Ka unau duhtak Mizoram mipuite, in zavaiin Chibai ule.

Kan ram zalenna ni lawmawm tak champhaphak vawi 67-na a lo thlen hian kei leh ka nupui chuan Mizoram mipui zawng zawng duhsakna kan hlan a che u. Mizoram mipui rawngbawl tura dah ka nih avangin vannei ka inti hle a.

Mizoram Union Territory a nih lai, kum 40 zet liamta ah khan, kum 1973 atanga 1976 chhung Mizoram mipui rawngbawlin Aizawl District Deputy Commissioner mawhphurhna te pawh ka lo chelh ve tawh a. Tunah chuan Aizawl District pawh District 5 zetah thendarh a lo ni tih te ka lo hria a. Khatih hun laia Lunglei leh Saiha District tiamin Mizoram hmun kil tin chipchiar takin ka lo fang chhuak tawh a. He rama ka lo kir leh hi ka tan chuan ka khaw hluia haw lehah ka inngai a ni.

Mizoram hmasawn nasatzia leh than chakzia ka hmuh hian ka lawm hle a. A mi chengte thawhhona leh inlungrualna avangin he hmasawnna hi a thleng a ni. Remna leh muanna, hmasawnna leh himna in thlan zawk avangin Mizoram mipui zawng zawng lawmpuina ka hlan a che u. Deputy Commissioner ka nih lai, February 1976-a inremna thuthlung, Memorandum of Understanding (MoU) ziak a nih laia rampum mipuite hlimzia kha ka mitthlaah a cham reng a ni.

Mahatma Gandhi-a kaihhruaina hnuaiah Ahimsa leh Satyagraha hmangin tharum thawhna tel lovin India ramin August 15 khan zalenna a sual chhuak a, hei vang hian kan ram mipui tan chuan he Ni hi ni pawimawh tak a ni. He Ni hian midangte thuhnuaia kan kun laia inrahbehna leh diklo taka chanvo inchhuhsakna kan tawh thin lai hrehawmzia leh zalenna avanga mihring dikna, zahawmna leh tumruhna parchhuak hlutzia min hriatchhuahtir a ni.

He Ni chhinchhiahtlak takah hian zalenna sual tura kohna chhanga penchhuak mihuaisen te zahna chibai kan buk a, an inpumpekna avanga kan ram leh hnam a lo zalen tak dan hi kan hrereng a ni. An hnena chawimawina kan hlan theih sang ber chu an rilru mitthlaa an lo hmuh thin an beiseina tipuitling a, ram hmasawnna leh mipui sorkarna ngelnghet tak siam hi a ni.

India ram mipuite’n May 16, 2014 khan lungrual takin sorkar laipuiah roreltu tur sorkar thar an din a. Sorkar tha, ngelnghet leh chak taka hmasawnna rahbi thar min kaipuitu an nih beiseiin rampumin phur takin he sorkar thar hi kan thlir thup a ni. He sorkar thar hian hmarchhak bial mipuite khawsakphung leh sumpai thawhchhuah hmasawnna tur a bika ngaihtuah a nih tur thu a puan avangin kan lawm hle a. Kan thenawm ram te leh khawvel ram dangte zingah pawh India ram hi ram chak leh thiltithei ber te zinga chhiar tel a nih hun tur nghakhlel takin kan thlir a ni.

Mizoram sorkar hmalakna “New Land Use Policy” chungchang hi ngaihthlak nuam ka ti hle a, NLUP avang hian ei leh bar thawhchhuah kawngah he state hian hma a sawn phah hle tih a lang. Mizoram thil dehchhuah, Gross State Domestic Product (GSDP) 11%-in a thang a, hei hi ram pum huap national average 7.8% aiin a sang zawk a ni. NLUP kaltlanga tanpuina dawngtu zawng zawngte’n theihtawp chhuaha tang lehzual sauh sauh turin ka fuih duh a, chutihrual chuan NLUP hi ei leh bara hmasawnna tur ruahmanna a nih piah lamah chhehvel boruak leh ramngaw humhalhna tur project a ni tih i hre reng ang u.

Mizoram hian tourism ah hmabak eng tak a nei a. Ram chhung hmundang leh ram pawn atanga lokal khualzinte tana tlawh chakawm taka siam theih tur hmun remchang a ngah hle. Tourism hi sum dehchhuahna tha tak a nih bakah thalai tam tak tan eizawnna ngelnghet a siamsak thei a ni.

Rampum huap football inelna sang ber National Football Championship vawi 68-na a nomawi Santosh Trophy hlawh chhuaktu football team te lawmpuina ka hlan a. Tumruhna, tihtakzetna, taimakna, phurna leh tih hram hram peihna avangin hlawhtlinna a chan theih tih a tilang chiang hle. He state a thalaite hi infiamna kawnga an theihna haichhuak zel tur leh an talent dawn hmang hian he state leh kan ram pum tan hmingthatna leh hausakna hlawhchhuak zel se ka duh hle. Zirna a ni emaw, infiamna a ni emaw, kawng hrang hrangah kan thalaite thiamna leh theihna tihpun a awmin an tan eizawnna kawng tha a inhawnzel ka beisei tak meuh a ni.

Zalenna hian mawhphurhna a keng tel a. India danpui hian dikna chanvo min pek rualin mawhphurhna pawh kan kovah a nghat tel nghal a. He ram khua leh tui kan nih angin kan mawhphurhna hi kan hlen theuh a tul a ni. Kan ram Prime Minister hmasaber Jawaharlal Nehru khan August 14, 1947 zanlaiah Constituent Assembly hmaah thusawiin, “He hun hi insawiselna leh midangte tlinlohna thur chhuah te, midangte huat leh mawhchhiatna hun a ni lo. India ram zalenna In ropui kan sa anga, chutah chuan he ram leilung fate an cheng dawn a ni”, a ti a. Hei hi kan intiamna leh kan hnapuiber ni ve rawh se.

Independence Day champhaphak 67-na a lo thlen hian zalenna sual chhuaktu mihuaisente beiseina leh duhthusam hre reng ila. Inpumkhatna sawhnghet lehzual tura beiin India ram a lo chak a, a ropui lehzual zelna turin tan i la chhunzawm zel ang u.

Jai Hind.