Kumin 2019 India Independence Day vawi 73-na, India in British sawrkar awpbehna hnuai atanga a indanna Ni champha chu ropui leh urhsun takin District Playground, Siaha-ah  lawm a ni.

Vawiin India Independence Day lawmna a khuallian Dr. K. Beichhua, Minister of State i/c Social Welfare etc. Government of Mizoram chuan thu sawiin, India ramin zalenna a hmuh theih nan a thisen leh thlantui nen lo beitu tam tak zingah Pu Mahatma Gandhi te, Pu Jawaharlal Nehru te, Pu Subhas Chandra Bose te leh Pasaltha dang tam tak te ram tana an inpumpekna leh hmangaihna thinlung chhuanawm tak kha hre thar lehin, i entawn theuh ang u, a ti a. Vawiin ni ah hian India zalenna sualtute zing a mi, thla hmasa mai a chatuan ram min pansan ta Mizo Pasaltha Pu Darthawma, Lunglei khua chu zahna chibai a buk bawk. Khuallian chuan Mizoram Sawrkar Flagship Programme ‘Socio-Economic Development Policy’ (SEDP) hmasawnna huapzo leh ngelnghet, mipuite dinhmun tihmasawn tur leh ei leh bar kawnga kan intodelhna tur, khawtlang nun tihmasawntu leh mipuite hlimna leh thlamuanna thlentu tur a ni tiin, SEDP chuan Gross State Domestic Product (GSDP) sang zawk a thlen dawn a ni, a ti bawk.

Kum 2018-2019 chhungin 126.84 Kms a thui kawng laih thar a ni a, 326.406 Kms a thui kawng chhuat Black Topping pawh zawh tawh a ni, a ti. PMGSY, NEC, NABARD, NEDP hnuaiah cheng vaibelchhe 992.81 sengin kawngpui 110, a vai a thui zawng belhkhawm 1332.85 Kms chu siam mek a ni a, Lei pali- Tlawng lui, Bairabi-Zamuang road, Tut Lei, Tuirini Lei leh Aizawl Lei te dawh zawh tawh niin, CRF, NABARD, NEC, ADB, NEDP leh MORT&H hnuaiah Temporary Bridge 31 chu Permanent Bridge a thlak turin dawh that mek a ni, a ti bawk. Kum 2018-2019 chhungin cheng vaibelchhe 520.42 sengin Building 102 sak a ni a, heng zinga 36 te hi sak zawh tawh niin Building 66 te chu sak mek a ni. Heng bakah hian Department hrang hrangte hmalak leh an hmachhawp hrang hrangte a sawi bawk a ni.

Kumin India Independence Day lawmna-ah hian Master H. Beiduasa s/o H. Vabeily Tisopi khua chu Chawimawina sang ‘Uttam Jeevan Raksha Padak’ Naupang huaisen, mahni nunna hial thap a midangte nunna chhanhimtu hnenah khuallian chuan chawimawina Tangkapui leh Thuziak bakah Tangkafai hlanna hun a hmang bawk.

India Independence Day lawmna-ah hian Parade Contingents 17 awmin, Uniform Contingents 5 leh School Contingents 12 te an ni a. Uniform Contingents te zingah NCC Don Bosco School te chu pakhatna niin, pahnihna-ah Mizoram Police te awmin, pathumna-ah Mizoram Home Guard te an awm bawk. School Contingents atangin Hill Gate School chuan lawmman pakhatna lain, pahnihna lawmman hi Foxall Higher Secondary School ten an la a, Govt. Higher Secondary School te chuan lawmman pathumna an la ve bawk.

Kumin India Independence Day puala Essay leh Oratorical Competition buatsaih a lawmman dawngtute chu - Essay bika lawmman pakhat chu Beizirili, Govt. High School, Siaha niin, pahnihna ah Hani Lalhriatpuii, Adventist English Academy leh pathumna-ah ZD. Dengchhingpuii, Little Diamond English School te an ni. Oratorical a pakhatna chu Elizabeth, DBS niin, pahnihna-ah K. Beipichhua, Govt.HSS, Siaha leh pathumna-ah Jessica Lalnunmawii, ECM HSS, Siaha te an ni.

Kumin Member of Parliament Election neih zawh taka Siaha District a Election Duty titha zualte hnenah lawmman semna hun hman nghal niin, Best Presiding Officer a tan Pu K. George, Best Pink Presiding Officer atan Pi Hepaw Hlychho, Best Sector Officer ah Pu Benjamin F. Nohro, Best Model Code of Conduct Officer atan Pu K. Vanlalzuala, Best Nodal Officer ah Pi B. Malsawmtluangi leh Pu Ngulzathuama te chu thlan an ni bawk.

Vawiin India Independence Day lawmna programme hman zawhah  khuallian Dr K. Beichhua, Minister of State, Government of  Mizoram chuan Grace Children Home leh Orphanage Boys Home te tlawhin, chawhnu dar 1:00Pm ah At Home CEM Bungalow ah neih a ni a, he At Home zawhah hian District Jail, Maraland Gospel Centenary Hospital leh  District Hospital, Siaha te a tlawh leh bawk dawn a ni. Indian Independence Day lawmna puala buatsaih Football Tournament Final Match leh Closing Ceremony ah khuallian niin a hmanpui dawn bawk a ni. He Final Match ah hian New Colony FC leh Meisavaih FC te chuan Independence Day Trophy hi an inchuh dawn a ni.

Vawiin khuallian Dr. K. Beichhua hi a thiannu Dr. Zochhuanawmi chuan a rawn tawiawm a, a ni bakah hian Dr. Hmarkunga, Director AH&Vety Department, Pu Ngurchungnunga, Commissioner, Excise & Narcotics Department,  Pi Vanlalpianpuii, Director, Women & Child Development Department, Pi A. Vanlalzawni, Director, Social Welfare Department ten an lo tawiawm a ni.