Kan ram zalenna champha phak 63-na August ni 15 urhsun taka kan lawmna ni ah hian in hnena thusawi theihna hun remchang ka neih avangin ka lawm em em a ni. He ni ropui takah hian in zavaia chungah duhsakna hlanin chibai ka buk a che u.
Vawiin hi kan zavai atan hlimna ni leh chhuan tlak a ni a. Kan chunga hnam puanzar rawng chi thum inpawlh zar mek chibai kan buk hona ni remchang a ni. Vawiinah hian ram zalen leh chhuanawm taka min hlangkaitu zalenna sualtu leh ram tana an nunna hlante chungah zahna leh chawimawina leh lawmthu sawina thuk tak kan hlan a ni. Mahni a ro in rel sorkar kan neihna tura theihtawp tak meuh, an tha leh zung bakah thlirna thui tak neia rim taka min sual chhuah puitu Mahatma Gandhi leh Jawaharlal Nehru te chungah zahna leh chawimawina kan hlan a ni.
Mipui rorelna nghet leh sum leh pai dinhmun ngelnghet taka min thlentu sorkar laipuiah hruaitu tling tak kan neih avangin kan vannei em em a. Keini State tenau zawkte chu sorkar laipui duhsaknaah innghatin hmasawnna leh sum leh pai insawhnghehna kawngah thui takin sorkar laipui zar kan zo thei a. Kawng tinrengah hmasawnna leh changkanna nei tura hma kan lak tawh thin ang bawkin hma pawh kan la chhunzawm zel tur a ni a, rorelna thianghlim, chak, mawhphurhna la ngam leh langtlang nei turin tan kan la zui zel ang; hmasawnna leh mitin hmakhua thatna hriltu, remna leh muanna boruak chhawmnung reng turin tha kan thlah miah tur a ni lo.
Kum kalta khan kan thutiam hlenchhuahna tura kan hmathlir te, hmachhawp leh ruahmanna te a tlangpuiin ka tarlang tawh a. Khangah pawh khan engemaw zat chu hlenchhuah a ni tawh a ni. Chutichung chuan heng hmachhawpte hlen vek tur hian sorkar a thuneitu te, khawtlang hruaitu leh mipui mimir pawhin tihtur hmabak thahnem tak kan la nei a ni tih ka chiang a. Chuvangin Mizoram hmasawnna atan mi zawng zawng thawhpuiah ka sawm a ni.
India rama State ralmuang ber kan nih zui theihna tura khawtlang hruaitute leh tlawmngai pawlte thawhpuinaah lawmthu ka sawi a. Hmun thenkhatah thil duhawm lo a thleng zauh thin tih lohah chuan State pumpui a ralmuang hi a lawmawm a. Rampum leh khaw hrang hrang inkar a remna boruak tichhe tura hetiang thil duhawm lo thleng thin te hi a punlun zel kan phal tur a ni lo. Mipui phunnawina leh an thil ngiat te ngaihthlak kawngah sorkar chuan dawhthei hle thin mah se dan leh thupek kenkawhna erawh mimal kutah a hlan ngai dawn lova. Buaina siam leh sorkar thil tichhe zawnga chetna ten rah tha a chhuah ngai lo angin khawtlang nun do zawnga chetlakna reng rengin hmun a chang tur a ni lo. Chuvangin hetianga che te chungah reng reng ngaihdamna lantir a ni ngai lovang tih hi chiang takin ka sawi lang duh a ni.
Kan khawtlang tana chhiatna rapthlak tak thlen thei damdawi hmansual leh tawlhruk te, zu leh a kaihhnawih chi hrang hrangte dona kawngah kohhran leh tlawmngai pawl, a bikin YMA te chungah lawmthu ka sawi a ni. Heng thil hnawksak tak tirem tur hian tha thlah lovin kan bei zel tur a ni.
Sum leh pai intodelhna tur te, ram leilung humhalh te, sik leh sa mumal neihna tura thing leh mau humhalh te, hmasawnna leh rethei dawmchhuah kawngahte sorkar chuan NLUP hmangin hun inlumlet thlentir a tum mek a. Thingtlang khuaa mi cheng te loneih dan kumhlun chu thlaka kawng thar zawh puia an sum leh pai dinhmun dawmkan tum mek a ni a. Hei hian rampum dinhmun chipchiar taka zirchianna te, ram nghet pek leh enkawl chungchanga kaihhruaina duanchhuah te, veng leh khaw bil huap ruahmanna bakah District huap ruahmanna hna hautak zet te a keng dawn a. Langtlang leh belhchian dawl taka kalpui nan leh sum leh pai riral mai tur dan nan khawtlang huap sum endik hna leh ruahmanna fel fai tak kenkawh a ni dawn a. Kum 5 chhunga chhungkua 1,20,000 zet tuam thei tur ruahmanna pumpui atan Additional Central Assistance hnuaiah cheng vaibelchhia 2873.13 lai min pawm saktu sorkar laipui chungah lawmthu ka sawi a. A mawhphurtute zawng zawng inpekna nen hemi hmang hian hlawhtlinna ropui tak kan hmuh ngei ka ring nghet tlat a ni. Engpawhnise, he ruahmanna tihlawhtling tur erawh hi chuan a te ber atanga a lian ber, a dawngtute leh sorkar a mawhphurtute zawng zawng inpekna leh thawhrimna a pawimawh hmasa ber dawn a ni. He ruahmanna hautak zetah hian hlawhchhamna chuan hmun a awh tur a ni lova, hlawhtling ngei turin ke kan pen tur a ni.
Kan thutiam hlenna turah hian lo neih leh a kaihhnawih thil dang te chu pawimawh hmasa an ni a. Tam zawk thar chhuak tur leh tharchhuahte man man zawka hralh a nih theih nan loneitute hmakhua chu sorkarin a ngai pawimawh hmasa dawn a. Horticulture, Sericulture leh AH&Vety lama hmalakna pawhin tlangram lo neih thlakthlengna turin tangkaina namen lo a nei dawn a ni.
Retheihna umbo nan thilsiam kawnga tanlak chu thil tangkai ber pakhat a ni tih kan chiang a. Thingtlang sumpai punna turin Agriculture leh Horticulture te nen thawhho-a thilsiamna bun chu thil tangkai tak a ni ngei ang. Tui leh boruak alh thei hai chhuah kawngah chak taka hmalak niin hetah hian kan chanpualte chu humhalh tlat a ni ang a. Kan thalai te tan eizawnna leh hna hmuhsak te chu kan tum ber a ni ang.
Ram hmasawnna leh hausakna turin zirna a pawimawh em em a ni tih sorkar chuan chiang takin a hria a, ziak leh chhiar thiamna piahlamah hmantlak leh chhawrtlak thiamna paw chhuak tura zirtirna pek a tum a ni. Ram tana sum peipunna hlawk ber chu zirna tha hi a nih avangin zirna siamtha tur chuan sum sen tam luat a awm thei lo. Chu chu hriain zirna siam tha tura thurawn petu Education Reforms Commission din a ni a, rim taka an thawh rah hun reilote chhunga sorkar hnena an hlan thei hi an fakawm hle a ni. Kan ram zirna hmasawnna tur leh a tha zawnga inthlakthlengna siam turin heng an thurawnte hi tangkai takin sorkar chuan hman a tum dawn a ni. Sarva Shiksha Abhiyan (SSA) chu hlawhtling takin kalpui mek a ni a. Elementary School thingtlang khaw tam takah din niin, sorkar laipui Ministry of Human Resource in tehna a siam Education Department Index ah hmarchhak state zinga ti tha ber kan ni thei hial a ni. Naupang school kal lai te riltam loh nan Chaw Chhun sem chu sorkarin a ngai pawimawh a. Rashtriya Madhyamik Shiksha Abhiyan (RMSA) pawh Secondary School te hmasawnna tur atan School hmunhma te duangin kalpui mek a ni bawk.
Infiamna lama theihtawp kan chhuahna te chuan tun hun reilote chhung pawh hian rah duhawm tak a chhuah tih ka hria a. Kumin March ni 6 khan Pi Sonia Gandhi chuan Mualpui-a Rajiv Gandhi Sports Stadium lungphum a rawn phum a nih kha. Kan infiammite nghahhlelh em em Lammual a hnim siamchawp phah leh Thenzawl Hockey Ground a Astroturf phahte chu tih thuai kan tum a. Regional Sports Training Centre pawh Saidan, Kolasib ah kan tan tawh a ni. State leh ram pum huap atana infiamna lama chawimawina dawngtu kan infiammi te hi kan chhuang takzet a ni.
Khawpuia cheng te tan eizawnna te, in leh lo te, mamawh zual leh hmunhma inbenbel leh veivahna changtlun zawk nan hmasawnna tluantling neih kan tum a. JNNURM bultumin Aizawl khawpuia mirethei, chenna in nei lo chhungkua 1096 leh District khawpui hrang hrang a chhungkaw 1950 te tan in ruahman sak mek a ni. Khawtlang thuneitute leh zirlaite nen tangkawpin faina leh bawlhhlawh paihna siamthat kawngah hma kan sawn hle. Hriselna atan kan in leh lo, vantlang hmun leh bazarte vawngfaia ti thianghlim zui zel tura theihtawp chhuahpuiah mi zawng zawng ka ngen a ni. Mipui mimir tana thuneihna sang zawk kawng buatsaih tur pawhin hma kan la mek a ni.
Mahatma Gandhi National Rural Employment Guarantee Scheme (MGNREGS) pawh hlawhtling taka kalpui mek a ni a. Thingtlang mirethei chhungkuate dawmkan chu kan tih makmawh a nih angin sorkar laipui hnuaia ruahmanna hrang hrang - SGSY, IWMP, IWDP/Hariyali leh BADP te hmangin rethei dawm chhuah hna chak taka kalpui a ni. BADP hmang tangkaiin ramri dep khua te pawhin hmasawnna namen lo an nei mek a ni. District Council 3 te mamawh pawh kan hriat sak reng a, an hmasawnna tur kawng tam tak dap sak an ni.
Kan sum pai dinhmunin nasa taka hma a sawn theih nan Tourism leh a kaihhnawih Industry tih changtlun chu thil remchang tha tak a ni tih kan hria a, chuvangin Mizoram chu khualzin tam tak hip thei State-ah siam kan tum a ni. Ramri dep ram te nena insumdawn tawnna chuan sum leh pai dinhmun ngelngheh leh hmasawnna thui taka a hril theih avangin nasa taka tanlak a ni. Transport tih changtlunna tur pawhin theih tawp kan chhuah mek a. Mizorama Rel kawng siam dan thlithlai turin State Level Task Force din a ni a, Tlawng lui hmang tangkaia lui kawng ruahman pawh kalpui mek niin hmun tam takah zin veivahna hmunhma tih changtlun mek an ni.
Ei leh bar kham khawp chawkluh theihna turin sorkar chuan theih tawp a chhuah a, mipui mamawh buhfai leh nitin eichawp man tlawm zawka hmuh theih nan tanlak mek a ni a. Consumer-te hmakhua humhalh tura kan thutiamah kan ding nghet a, thil man sang khuahkhirh leh nitin mamawh tha tawk hralhchhuah anih theihna turin nasa taka tanlak a ni. Dan leh thupek kenkawh kawngah Judiciary chu mahni kea ding thei tura buatsaih a ni a. Thuchhe rem kawngah pawh rang leh chak taka hmalak kan tum a, hemi atana mamawh leh ruangam tulte buatsaih zel a ni bawk ang.
Kawlphetha kan mamawh phuhruk nan nasa taka kawng dap chhoh mek a ni a. Thingtlanga electric eng la nei lo tih enna tur leh mirethei chhungkua te tana a thlawna eng pek dan turte chu Rajiv Gandhi Grameen Vidyutikaran Yojana (RGGVY) hnuaiah bawhzui mek niin kumin chhung hian zawh hman beisei a ni. State chhunga Hydel Project hrang hrang enkawl zui kawngah mipui leh mimal thawhhona Public Private Partnership chu kalpui ve tum mek a ni bawk. Mipuite mamawh hmasa tui thianghlim in tur hnianghnar taka pek leh inthiarna thianghlim ruahman sak te chu kan thil ngaih pawimawh hmasa zing ami a ni bawk a. Hemi atan hian kawng remchang awm thei apiang dapin mitin hnenah tui thianghlim pek tumin ruahmanna thahnem tak kan kalpui mek a ni. Kumin chhung hian National Rural Drinking Water Programme hnuaiah thingtlang khaw 124 tuam tum a ni.
Kan ramngaw te a chereu sawt em avangin ramngaw humhalh leh thingphun kawngah nasa taka tan lak a tul a. Green Mizoram Programme pawh chak taka kalpui niin thing phun sa te enkawl zui a pawimawh takzet a ni. Kan ramngaw humhalh tur thal laia kangmei laka venghim tu, theihtawp chhuaha an nunna tan hial pawha hlauhawm khawpa kangmei veng tute chungah lawmthu sawi loh theih a ni lo.
March ni 12 ah a rual a Cheraw Kan tam ber ni-a Guinness Book of World Records-ah kan hming a lang thei ta chu kan chhuang hle a, hei hian khawvel hriata min pholan mai bakah mipui mimir thinlungah inunauna leh hnamzia hlut lehzualna a tuh a ni. Hmeichhiate dikna leh chanvo humhalh leh chawikan loh chuan hmasawnna a khingbai thin a, chuvangin hmeichhiate tih chakna turin hmalak mek a ni a. Pianphunga rualban lo te hamthatna tur pawh ngaih pawimawh niin ruahmanna engemawzat kalpui a ni tawh bawk. Natna hrik leh damlohna te hian mipui chungah phurrit nasa tak a siam thin a. Hemi sukiang tur hian Mizoram Health Care Scheme leh RSBY te chu hmet remin kalpui tum mek a ni a. Mi zawng zawng tan Health Care changtlung tak pek ngei pawh kan in beisei tlat a ni.
He ni lawmawm takah hian kan ram leh State bil tana hmasawnna leh changkanna zawh turin inhlan thar theuh ila. Inrelbawlna thianghlim leh chak tello chuan ruahmanna tha leh kalphung duang mah ila mipui mimirin a zar an zo tak tak thei ngai lovang. Hlemhletna leh eirukna engtikawng maha ngaihzam a ni ngai lovang a. Kan inrelbawlna khawl pui ber tichaka tuaithar turin theihtawp kan chhuah ang. Nakin hun duhawm tak nghak thleng tur hian teirei peih leh dawhtheih a tul fo thin.
Lam ho te, zirlai leh mipui vawiina lo kal khawm zawng zawngte chungah lawmthu ka sawi nawn leh a. He kan ram ropui tak inpumkhatna humhalha chhawm nung tur hian rilru i siamthar theuh ang u.
Jai Hind.
