Inner Line Pass dilna a Mizoram pawn lam mite Sponsor chungchangah ram leilung faten thil kan hriat chianna turin Mizoram Sorkar, Home Department chuan hetiang hian thuchhuah a siam a ni.

Inner Line Pass (ILP) hi chi 3 (thum) a awm a:

1. Temporary ILP : Hei hi ni 7 chhung a nung a; State pawn mi, Mizorama lo lut tur ten Mizoram House hrang hrang atangin an dil thei a. SDO (Civil) Vairengte leh Ngopa te, Deputy Superintendent of Police Lengpui Airport te, ADC Bairabi te, Border Police Outpost N.Kawnpui, Saiphai, Phaisen leh O.C Kanhmun Police Station-ah te leh OC Kanhmun Police Station ah te dil theih a ni a. He Temporary ILP hi sumdawnna atan dil theih a ni lova, zin veivahna atan chauh a tih a ni. Permit thih dawnah Mizoram a cham hun pawhsei a dil theih a ni.

2. Regular ILP: Hei hi thla 6 (ruk) aia reilo a nung a, vawi 2 (hnih) aia tam extend/pawh sei theih a ni lo. Kut hnathawk/labour works atana mimalin a dil theih a ni a; sumdawnna atan Regular ILP hi dil theih a ni lo.

3. Two Years ILP: Heihi Sorkar hnathawk nghet leh nghet lo, State pawn miin amah leh in khata chenpui chhungkaw member ten an dil thei a; Mizorama hna an thawh hun chhung rei zawng ang zela pawhsei/extend theih a ni. Hei bakah hian Two Years ILP hi Trading Licence nei te leh Mizoram hmasawnna in a mamawhna avanga Private leh Public Sector Company a thawk ten an dil thei a. Armed Forces (Sipai) Canteen neitu leh an hnathawk ten an dil thei bawk a ni.

Heng ILP chi hrang hrang diltu tupawh Sponsor tur chuan, ILP kaihhruaina Dan a hre fiah hle tur a ni a; a mi Sponsor-a chuan pawi a khawiha Bengal Eastern Frontier Regulation 1873 Dan a bawhchhiat chuan Sponsor tu hian mawh a phur ang. A mi sponsor chu hna tula a chhawr tawh loh chuan a ILP thih hma pawhin ILP Sponsor tu chuan ama ILP copy chu Deputy Commissioner hnenah a pe kir (Surrender) tur a ni a. ILP thih hun atanga ni 7 chhunga D.C hnena a pekir lo a niha amah pawh a thawn haw lo anih chuan mi pakhat zelah Rs. 1,000/- (Cheng sangkhat) a chawi zel ang. Sorkar Department thila Contractor te, Company hna thawkte Sorkar Official in a Sponsor chu a chhawr tawh loh chuan ILP copy hi surrender in D.C a hriattir tur a ni a, Dan bawhchhiat ah mi pakhat zelah Rs. 2000/-(Cheng sanghnih) a chawi thei bawk a ni. Hemi dan kenkawh anih theih nan hian tunhnaiah Sawrkarin thuchhuah a siam angin, ILP dilna thehluh anih rualin Security deposit Rs 1,000 (Cheng sangkhat) emaw Rs 2,000/- (Cheng sanghnih) (ILP dil a zirin) emaw D.C. Office ah thehluh nghal tur a ni a. Security Deposit hi Mizoram chhung Bank hrang hrangte atanga Call Deposit (DCR) anga thehluh tur niin, a chunga dante khi bawhchhiat anih chuan sponsor tuin Security Deposit hi a chan ang.

Hetiang dan zawm loh a nih chuan an ILP chu Cancelled anga ngaih tur a ni a; kum 2 chhung chu midang tumah an Sponsor thei lovang. ILP renew loh emaw extend loha awm, thla khat ral hmaa renew emaw extension dilna thehlutte chu ILP thih atanga dilna dawn leh ni inkar ah ni khat zelah Rs. 10/- chawi tir an ni ang. Mizoram leilung fa tumahin ILP atan mi 10 aia tam an Sponsor thei lova, Ram leilung fa nilo, sumdawng leh dawrkai tumahin an dawrnghaktu leh tirhchhiah/hnathawktu an sponsor thei lo.

Armed Forces a Head of Department emaw Commandant ten Canteen hawngtu Proprietor leh an dawr nghak leh hnathawk 5 aia tam an Sponsor thei lo bawk a ni.

Mizoram State hmasawnna hna thawktu Public Sector Company te leh Private Sector Company hotu lian, Manager etc., Valid ILP neite chuan an labourer te leh hnathawktu mi 100 aia tamlo an sponsor thei thung a ni.

He ILP kaihhruaina Dan hi The Bengal Eastern Frontier Regulation, 1873 paragraph 2 ina State Sorkar thuneihna a pek anga siam a ni.