Vawiin khan Tlabung-ah pawh Parliamentary Secretary Pu H.Zothangliana hovin Licheng Mualah kum dang zawng aia urhsunin kumin India Independence Day vawi 68-na lawm a ni.

Indpendence Day 2014 lawmnaah parade contingent 10-te chibai buk a chhanlet zawhah Khuallian Pu H.Zothangliana chuan thu sawiin, India-in zalenna a neih theihna tura rim taka beitute zahna chibai a bûk a; British awpna lak ata India a zalen avangin rorelna fel tak hnuaiah ang khatin ram mipui zawng zawngte an awm theih phah a ni, a ti. Kuthnathawktute dinchhuahna tura Mizoram Sorkar hmalakna NLUP chu huamzau zawka kalpui zel turin ruahmanna siam a nih thu Khuallian hian a sawi a; kum 2014-2015 chhungin kuthnawktute thlai thar hralhchhuah kawngah nasa lehzuala tan lak tum a nih thu a sawi bawk. Mizoram chhungah kawngpui tha zawk nei turin Sorkar-in hma a la chho mek zel a ni tih sawiin, inkalpawhna kawngpui tha zawk neih theih nan NABARD, JNNURM, NEC leh World Bank te nena tangkawpin hmalâk mek zel a ni, a ti.

Pu Zothangliana chuan hnam hnufual leh tlem zawkten zirna kawnga hma an sawn zel theih nan zirlaite hnenah kum tin Tribal & Minority Scholarship pek thin a nih thu te, Zirna sang zawk tihhmasawnna tura scheme thar - Rashtriya Uchchatar Shiksha Abhiyan (RUSA) kalpui tan mek a nih thu leh hemi atan hian 'Mizoram State Higher Education Council' din a nih thu te, Tlabunga zirna tihhmasawn nan Block Institute of Teacher Education (BITE) din a nih tur thu te a sawi a ni.

Higher and Technical Education Department changtu Parliamentary Secretary chuan thingtlang leh khawpuiah hmasawnna a rualkhai zawkna tura duan Scheme hrang hrang - Mahatma Gandhi National Rural Employment Guarantee Scheme (MGNREGS), Indira Awas Yojana IAY), Backward Region Grant Fund (BRGF) leh Border Area Development Programme (BADP) kalpui a nih dan a sawi bawk a ni.