Vawiin khan Champhai ah pawh 68th Independence Day Celebration chu India ram khawpui dangte ang bawka hman a ni a. Independence Day lawmna inkhawm hi Champhai Chhangphut Field ah Home Minister Pu R.Lalzirliana hova hman a ni. Khuallian hian India hnam puanzar a pawh pharh hnuah Parade Contingent 22 ten India hnam puanzar zahna lantira chibai an buk chhangletin Independence Day thuchah a sawi  a. Hemi hnu hian Independence Day puala intihsiakna hrang hrang huaihawt tak a ti tha te hnenah lawmman a sem nghal a ni. 

Home Minister chuan India chu zalenna sualtute inpekna avanga ram ropui a lo nih dan sawiin Zalenna sualtute huaisenna leh inpekna te kan hriat reng a tul thu a sawi a. Zalenna kan neih hnua India ram hmundang te ang bawka Mizoram lo than chhoh dan te leh tun dinhmun a Sawrkar hmalakna hrang hrang leh hlawhtlinna te a tarlang a. Sawrkar chuan rualkhai taka Mizoram pum tana hmasawnna tur hna a thawh dan te tarlang in Champhai District chhungah pawh mipui tan hmasawnna tam tak hmuhtur a awm tawh thu a sawi a. Champhai District chhunga Sawrkar hmalakna hlawm lian deuh deuh te a tarlang a. Heng hmalakna te zingah hian  Zokhawthar leh Champhai inkar kawng Km 27.25 a sei world Bank atanga sum hmuh Rs 153 Crore a siamtha tura ruahmanna te, Champhai Police Station Grade III siam nana Rs.100 lakh ruahman te, Fire Station thawm that nana Rs.223.91 lakh hmuh a nih tawh chungchang te, Tuipui leh Biate inkar siamthat nana Rs.880 Lakh senso tur ruahman a nih dan te, PWD enkawlna hnuaia Champhai leh Khawbung inkar kawng thawm that nana  hman tur Rs.278 lakh ruahmanna  te bakah Keifanga 132 KV sub-station Rs.1232.87 lakh senga sak fel tawh te leh Champhai khawchhunga Electric distribution tihchangtlun nana Rs.1193.01 lakh hmuh a nih tawh thu te tarlan a ni.

Heng bak ah Champhai a Polytechnic Institute dinna tur Rs.900 lakh hmangin Polytechnic building te chu sak a nih tawh thu leh NLCPR kaltlanga Rs.951 Lakh hmuh hmanga Govt.Champhai College building sakbelh a nih thu sawiin NLCP atang bawka sum hmuh Rs.144.34 lakh hmanga Khawzawl College building leh hostel sak mek a nih thu a tarlang. Champhai a GNM School pawh Rs332 lakh chuang hret in sak mek a ni a ti. Home Minister chuan zalenna kan neih hlutzia hria ila India ram a cheng ve hnam dang, sakhaw hrang hrang betu te leh tawngdang hmang te nen pawh lungrual taka chenho kan tum tlat angai a ni a ti.