State hmun dangte rualin vawiin khan Hnahthial-ah pawh Independence Day 2014 lawmna chu HBSC Ground, Hnahthial-ah hman a ni a, Khuallian Pu S.Laldingliana, Vice-Chairman, Lunglei High Powered Committee chuan hnampuanzar a pawtparh a ni.

Khuallian-in hnampuanzar a pawhparh chhungin Nuchhungi English Medium School ten Hnam hla sain chibai an buk a ni. Khuallian Pu S.Laldingliana chuan thu sawiin sawrkar hmalakna hrang hrang a tarlang a. Hnahthial khawpui chhung leh a chhehvela hmalakna sawilangin, Tuipui Darzokai lei dawh a nih mek thu leh N.Vanlaiphai leh S.Chawngtui inkar kawng laihna tur cheng vaibelchhe 20 chuang dah fel a ni tawh tih a sawi a, he kawng hi Lunglei leh Champhai khawchhak lam inkalpawhna tur kawng pawimawh tak a ni, a ti. Hnahthial leh Haulawng inkar kawng laihna tur pawh ruahman fel tawh a nih thu sawiin Phase-I ah Hnahthial atanga Mat thleng laihna tur Cheng Vaibelchhe 15 dah fel tawh a nih thu a sawi lang bawk. Cherhlun Water Pumping Scheme khawl bun mek a ni a, Hnahthial chhehvel - Thingsai, Tarpho, Aithur, S.Lungleng leh Muallianpui khuaah te Health Sub-centre sak mai tura ruahmanna siam fel vek a nih tawh thu a sawi bawk a ni.

Vawiin Hnahthial-a Independence Day lawmnaah hian School Contingent 14 ten hnampuanzar chibai an buk chu HPC Vice Chairman Pu S.Laldinglian a chuan a chhang let a ni.