalakna a chak tawk loh thu leh hun tlemte kum 2 bawr vel neih chu tangkai leh thahnemngai taka chhawr tangkai a tul thu a sawi a. FOCUS hnathawhnaah IFAD atangin fund za zela 48 bawr vel hman a nih thin thu leh, a dang za zela 52 bawr vel chu line department atanga beisei thin a nih thu a tarlang a. Kum hmasa aia kumin chhoa hmasawnna hmuh tur a awm tam zawk chu lawmawm tiin, hmanrua leh theihna neih ang angte tangkai zawka hman thiam a tul thu a sawi bawk.

Thutkhawmah hian FOCUS line department hotute atangin report ngaihthlak a ni a. Chak zawka FOCUS project kalpui a, hunbi tuk chhung ngeia zawhfel a nih theih nana pawimawhte sawiho a ni a. Rang zawka fund dawn a nih theih dan turte, hmasawn ngaihna lai leh hna thawh hun azira hmalak dan tur duante bakah tul dangte rel a ni a. Hmalakna leh hmachhawpte thlirhona hun tun aia zing zawka buatsaih thin ni se tih a ni bawk.

IFAD Supervision Mission Team Member 3; Mission Leader Pu Frew Behabtu, PO, IFAD; Dr. VP Singh, Agronomist, Jhum Management Expert leh Dr. Vizokhanyu Yhome, PIT, Nagaland-te chuan vawiin atang khan Champhai leh a chhehvela FOCUS  kaltlanga line department hrang hrang hmalaknate a hmunah kalin an zirchiang tan a, an ni hi State FOCUS Project Management Unit (PMU) atangin Pi Hmangaihzuali, Joint Director (Horti) leh Official dangten an tawiawm bawk.

Vawiin thukhawmah hian Champhai District atangin Pu B.Lalchhawntluanga, PD, DRDA; Pu David Lalrinawma, Addl. DC; Pu M.S Dawngliana, District Project Manager, FOCUS DMU Champhai; Line Department hrang hranga DLCC member-te leh FOCUS District Management Unit (DMU), Champhaia thawktute an tel a ni.