India ram zalenna ni vawi 68-na chu Thenzawl Sub Division-ah pawh hman a ni a. Mizoram Youth Commission Chairman Pu T.Sangkunga chuan hnam puanzar pawt pharhin parade contingent-te hnam puanzar chibai buk a chhanglet a ni.

Thenzawl playground-a Independence Day lawmna programme ah hian Pu T.Sangkunga chuan kum kalta chhunga Mizoram sorkar hmalakna hrang hrang tarlangin inkalpawhna kawngpui siam leh cheibawl te, zirna leh hriselna tihchangtlun te, dan leh thupek kenkawh kawngah leh mipui mimir eibar, sum leh pai chawikanna lamah te hlawhtlinna namen lo a awm a, Mizoram sorkar flagship programme NLUP pawh a thawh thumna tur bultan chhoh leh mek a ni, a ti. Mizoram Youth Commission Chairman chuan Mizo thalaite’n eizawnna tha an hmuh theih nan Mizoram Youth Commission leh Labour Employment & Industrial Training Department tangkawpin Skill Fest an huaihawt a tel thalai 10,000 chuang zinga thalai 2,855 te chuan Mizoram chhung leh state pawnlama hna hmuhna atan intuaihriam an duh a, an zinga 1000 chuang zet training turin Mizoram pawnah tirhchhuah an ni tawh, a ti. Thenzawla sorkar hmalakna thenkhat langsar zualte tarlangin khum 50 awm theihna tur Ayush Hospital sak mek te, ei leh in hrisel leh hrisello enfiahna tur Food Testing Laboratory chu sorkar laipui Ministry of Commerce & Industry atanga sum hmuh hmangin

Thenzawlah sak niin a ruhrel din fel tawh a nih thu leh, he hmuna mamawh tur hmanraw chi hrang hrang chah khawm mek a nih thu te; leihnuai hausakna haichhuak turin Thenzawlah leiverh hna tan thuai tum a nih thu te; mipui hahchawlhna leh intihhlimna tur LAD park tha tak hawn a nih tawh thu te leh Thenzawla Mizoram Police Training School pawh thuam that a tihchangtlun zel a nih thu Pu T.Sangkunga chuan a sawi a. Sorkar hmalaknain Thenzawl hockey playground-ah phullem astroturf tha tak phah niin hei vang hian hockey-ah Thenzawl khua leh Mizoramin nasa takin hma a sawn phah a ni, a ti a. Rampum huap National School Games 2013, Ranchi a neih tuma Champion, Thenzawl Middle School Women Hockey Team a lawmpui tak zet thu sawiin hmasawn zel turin duhsakna a hlan a ni.

Khuallian Pu T.Sangkunga chuan he hunah hian parade contingent tithate hnenah leh state level-a infiammi tithate hnenah lawmman a sem a ni.