Kawnpui a Independence Day lawmna chu vawiin hma dar 10:30 khan Pu Joseph Lalhimpuia Parl Secy hovin Boys Hockey Academy Playground ah neih a ni a; he hun ah hian Unarmed Contigent 2 leh School Contingent 5 ten Hnam puanzar chibai an buk a; Khuallian chuan Chibaibukna a lo chhang let a ni.

Pu Joseph Lalhimpuia Parliamentary Secretary chuan India in zalenna a neih theih nana sulsutu mi pawimawh te hming lam chhuakin zahna chibai a buk a; an thawhrimna leh tawrhna zarah India chuan Zalenna duhawm tak kan nei tiin kan ram innghahna thurin thawhrimna leh leh rinawmna vawng nung reng turin mipui te a chah a ni. Khuallian chuan kawnpui-ah Astroturf Ground thar mawi taka Zalenna Champha hman chu a ropui tiin Sawrkar in Kawnpui leh a chhehvel ah ram tana hmasawnna hna a thawh zingah Serkhan Bhaga Road laih mek chu Mizoram tan a chhenfakawm tiin Kawnpui leh Buichali inkar kawngpui siam mek pawh kum thar tir lamah zawh fel tum a nih thu a sawi.

Education Deptt bikah hnathar 99 lakna tur pawm a ni a; Lecturer 26 lakna tur te pawm a ni bawk a. Primary School Zirtirtu 290 chu Headmaster ah hlan kai niin Middle School Zirtirtu 68 pawh Headmaster ah hlan kai a ni a; Primary School a thawk mek OB (Operator Blackboard) Teacher 108 dah ngheh an ni a; hei bakah hian EV Teacher 121 dah ngheh an ni bawk a ti. Hydro Power siam chhuah kawnga Sawrkar hmalakna te; Thingtlang khua inkalpawhna kawng laih thar leh Blacktop te; Mizorama Oil zawn mek anih dan te a sawi bawk.

Leilung hausakna zawng chhuah mek ah Mizoram chuan kawng that a zawh mek a; Oil leh gas zawngtu ONGC leh Oil India Ltd te pawh chak zawka hnathawk tur leh an hnathawh chin thla tin sawrkar ah report tur hriattir an ni a; mipui te hnena hmasawnna thila hman tur (CRF) an neih ang ang te pawh tangkai zawka hman dan tur ruahman sak an ni a ti. ONGC phei chuan Hortoki ah mipui tan tui thianghlim in tur an siam sak a; Hall te sa tha-in Information Centre te an siam a; Kawnpui Hmarveng ah YMA Hall te pawh an sa tawh a; tunah hian Meidum leh Hortoki inkar kawng lai turin sawrkar chuan na takin a nawr a ni a ti. Lawmna hun hman lai hian V/C ten Kawnpui zirlai MZU in result a tih chhuah hnuhnung bera top 10 a tling phak chin mi 6 hnenah lawmpuina Thuziak leh pawisa an hlan.

Kawnpui-a Independence Day lawmna hi Pu Liansangzuala Chhakchhuak SDO(C) in a kaihruai a; Sports Deptt. bultuma Hockey Tournament Final khelh ah Kawnpui Hmarveng chuan Kawnpui Venglai 1-0 a hnehin an champion a ni. Parl. Secretay hian SDEO Kawnpui Office a tlawh a; Kawnpui Sub Division chhunga Education Deptt dinhmun te an sawiho.