Kan ram zalenna champha vawi 67-na ni ropui takah hian in hmaa thu ka sawi theih avangin lawmawm ka ti tak zet a, he ni lawmawm takah hian Mizoram mipui zawng zawngte chibai ka buk a che u.

Kum sawmruk pariat kalta, he ni ropui taka kan hnam puanzar mawi tak zarpharh a nih khan, inawpbehna thlazar hnuai atangin kan hnam ropui tak chu lo piangin, inpekna leh thawhrimna hmangin hnam zalen ah a rawn ding chhuak ta a ni. Zalenna sual chhuah nana hnam pa ten tharum tel lova hma an lo lak dan kha a dangdai hle. Tharum thawh leh thisen chhuahna tel miah lova inawpbehna rorelna hnuai atanga hnam-in zalenna a sual chhuah dan chanchin hi khawvel chanchina thleng hmasa ber a ni hial mai thei. Hei hian kan hnam hi huatna nilovin muanna leh khawngaihna ah a innghat tlat a ni tih a tilang a ni. Ahimsa - hmanraw thiltithei tak chuan khawvel pumah pawnlam ram dang awpna atanga zalenna sual chhuak turin a chawk tho nasa hle a ni.

Vawiin ni ah hian kan ram zalenna sualtu hruaitu hmasa te - Mahatma Gandhi, Pandit Jawaharlal Nehru, Sardar Vallabhbhai Patel leh midang te, leh khawmual sipai zawng zawng te inpekna sang tak leh inhlanna te hre tharin mimal tin hnenah zahna i hlan ang u. An tumruhna, huaisenna leh thawhrimna zarah vawiinah keinin kan hnam ropuina kan rochung a, mipui rorelna nghet leh thangduang tak khua leh tui niin khawvel puma ram ropui leh zahawm takah kan cheng mek a ni.

August ni 15 hi kan zavaia tan ni pawimawh tak a ni a. Ram zalena kan din chhuahna ni, ram dang awpbehna atanga kan chhuahna hun ropui tak a ni. He ni hi kan za atan ni chhuanawm leh chhinchhiahtlak a ni a. Kan ram ropui tak innghahna thurin hre rengin, tawngka mai nilovin kan nitin nunah i nunchhuahpui zel ang u.

He ni ropui takah hian kum kalta chhunga kan Sorkar hmalakna thenkhat chauh leh ruahmanna chhawp thenkhat han tarlan ka duh a.

1. Dan leh thupek kenkawh leh Mizoram mipuite himna vawn that hi Sorkar ngaihpawimawh ber te zinga mi a ni reng fo a. Ram puma state ralmuang ber kan nihna vawng him tura khawtlang leh tlawmngai pawl ten dan kengkawhtu te an thawhpuina leh tawiawmna avangin an chungah tih tak zetin lawmthu ka sawi a ni. Police thuam changtlunna hnuaiah tunlai hmanraw changkang leh ralthuam, Glock 19 Pistol 300, MP5 A-3 Small Machine Gun (SMG) 50 leh Colt M-4 Carbine 200 lai leiin Mizoram Police te thuam chak mek an ni a. State Assembly leh Parliamentary (Lok Sabha leh Rajya Sabha) inthlanna te tluang takin neih a ni a, inthlanna thianghlim leh felfai a awm theih nana khawtlang pawl hrang hrangte hmalakna kha a chhuanawm tak zet a ni. National Crime Records Bureau (NCRB) kaihhruaina hnuaiah CID Crime chuan Crime and Criminal Tracking Network System (CCTNS) Project chu chak takin a thawk chho mek a ni. CCTNS Project tihhlawhtlin nan a hmunhma buatsaih fel leh hmanrua bunfel hna te chu Mizoram puma hmun 94 ah (Police Station 40 leh Office sang zawk 54) zawh fel a ni tawh a ni. Heng zinga hmun 64 te chu inthlun zawmin hman theih turin enchhin a ni tawh a. Kum 10 kalta chhunga Case 11,000 files te chu digitization tih zawh tawh a ni. Hei hi endikmek a ni. SP CID hnuaia Economic Offences Wing (EOW), Anti Human Trafficking Unit (AHTU) leh Cyber Crime Cell din te chuan dan bawhchhiatna veng turin hna an thawk tha hle a ni.

2. Mipui mimir khawsak phung thlakthleng dawrhtir tura duan flagship programme - New Land Use Policy (NLUP) chu State Sorkar chuan chak takin a kalpui reng a. Rah tha zawk a chhuah theih nan a tul anga tihdanglama siamrem a ni. Kum thum kalta chhung khan, a tira ruahman zat beneficiary 1,20,000 zet chu Sorkar chuan phase 3 ah thenin a khung vek a, heng bakah hian beneficiary 15,000 te chu khung tel tura ruahman niin chhungkua 10,000 chu thlan fel an ni tawh nghe nghe a, tihian NLUP chuan chhungkua 1,35,000 a khuh dawn ta a ni. Kum 2015-2016 atanga kum 5 chhung NLUP pawhsei nan NLUP Apex Board chuan additional project buatsaih a rel a. Sorkar Laipui hnuaia agency hrang hrang - NABARD, APEDA, etc te pawh thawhpui tum a ni bawk.

Eizawnna puitling hma chi hmunphiah chin te, ran vulh leh sumdawnna tenau lamah te rah duhawm tak hmuh tur a awm a, hei hian beneficiary te sum thawhchhuah a tipung nasa em em a ni. Loneitu tam tak te tan eizawnna ngelnghet zawk a ruahmansak avangin NLUP hian thingtlang mite eizawnna leh sumpai dinhmun nasa takin a thantir a ni. Thingtlang lo neih tlahniam zel hian State puma NLUP hlawhtlinna a tarlang a ni. Kum 2014 hian khaw tam tak chuan thingtlang lo neih an bansan tawh a. NABARD Consultancy Services (NABCONS) Ltd., pawnlam atanga endiktu (third party monitoring agency) chuan Mid Term Assessment an neihna ah convergence, financial inclusion, sum hman leh enkawl, leh beneficiary te sum lakluh tihpun tanpuina ah, he hun tawi te chhung hian hmalakna a hlawhtling niin an ngai a. Kum 2014-2015 atang chuan a hralhchhuahna lamah uar zawka kalpui tura ruahman a ni. United Nations hnuaia agency hrang hrang - Food & Agricultural Organization (FAO), United Nations Development Programme (UNDP), United Nations Industrial Development Organization (UNIDO), International Labour Organization leh International Fund for Agricultural Development (IFAD) te nen thawhho dan tur te ruahman mek niin hemi atan hian UN Mission Project pawh buatsaih a ni tawh bawk a ni.

3. Inkalpawhna hi hmasawnna tehna pawimawh tak pakhat a ni tih hriain hemi lamah hian chak taka hmalak mek a ni a. Pradhan Mantri Gram Sadak Yojana (PMGSY) hnuaiah kum 2013-2014 chhung khan kawng 44 kms laih zawh niin 31.47 kms blacktopping a ni bawk. Hemi hun chhung vek hian khaw 24 tan kawngpui siam zawh a ni bawk a. Cheng 284.57 vbc senna tur kawng 415 kms-a thui phahna tur hna thar 29 te chu thawh mek a ni bawk. NABARD hnuaiah 80 kms-a thui, sum cheng 43.14 vbc senna tur W.Phaileng- Marpara kawngpui siamthat hna pawh thawh chhoh mek a ni a. Heng bakah hian cheng 19.71 vbc senna tur Muallungthu-Khumtung kawngpui (111.60 - 33.50kmp) chhuatphahna tur sanction fel a ni tawh. Mizoram State Roads - II Regional Connectivity Project tana ruahman cheng 672.82 vbc pawh Administrative Approval pek fel a ni tawh a. He project hnuaia Champhai - Zokhawthar kawng (27.28 kms); Tlabung - Kawrpuichhuah kawng (12 kms) leh Chhumkhum - Chawngte kawng (41.53 kms) siam hna pawh rei lo te ah tan thuai tum a ni. Serchhip - Buarpui kawng, Asian Development Bank hnuaia cheng 259.20 vbc senga chei that tur pawh bultan turin peih fel a ni tawh. JNNURM hnuaiah Aizawl khawpui kawngpui 46 kms siamthatna tur, cheng 38.73 vbc senna tur pawh thawh mek niin tunah hian 83 % zawh tawh a ni a, reilote ah zawh fel beisei a ni. Kum 2013-2014 chhung khan North Eastern Council (NEC) atanga sum hmuh hmangin Saitual - Phullen kawng (60 kms), Mamit - Bairabi kawng (37 kms) leh Keitum - Artahkawn kawng (34 kms) siamthat hna te leh Tlabung - Kawrpuichhuah kawng (16.42 kms) siam hna te thawh zawh a ni a. Ministry of Road, Transport & Highway atanga sum hmuh hunah project thar pahnih - Tuipui - Biate kawng (cheng nuai 880) leh Aizawl - Reiek - W.Lungdar kawng (cheng nuai 1156) siamthat hna te pawh thawh tan tura ruahman a ni. Kaladan Multi Modal Project hnuaiah, Mizoram chhung china kawngpui awm 99.83 kms ah formation cutting 35 kms zawh fel a ni tawh a, project thawh tan atanga vawiin thlenga kawng siam zawh tawh chu 81.50 kms a ni. Kum 2013-2014 chhunga building project 67 thawh mek leh project thar 6 zingah building 24 sak zawh a ni tawh bawk.

4. Sumpai dinhmun hmasawnna atan kawlphetha hi thil tul a ni tih kan hria a, kan kawlphetha siamchhuah tipung turin hydel project leh kawng dangah kan dap kual mek reng a. Khuangthing bula 5MW Tlawva Small Hydel Project te, Tuiriza leh Tuiching-a 100KW ve ve Hydel Project te leh 3.5MW Kawlbem SHP siam hna te chu thawh mek niin reilo te ah commission theih beisei an ni. Hetih lai hian NEEPCO-in 60MW Tuirial Hydel Project an thawh mek pawh tluang takin a kal chho zel a, nakumah commission theih beisei a ni. Zawh fel hunah chuan Tuirial Hydel Project hian state kawlphetha siamchhuah leh sorkar sum thawhchhuah nasa takin a tipung dawn a ni. Kawlphetha thawn darhna tihchangtlun nan hmalak mek a ni a, Kolasib atanga Aizawl inkara 132kV line te, Luangmual Sub-Station atanga Melriat Sub-Station leh Melriat Sub-Station atanga Lunglei 110 kV line siam hna te thawh mek a ni. 2x12.5MVA Sub-Station, Melriat, 2x12.5MVA Sub-Station thar, Zuangtui, 1x12.5MVA Sub-Station, Sihhmui siam hna te leh Luangmual Sub-Station-a 1x12.5MVA transformer dah belh hna thawh mek te hi zawh fel a nih hunah kawlphetha inthlunzawmna leh thawn darhna a tichangtlung hle dawn a ni.

Rural Electrification Corporation chuan XII Plan of RGGVY hnuaiah cheng 77.03 vbc senna tur Rural Electricity Distribution Backbone (REDB) project district 8 te tan a ruahman a. Aggregate Technical & Commercial Loss (kawlphetha hloh) 15% vela tihhniam nan Department chuan Ministry of Power hnuaiah Re-structured Accelerated Power Development & Reform Programme (R-APDRP), khaw 9 - Aizawl, Champhai, Khawzawl, Kolasib, Lawngtlai, Lunglei, Saitual, Saiha leh Serchhip khua te tan a thawk mek a ni.

5. Mitin tana tui in tur thianghlim ruahmansak hi Sorkar ngaihpawimawh ber te zinga mi a ni a. Kum 2013-2014 chhung khan Public Health Engineering (PHE) Department chuan NRDWP hnuaiah thingtlang khaw 57 te tan tui in tur a siamsak a, nakum chhung hian khaw 52 tan thawh zawm tum a ni bawk. Mizoram hmun hrang hrangah SPA hnuaiah PHE Department chuan project 7 thawh nan cheng nuai 1192 a ruahman a ni. Non Lapsable Central Pool of Resources (NLCPR) hnuaiah PHED chuan scheme 10 a thawk mek a, heng zinga scheme 7 chu 80% thawh zawh tawh niin, Ministry of Development of North Eastern Region (DoNER) atanga sum hmuh dan azirin reilo te ah commission theih beisei an ni. Ministry of Urban Development hnuaiah PHED-in scheme 3 a thawh mek chu tluang takin a kal chho mek a. Department-in NEC sum hmanga project 6 a thawh mek zingah scheme 3 te chu 80% thawh zawh tawh an ni bawk.

6. Zirna tha leh changtlung zawk siam turin Sorkar chuan a bei mek a. National Achievement Survey (Cycle 3) for Class III Level 2012-2013 results tunhnaia kan hriat atang khan Mizoram chuan subject 2 - Language (Mizo) leh Mathematics ah hlawhtlinna ropui tak kan nei a. Teacher Education Advisory Board (TEAB) chuan District Resource Centre (DRC) 6 te chu District Insititute of Education (DIET)-ah hlankai a rel tawh a, kum 2014-2015 ah an thawk tan dawn a ni. Hnam tlem zawk te tan Chawngte, Tlabung leh West Phaileng ah Block Institute of Teacher Education (BITE) 3 din turin pawm fel a ni tawh. Guidelines on Restructuring & Reorganization of the Centrally Sponsored Scheme on Teacher Education-in a duan anga SCERT-in hma a lak theih nana a tul anga siamthat sorkar chuan a pawm fel tawh a. SCERT Aizawl ah EDUSAT Hub thar bun fel ni tawhin, Mizoram EDUSAT Network bultan nan Mizoram puma school leh BRC hrang hrangah Satellite Interactive Terminals (SITs) 50 commissioned a ni tawh bawk.

SSA hnuaiah kumin hian zirlai 1,71,075 hnenah zirlaibu a thlawnin pek an ni a, zirlai 1,63,393 hnenah school uniform set 2 theuh pek niin naupang rualbanlo 7,650 hnenah an mamawh hmanrua chi hrang hrang a thlawnin pek an ni bawk. RMSA-in hmanrua ruhrel tihchangtlunna lian tak a thawh mekah vawiin thlengin secondary school 88 sak thar a ni. Chhingchhip-a Sainik School sak hna pawh chak takin thawh mek a ni a, a hman theih hunah chuan Mizo thalai te sipaia an luhna tur kawng a hawng dawn a ni. Kumin chhung hian tlangval 211 ten sipai an zawm a. Lawngtlai leh Lunglei district ah ziak leh chhiar thiamlo tan beihpui (Special Literacy Drive) thlak a ni bawk.

7. DoNER sum hmangin college tihchangtlun hna thawh mek a ni a. Cheng nuai 141.39 sengin Post Matric Students Hostel, Aizawl ah sak zawh a ni. State Priority Project for 2013-2014 hnuaiah cheng nuai 222.22 senna tur Lunglei Govt. College auditorium sak te, cheng nuai 300 senna tur Govt. Aizawl College New Campus, Mualpui-a Commerce Department tana academic building sak leh cheng nuai 144.44 senga Library building, Govt. Zirtiri Residential Science College Campus, Durtlang- a sak hna te thawh mek a ni a. Centrally Sponsored Schemes hnuaiah Champhai leh Kolasib ah Polytechnic thar sak pawh zawh fel tawh a ni. Deficit Grant in Aid College pahnih - Mizoram Law College, Aizawl leh Kamlanagar College, Chawngte te chu ni 19 Sept. 2013 khan provincialised an ni. Zirna lama scheme thar - Rashtriya Uchchatar Shiksha Abhiyan (RUSA) bawhzui turin Mizoram State Education Council din thar a ni bawk.

8. Mitin hriselna leh chumi atana kailawn chhawpchhuah te kan zawhkim Sorkar chuan a duh a, hemi atan hian kan inpe tlat a ni. Hun rei tak ata Medical College kan lo awh em em thin chu tun atanga reilo te ah tihpuitlinin a awm dawn a ni. A rang lama Mizoram Institute of Medical Education & Research hawn thuai a nih theih nan committee hrang hrang te din a ni a, he college hi State Referral Hospital Complex, Falkawn ah awmin zirlai 50 awm thei tura ruahman a ni. General Nursing & Midwifery (GNM) School 4 - Serchhip, Kolasib, Champhai leh Saiha ah te leh Lawngtlai ah ANM School te din turin hma lak tan mek a ni a, State Referral Hospital, Falkawn ah leh Champhai, Serchhip, Mamit leh Lawngtlai District Hospital ah te Solar power plant bun fel a ni tawh bawk. Khum 40 nei Mizoram Cancer Hospital chu khum 100 awmna Tertiary Cancer Centre ah hlankai tum a ni a, hmanrua pawimawh tak tak - Blood component separator, Tissue processor, Big Bore CT Scan with simulator and fully Motorised Microtome khawl te bun fel tawh niin cancer vei damlo te buaipui leh enkawl nan hman an ni.

Cheng nuai 466.51 sengin Civil Hospital, Aizawl ah Development & Implementation of Computerised Hospital Management Information System (HMIS) bun fel a ni. Civil Hospital-a Cardiology Department chu cheng nuai 499 sengin tihchangtlun a ni bawk. Hospital 5 tan Sterilization system cheng nuai 300 senga lei niin bun fel a ni. 13th Finance Commission Grant hnuaiah Primary Health Centre (PHC) 4 leh Sub Centre 25 sak nan kum 2013-14 chhung khan cheng 7.5 vbc dawn a ni. District tinah Ayush facilities tihchangtlun a ni a, Thenzawl ah Ayush Hospital (khum 50) sak mek a ni bawk.

9. Mizoram infiammi ten ram chhunga infiam mi dang te anga inbuatsaihna tha an neiha, state tan lawmman an rawn hawn theih nan sports tihchangtlun zel chu dah pawimawhin theihtawpin kan thawk reng a. Kumin-a Santosh Trophy leh Dr T.Ao Memorial Football Tournament-a champion football team te hnenah tun hunah hian lawmthu ka sawi duh a ni. Kum 2016 Olympics ah Mizo te India Olympic Team-a an tel ve ngei theih nan Olympic Vision 2016 din a ni a, rah duhawm tak kan hmu chho mek a ni. NEC atanga sum dawn hmangin Saidan, Kolasib ah Regional Sports Training Centre sak a ni a, NLCPR atanga sum hmuh cheng nuai 1,128.16 sengin Sihhmui ah Cricket Stadium sak a ni bawk. Mizoram hmar lam tan Darlawn ah Multipurpose Sports Centre sakna atan cheng nuai 359.17 leh khawthlang tan Hachhek bial ah Sports Infrastructure Development thawh nan cheng nuai 489.86 chu NEC chuan a pawm fel tawh a, heng project te hi reilo te ah tan theih beisei a ni. Champhai Zotlang leh Lunglei Serkawn-a stadium puitling sak te chu hman mek a ni a, thalai te mamawh phuhruk nan a tangkai hle a ni. Mizorama Hockey Astroturf hmasa ber chu Urban Sports Infrastructure Scheme hnuaiah Hockey Boy’s Academy, Kawnpui, Kolasib District ah phah zawh a ni tawh. Khawvel pum huap, rampum huap leh helai bial level-a intihsiakna hrang hrangah Mizoram player te chuan medal 257 an rawn hawn tawh a, chung zinga 88 chu Gold Medal a ni nghe nghe a ni. Heng infiammi te hlawhtlinna hian ram pum infiamna chanchin ah Mizoram chu a chuan kai tir ve ta a ni.

10. The Mizoram Building & Other Construction Workers Welfare Board chu tluang takin a kal ve zel a. A dintirh atang khan, hamthatna scheme hrang hrang tihhlawhtlin na atan cheng 19,84,65,935 /- lai a la khawm tawh a ni. Board hnuaia Mizo kuthnathawk 21,525 inziaklut zingah mi 16,383 te chu tanpuina sum pek an ni. Labour Employment & Industrial Training Department leh Mizoram Youth Commission te tangkawpin Skill Fest hmasa ber, ni 4-5 June 2014 khan an huaihawt a, hetah hian hna zawng tu mi 10,000 chuang an tel a, chung zinga thalai 2,855 te chuan Mizoram chhung leh state pawnlama hna thawk thei tura an thiamna intuaihriam an duh thu an sawi a ni. Serchhip leh Champhai ah Industrial Training Institute thar din turin sanction pek fel a ni tawh bawk.

11. Khawpui leh thingtlang hmasawnna hi rualkhai taka a kal a tul a, chutilo chuan hmasawnna hi a tluantling thei thin lo a ni. Mahatma Gandhi National Rural Employment Guarantee Scheme (MGNREGS) chu Mizoram district 8 ah kalpui mek a ni a, hemi hmang hian chhungkaw tina kuthnathawktu chu nitin cheng 173 /- zela chhutin kum khatah ni 100 tal inhlawhna siamsak an ni. Hemi atan hian kum 2013-2014 chhung khan Sorkar Laipuiin cheng nuai 24,505.081 rawn pein State Sorkarin cheng nuai 1,194.694 a thawh bawk a ni. Hemi hun chhung vek hian tha 139,67,687 sen a ni bawk. Indira Awas Yojana (IAY) hnuaiah vawiin thlengin In 3,624 sak a ni tawh a. Integrated Watershed Management Programme (IWMP) hnuaiah kum 2013-2014 chhung khan 10,781 hectares-a zau lei tihhnawn a ni a, tui khawl nan 9,240 hectares siamin thingphun leh thlai chin nan 12,321 hectares ah kutthlak a ni bawk.

Serchhip leh Kolasib District-a Mizoram State Rural Livelihood Mission (MzSRLM) thawh mek hmangin Serchhip, E.Lungdar, Thingdawl leh Bilkhawthlir R.D. Block huama khaw 27 ah hmalak a ni a. NRLM hnuaiah Self Help Group (SHG) 500 chuang dahluh niin SHGs 260 din thar a ni bawk. SHG tin atana Revolving Fund @ cheng 10,000 /- chu SHG 315-in an chhawr tawh a. Aizawl leh Lunglei District-a North East Rural Livelihood Project (NERLP) kalpui mek ah Aizawl District ah khaw 40 leh Lunglei District ah khaw 60 ah hmalak a ni. Lawngtlai leh Saiha District ah Backward Region Grant Fund hnuaiah hmasawnna hna 502 thawh a ni bawk. Ramri hmuna hmasawnna hna chi hrang hrang 419 thawh nan Border Area Development Programme (BADP) hnuaiah cheng nuai 4,016.63 sanctioned a ni tawh bawk.

12. JNNURM hnuaia Urban Infrastructure leh Governance kaltlangin Aizawl Greater Water Supply Scheme, Phase I tihchangtlun mek a ni a, kumin chhungin he hna hi zawhfel beisei a ni. Mi harsa zawkte (Economically Weaker Sections) tana chenna in sak hna kalpui mek zawhfel a nih hunah chhungkua 3046 tan chenna in siamsak an ni ang. Sorkar Laipui chuan Urban Infrastructure Development Scheme for Small and Medium Towns (UIDSSMT) hnuaiah Lunglei leh Serchhip-a cheng ten tui in tur hnianghnar zawk an neih theih nan project pahnih – Augmentation of Greater Lunglei Water Supply Scheme cheng (nuai 867.44) leh Augmentation of Greater Serchhip Water Supply Scheme cheng (nuai 687.60) te chu pawmin a rawn sanction tawh bawk. Ministry of Urban Development leh Ministry of Housing & Urban Poverty Alleviation kaltlanga sum za zelah 10 Hmarchhak state tana dah hran (Lumpsum Grant) atangin tun thleng hian project 17 cheng 220.90 vbc sengin zawh fel a ni tawh a. Cheng 186.53 vbc senna tur project 14 tunah hian thawh mek a ni. Mizorama khawpui awm zawng zawng 23 te tuamtir ve turin hma lak mek a ni. Aizawl khawpui tui lakna, thli leh bawlhhlawh senghawina / sawngbawlna siamthat nana ruahmanna – North East Region Capital Cities Development Investment Programme (NERCCDIP) hnuaiah project engemaw zat zawhfel ni tawhin a dang engemaw zat kalpui mek a ni.

13. Lo neih hi eizawnna tlak leh ngelngheta siam turin Sorkar chuan theihtawpin hma a la mek a. Thingtlang lo neih bansana buh chin dan hlawk zawk te, buh chinna hmun zauh te, Line Planting leh tlangrama lo neih dan tha zawk te inkawhhmuhin tan lak chhoh mek a ni a. Hlawk zawka buh leh thlai thar a nih theih nan leh hunbi dik taka chin a nih theih nan khawl chi hrang hrang - power tiller, tui pump hman leh Farm Machinery Banks din te uar chhoh mek a ni.

Wet Rice Cultivation (WRC) atanga buh tharchhuah, hectare khata 2.09 MT ni thin chu 2.20 MT ah a pung chho a, hei hi buh chi tha leh hmanraw changkang/tunlai thiamna te hman vang niin a lang. Kum 2013-2014 chhung khan hectare 4532 ah Oil Palm chin thar a ni a, hemi chhut tel hian Oil Palm chin nana hman zawng zawng chu hectare 17,588 a ni. Bukvannei, Kolasib District-ah oil palm hriak herchhuahna Oil Palm Mill, darkar khata hriak 5 MT herchhuak thei chu sak zawh a ni tawh a, tun atanga reilo te ah Mill hi hawn a ni ang. Lunglei leh Serchhip ah Oil Palm Mill dang pahnih din turin hma lak mek a ni bawk. Loneitu ten sum tlemte senga khawl/hmanrua an hman tlan theih nan RKVY hnuaiah Champhai, Aizawl, Lunglei leh Serchhip District ah te Farm Machinery Bank 7 hawn a ni tawh a. Hei hian lo ram buatsaih, thlai chin leh buh sengna kawngah te nasa takin a tanpui dawn a ni.

14. NLUP bultan atangin thlai leh thei chingtu beneficiaries 23,828 hnenah cheng 146.02 vbc sem a ni tawh a, thlai thar tihpun nan tui enkawl dan dik te, tui pek dan te, plastic mulching te, Integrated Nutrient Management (lei tha enkawl dan te), leh Integrated Pest Management (rannung enkawl dan) te huap zau taka kalpui mek a ni. Kolasib District-a loneitu te mamawh phuhruk nan Thingdawl ah Centre of Excellence din mek a ni.

15. Mizorama Vawk tihpun nan vawkpui 200 dah theihna tur Piglet Multiplication Farm, Thingsulthliah ah leh vawk chi tha zawk vulh nan Regional Boar Semen Station, Selesih, Aizawl ah sak mek an ni. Bawnghnute tharchhuah pung chho awmze nei zawka sawngbawl leh hralhchhuah a nih theih nan Indigenous Milk Product Manufacturing Plant, nitin litre 5000 sawngbawl thei chu MULCO ah sak mek a ni. Ran chaw mamawhna pung chho mek phuhruk nan department chuan khaw 136 ah ram hectare 680-a zau ah ran chaw chinna a enkawl mek a ni bawk.

NLUP hnuaiah kumin hian chhungkaw 1380-in maimaw pangang khawi an thlang a. North East Textile Promotion Scheme hnuaiah silk tha chi 3A Grade siamchhuak turin Bivoltine Cluster Project hmingin Aizawl ah pangang khawitu 300 leh Lunglei ah pangang khawitu 100 ten an thawk mek a ni. Pangang khawitu 150 khuhin Kolasib District ah kumin hian Muga Cluster Project tan a ni a, RKVY Scheme hnuaiah chhungkaw dang 100 ten MUGA Sericulture an thawk ve leh dawn a ni.

Sangha note nuai 412 chu sangha khawitu te hnenah sem a ni a, heng zinga nuai 37 chu Sawrkar enkawl sangha chi farm te tharchhuah a ni. Kum 2013-14 khan sangha 5,940 MT tharchhuah a ni. Kum 2013-14 chhung khan NLUP beneficiary ten hmunphiah 2,852 MT chuang an tharchhuah atangin cheng nuai 1,426 dawn an hmu a. Rubber Plantation pawh ngaihpawimawh niin kum kalta chhung khan nursery thar 10 siam a ni. Hmalam kum 15 chhunga puitling turin ram hectare 46,000 ah rubber chin dan ruahmanna duan mek a ni.

16. Zuangtui Industrial Area ah unit 150 leh Lengte Export Promotion Industrial Park ah unit 24 te hnenah Industrial Plot pek an ni tawh a. Mau leh food processing sector tihchangtlun hna chu uar taka kalpui mek a ni a, hemi lama tui mi leh kut themthiamte khawhawi tihzau nan len inzir nan exposure tour leh training te neihpui an ni. Kut them thiam thil tihhmasawnna pawh chak takin thawh mek a ni a. State Level Committee for Implementation of Technology Upgradation chu din fel tawh niin hemi kaltlang hian puantah khawl tha zawk mi 1130 te hnenah pek tum a ni. Tual tah puan chawikanna programme Revised Revival, Reforms & Restructuring Package chu kalpui mek a ni. Puantahtu ten Weavers’ Credit Card hnuaia hamthatna an dawn ve theih nan Weavers’ Photo Identity Card pekchhuah mek a ni a, mi 1000 pek turah mi 770 hnenah Card hi pek an ni tawh a ni.

Leihnuai hausakna zawn leh haichhuahna chak taka kalpui a nih theih nan Sorkar chuan theihtawpin hma a la mek a. Oil India Limited chuan tunhnai khan Maubuang, Aizawl District ah leiverh hna an thawk tan a, Keifang leh Thenzawl ah te pawh leiverh hna hi tan thuai beisei a ni. Sawrkar chuan an hnathawh chak dan te uluk takin a vil reng a ni.

17. Sorkar in mipui rawng a bawlna kawnga kalphung tha zawk siam nan Information Technology hi hmanraw pawimawh tak a ni a, IT hman tangkai hian mipui ten Sorkar kalhmang leh hna thawh an thlir dan a tha zawngin a her danglam vek thei a ni. Mipui ten Sorkara an dil leh dawrna chi hrang hrang - residential certificate, tribal certificate, income certificate leh thil dang te awlsam zawka kalpui a nih theih nan Mizoram pumah public service delivery centre 436 din chhoh mek a ni a, heng zinga 136 chu Common Service Centre (CSC) Scheme hnuaia din tur niin a dang 300 chu Rural Information Kiosk (RIK) Scheme hnuaia din tur te an ni. Aizawl District chhunga CSC te hi hman tan tawh a ni. Department chuan e-Governance service 31 mipui te a pe chhuak thei tawh a, e-Governance service dang 57 chu kumin 2014 tawp lamah pek chhuah tum a ni. IT tihchangtlunna pawimawh tak State Wide Area Network (SWAN) chu Department chuan a din tawh a, tunhnai khan State Data Centre(SDC) chu hawn a ni bawk.

18. Myanmar nena ramri hrula insumdawn tawnna atan Champhai District-ah Farkawn leh Vaphai ah te leh, Lawngtlai District ah Sangau ah te Border Trade Centre sak mek a ni. Sorkar Laipui, Ministry of Commerce chuan Lawngtlai ah Trade Facilitation Centre sak nan cheng 4.32 vbc a rawn ruahman atangin June 2014 khan cheng 2.16 vbc min rawn pe a, hna thawh tan thuai tum a ni. Seling-ah Research & Development-cum-Training-cum Food Processing Centre (R&D Centre) sak mek a ni a, hemi atan hian 1st Instalment cheng 2.5 vbc chu released a ni tawh a. Thenzawl ah Food Testing Laboratory sak zawh a ni tawh a, hmanrua tul lei nan hma lak mek a ni.

19. Sum harsatna leh buhfai duhkhawp allotment hmuh lohna karah Food, Civil Supplies & Consumer Affairs Department chuan mipui hnenah rualkhai takin buhfai a la sem chhunzawm thei zel a. Hei hi Department-in theihtawp chhuaha, uluk taka buhfai phurh leh semchhuah a vil reng vang a ni. Ration card computerization hna End to End Computerization of Targeted Public Distribution System (TPDS) chu chak taka kalpui mek a ni a, ration card 66.90% chu computerized a ni tawh. He hna hi zawhfel a nih hunah chuan ration card lem leh diklo te tihbo nan a tangkaiin buhfai tihchingpen thlengin a veng dawn a ni.

Eirawngbawlna gas indaihlohna vanga harsatna chu Department chuan a hria a, Mizorama gas tihchingpen, chheprelh leh a black-a hralhruk ven nan theihtawp a chhuah reng a ni. Hemi kawngah hian Sorkarin eirawngbawlna gas semchhuahna kawngah thuneihna engemaw chen a neih theih nan Department chuan Essential Commodities Act, 1995 siamthat rawtna a siam a. 5 Mega Tonne capacity LPG Bottling Plant leh petrol leh oil dahkhawlna tur Fuel Depot siam a nih theih nan Department chuan Indian Oil Corporation a dawr mek bawk a ni.

20. Cooperative hmalakna zau zel hi state mipuite leh member te sumpai dinhmun tihhmasawnna atan a tangkai hle a. National Cooperative Development Corporation (NCDC)-in a project pumpui tana cheng 45.33 vbc a ruahmanna hnuaiah Mizoram district panga (5)-ah Integrated Cooperative Development Project (ICDP) kalpui turin hmalak mek a ni a. He project atan hian kum 2014-2015 atan Mizoram Sorkar chuan cheng nuai 560 a ruahman a ni. Sorkar laipui hmalakna hnuaia Revival Package for Handloom atangin Mizorama Primary Handloom Weavers’ Cooperative Societies 70 thlanchhuah an ni a, an sum hloh leh leiba tlingkhawm rulh fel nan cheng 2,17,29,609/- pek an ni bawk.

21. Village Forest Development Committees leh Sorkar agency te tangkawp hmalakna-in National Afforestation Programme (NAP) hnuaiah ram hectare 50,000 ah thing chi hrang hrang phuna enkawl a ni a. Mizoram ah ramngaw tha zawk a awm theih nana hmala tu Green Mizoram Programme hmingin kum 1999-a din a nih atang khan thing tiak nuai 20 chuang phun a ni tawh a. Kumin hian thing tiak 5,38,246 chu phun tura sem a ni. National Bamboo Mission (NBM) hnuaiah hectare 50,000 chuanga zau ramngaw leh ngaw lo (forest and non-forest areas) ah pawh mau phun hna kalpui a ni bawk.

22. Naupangte chanvo humhalh turin Mizoram State Commission for Protection of Child Rights din a ni a. Hmeichhiate chawikanna tur leh hamthatna tur hrang hrang ngaihtuah turin State Resource Centre for Women din a ni bawk. BPL chhungkuaa naupang 180 zirlai awm theihna Eklavya Model Residential School chu Lungleiah din a ni a, hetiang school hi Serchhip ah sak mek a ni bawk. Saitual, Lunglei, Thenzawl, KM High School, Dawrpui Vengthar, Aizawl leh KVM High School, Chhinga Veng, Aizawl-ah te Tribal Girls Hostel sak mek a ni bawk. Hmasawnna rualkhai a awm theih nan Mamit leh Lawngtlai District-ah Multi Sectoral Development Programme (MSDP) kalpui mek a ni.

23. District pariat ah High Security Registration Plates vuah hna kalpui niin, vawiin thleng hian lirthei 56,387-ah High Security Plate hi vuah a ni tawh a. District tinah motor Smart Card registration kalpui niin tun thleng hian motor 65,031 register a ni tawh bawk. JNNURM hnuaia Urban Bus 17 lei tawh belhchhah nan Urban Bus 70 dang lei belh turin hmalak mek a ni bawk. Bairabi – Sairang rel kawng siam hna thawh tan thuai a nih theih nan Sawrkar chuan theihtawp a chhuah mek reng a ni.

24. District tina Emergency Operation Centre-ah chhanchhuahna hmanrua hrang hrang dah a ni tawh a. Chhiatrupna lo thlena chhanchhuah hna thawk turin police 424 te chu State Disaster Response Force ti- vuahin training pek an ni tawh a. National School Safety Plan (NSSP) hnuaiah Rapid Visual Survey-te, School Disaster Management Plan leh Mock Drill-te school 400 thlanchhuahah neihpui a ni tawh bawk. Ramhlun Sports Complex thlang leimin tuarte chhawmdawlna leh chenna in tur ruahmanna Layout Plan siam fel niin helai hmuna kalkawng siam hna te thawh mek a ni bawk.

25. Kum 2005 a Mizoram Value Added Tax Act kalpui a nih atang khan pawisa lakluh a pung chho zel a, sum lakluh tihpun nan hma lak mek a ni. Kum 2013-2014 chhung khan sum hmuh tura ruahman cheng 190 vbc a nih laiin cheng 200.44 vbc hmuh a ni. Computer/Internet hmanga mahni awmhmuna chhiah pekna - electronic tax portal hman mek chu tluang takin kalpui a ni a, awlsam taka chhiah pekna hi mipuiin an chhawr tangkai hle a ni. Kum kalta chhung khan lottery atangin cheng nuai 930.23 lakluh a ni bawk.

26. Chhungkaw tin khawsak dinhmun tihchianna chhiarpui Socio & Economic Caste Census 2011 Sorkar Laipuiin a kalpui mek chu District tinah Draft List tihchhuah a ni tawh a, zawh fel thuai beisei a ni. He list hi Sorkar Laipui atanga tanpuina leh hamthatna hrang hrangte hmuh theihna turah tehfunga hman a ni dawn a ni. Peace Accord MNF Returnees 70 te chu Special Scheme hnuaiah an intundin theih nan hna pek an ni bawk.

Sorkar thu leh hla pawimawh mipui hnena puanzar bakah Information & Public Relations Department chuan lemchan leh lemziak (films and arts) tihhmasawnna leh chawikanna turin theihtawpin hma a la a. Heng mi te hnathawh pholanna tur hian programme chi hrang hrang buatsaih thin a ni bawk.

Mizoram puala Hotel Management zirna tur Bung Picnic Spot-ah ruahman mek a ni a, he institute tana building te chu sak zawh tawh niin, reilote ah hawn mai tura beisei a ni.

Mizoram State Museum extension building New Secretariat Complex-a sak mek chu zawh tep a ni tawh a. 13th Finance Commission atanga sum hmuhin Hliappuiah cheng nuai 120 senna tur Suakphunga Cultural Heritage Site sak mek a ni a, Lunglei Venglaiah cheng nuai 300 senna tur Cultural Heritage Centre sak mek a ni bawk. Kum 2013-2014 chhung khan state chhungah cultural programme hrang hrang 22 huaihawt a ni a, state pawnah Cultural Troupe 16 tirhchhuah an ni bawk.

Khawtlang tihhmasawnna tur leh rotling din nan 13th Finance Commission Grant atanga performance grant atana cheng nuai 1,550.12 hmuh chu Village Council te hnenah pek an ni a. Village Council-te hnena thuneihna tam zawk pek an nih theih nan The Village Councils Act, 1953 chu siamtha tura buaipui mek a ni.

Mizoram chhim lama district pathum – Lunglei, Lawngtlai leh Saiha-a Sorkar hnathawkte pension case awlsam zawka chinfel a nih theih nan September 2013 khan Lungleiah Joint Director, Account & Treasuries Office hawn thar a ni.

Delhi-a sorkar ding thar hnuaiah kan hmalama hmasawnna kawng zau tak a inhawn zel theih nan Mizoram mipui te chuan beiseina sang tak an nei a. Hmarchhaka cheng te chuan rilru leh hnam tihdan hmang inhriat tawnna leh inpawhna atangin, inanlohna kara inpumkhatna chu tihchaka awmin, inzah tawnna leh inhriatthiam tawnna tha zawk a thlen ngei an beisei tlat a ni. Sakhua, hnam, tawng leh thil dang kan inanlohna te dah tha ila, remna leh muanna leh lungrualna atan thawk a, kan hnam inpumkhatna leh zahawmna vawnghim tlat turin tan i la thar theuh ang u.

Kan hnam ropui tak dintu te hmathlir tihhlawhtling turin inhlan thar theuh ila, kan hnam a lo than chhoh zel a, hmasawnna leh hlawhtlinna kawng kan zawh tlan zel theih nan zalenna, intluktlanna leh inunauna tinghet zel turin i bei theuh ang u. Kan thlah lo kal zel tur te tan kan Danpuia innghat rochun tlak leh tha din turin i thawk theuh ang u.

He hun hi remchanga la-in, Sorkar ah rinna an nghah tlat avang leh min tawiawmna zawng zawng te avangin tlawmngai pawl te, Kohhran te, thu thar puangzartu te leh Zoram mipui zawng zawng te chungah lawmthu ka sawi duh a. Mizoram nuam zawk leh hmasawn zel, huapzo leh chhenfakawm siam turin an duhsakna leh thlawpna nghet tak kan neih zel ka beisei tlat a ni.

Kan ram leh state a lo ropui chhoh zel nan leh India thar din turin i thawk tlang theuh ang u.

JAI HIND