Kumin Independence Day vawi 68 na India in British sawrkar awpna hnuai atanga a indanna ni champha chu ropui leh urhsun takin District Playground, Saiha-ah lawm a ni. He Ni lawmna a khuallian Pu Hiphei, Speaker, Mizoram Legislative Assembly chuan zing dar 10 ah hnam puanzar pawtparhin Independence Day thuchah a sawi zui nghal a ni.

Speaker Pu Hiphei chuan zalenna rah chu remna leh muanna te bakah hmasawnna a ni  tiin Zalenna sualtute inpekna ngaihsan awmzia te a sawi a.  India ram in zalenna a neih hnua hma a sawn nasat zia te leh mizoram ngei pawh India state dang te ang bawka hmasawnna kawng a zawh ve zel thu  sawiin tun dinhmun a Mizoram sawrkar hmalakna lian deuh deuh te a tarlang. Mizoram Flagship programme chungchang sawiin  NLUP chu mi harsa zawkte dinhmun tha a dintir tumna a nih bak  nungchate, ramngaw   leh leilung humhalh na tur programme pawihmawh tak a ni a ti.

PHE department chuan Saiha khawpui chhungah Tui connection 2325 a pek tawh thu leh thingtlang khuaah pawh tui hnianghnara pek tum mek a nih thu a sawi bawk. DRDA department hmalakna chi hrang hrang tarlangin, Labour & Employment department hnuaiah Saiha District chhungah hna zawnglai 7525 in registered an awm thu a sawi a. District Hospital Saiha pawh sak tuma hmalak mek anih thu leh Specialist te pawh dah thuai tum anih thu a sawi bawk. Education department a zirtirtu indaihlohna pawh theih tawp chhuaha hmalak mek anih thu a sawi bawk.

He Ni lawmna ah hian Parade Contingents 15 awmin, School Contingents a lawmman pakhatna chu Grace Academy Saiha ten laiin, pahnihna chu Foxal Higher Secondary School ten an la a.  Lawmman pathumna chu Don Bosco High School Saiha ten an la thung a ni. Uniforms Contingents a lawmman pakhatna chu 2nd Bn. MAP ten laiin pahnihna chu NCC Don Bosco School Saiha ten an la a. Lawmman pathumna chu Mizoram Home Guard ten an la a ni. Lawmman te hi khuallian hian a sem zui nghal a. He Ni pawimawh pual veka buatsaih badminton tournament a champion te hnenah lawmman te hi a sem bawk a ni. Sawmbikte puala thingpui inhona At Home chu chawhnu dar 1:00 khan CEM Bangla ah neih a ni a, chawhnu dar 2:00 ah Independence Day Football Final pawh Siathla Sporting Club te leh College Veng Sporting Club ten an khel a ni.