Cheng 163.96 lacs senga dawh Muallungthu leh Khumtung inkar Tuirial Lei chu Nimin 18th July, 2013 chawhnu khan Parl. Secy. Pu Lalthanzara’n a hawng a, Parl. Secy leh bialtu MLA ni bawk Pu KS Thanga’n a tawiawm.

E-in-C Pu Lianchungnunga kaihhruai Lei hawnna ah Khuallian Pu Lal Thanzara, Parl. Secy chuan inkal pawhna pawimawh tak khaw tamtakin an hman tangkai tur Lei tha tak hawn theih a buatsaih tu contractor te leh endik a viltu PWD staff zawng zawng te chungah lawmthu sawiin, mi tam tak tan malsawmna a nih ngei a rin thu a sawi bawk. PWD hmalakna a hmasawnna bung thar kan kai chho leh ta chu lawmawm a tih thu a sawi bawk. Bial hnuchhawn ram ni thin in hmasawnna duhawm tak a hmuh chho mek chu lawmawm a tih thu sawiin a bialtu MLA hmalakna leh tan lakna fakawm a tih thu a sawi tel bawk. Tunah hian Tuivai Lei chu CM zahawm takin a hawn atana buatsaih mek anih thu a sawi a. Calcutta New town ah PWD hmalakna in cancer vei te tana thlenna tur Mizoram House chu hawn mai theih tura buatsaih a nih thu a sawi tel bawk.

Khualzahawm leh Bialtu MLA ni bawk Pu KS Thanga chuan a bialin hmasawnna hmel thar duhawm tak a hmu chho zel chu lawmawm a tih thu sawi a. Agriculture, Horticulture leh zirna lamah te hmasawnna a bial chhungin a hmuh zel avangin hmasawnna thlenna atan a mawhphurtu te zawng zawng chungah lawmthu a sawi a. Tuna an mu tan mek Sailam kawng leh Hmuifang - Chawilung PMGSY hnuaia laih tawh la blacktop loh te chu blacktop thuai anih dawn avangin lawmawm a tih thu a sawi bawk. A bial chhung mipui te chu hmasawnna in a bawh mek chu hmachhawn thei tur a lo inbuatsaih turin a chah bawk.

Chief Engineer(Roads), PWD Pu R.Vanlaltluanga chuan he Lei sak dan Technical report a pe a. Tuirial Lei hi Muallungthu- Khumtung inkar 14kmp a awm a ni a. Lei dawh hna hi Mechfab Engineering Industries Pvt. LTD.,Gurgaon, Haryana te thawh a ni a, sum sen zat chu Rs. 163.96 lakhs a ni. He lei dawh hna hi November, 2009 ah thawh tan niin March, 2013 khan motor zawh theih tura dawh zawh a ni. He Lei sei zawng hi 48.60m niin, a san zawng hi 5.60m ani.

Tuirial Lei hawnna programme hi Parl. Secy pahnih Pu S.Laldingliana leh Pu. Col.ZS Zuala bakah Lunglei High Power Committee Vice Chairman Pu Joseph Lalhlimpuia ten an hmanpui bawk.