Vawiin September 21, 2010 hian IMPCC Meeting PIB Conference Hall-ah neih a ni. Pu C. Lalrosanga DDK Director-in committee kaihruaiin, Septemebr thla chhunga thupui Mizo thalaite tan Eizawnna kawhhmuh chu theih tawpa hmalak a ni a; AIR-in Series 5-a thenin FM-ah kartin an puang chhuak a; Doordarshan-in September 24 (Zirtawpni ) Zan dar 6-7 inkarah Career Guidance chungchanga Live Phone-in Pragramme a buatsaih dawn a ni. Mizote zinga Sorkar hna lama hre zau tak takten zawhna zawt duh apiangte an chhang nghal dawn a ni.

AIR Aizawl chuan October 22, 2010 hian FM Zoawi Award siam tumin hma an la mek a; hemi atan hian tunlaiin nitin SMS 4000 chuang an dawng deuh reng tawh a ni. He FM Zoawi Award hian Mizo Zaithiamte, hranghlui leh thangthar zaithiamte tan chawimawina chi hrang hrang 15 zet a siam dawn a ni. AIR Aizawl-in Mizo thalaite tana zai lama hmasawnna tur a buatsaih hi thang tharte tan malsawmna ropui tak a nih beisei a ni.

Aizawl Doordarshan pawhin MSACS te nen tang kawpin Zaipawl Intihsiakna ropui tak buatsaih tumin hma a la mek a; a tirah chuan Bial Zaipawlte leh Kohhran Pawl Zaipawl that e tana ruahman a ni. Mahse, tunah chuan Kohhran mal Zaipawl zawng zawngte tel theihna tura zau zawka hawn a ni a; hei hian AIDS do kawnga thalai tam zawk a inhnamhnawihtir theihna tura beiseina a ni. Lawmman pakhatna Rs 1,00,000/- Pahnihna Rs 70,000/- 3-na Rs 50,000/- tura ruahman a ni. Hemi bakah hian lawmman chi dang tam tak siam tum a ni a; intihsiakna tel zawng zawng tan Participation Lawmman Rs 2000/- theuh pek an ni bawk ang.

Zaipawl intihsiaknaah hian a tam thei ang ber tel turin DDK leh MSACS te chuan Kohhran Zaipawl te an sawm a; Mizorama natna hlauhawm tak AIDS laka mipui fimkhur theihna tura mitinin hma lak a tul tawhzia leh tuartu an tlem theihna tura tanblakpui theuh turin an sawm nghal a ni.