Vawiin chhun khan Aizawl Deputy Commissioner, Dr. Franklin Laltinkhuma kaihhruaiin kumina Independence Day Aizawla hman dan tur chungchang sorkar mi pawimawhten a office-ah an rel.

Vawiin meeting-ah hian Day hmanna tur atan Aizawl Sipai Lammual cheibawl hna kal mek thlirin Rajiv Gandhi Stadium, Mualpuiah nghah zawk a remchan dan tur te an ngaihtuahho a, thu tlukna erawh siam a la ni rihlo. Flag hoisting ceremony chu zing 9:00 ah tan tura rel niin, Ceremonial Parade chungchang chu Aizawl SP kutah dah a ni a, Rehearsal chu August ni 6 atanga tanin, final rehearsal August ni 13 ah neih a ni ang. He ni lawmna tura inbuatsaihna peng hrang hrang mawhphurtu tur ruat fel nghal a ni bawk. Technical Committtee Aizawl SP kaihhruai a din nghal niin, he Committtee hian thil tul zawng zawng a ngaihtuah ang.

Kumin Independence Day pual hian Volleyball leh Basketball (mipa leh hmeichhia) Tournament buatsaih ni se tih vawiin meeting-ah hian rel a ni bawk.