India ramin zalenna a hmuh champha phak vawi 73-na chu ram chhung hmun dangte rualin vawiin khan Lawngtlaiah pawh ropui takin lawm a ni a. A lawmna pui ber Central YLA khelmuala buatsaihah Sports & Youth Services, etc. Minister Pu Robert Romawia Royte chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Zing dar 8:45-ah Lawngtlai Bawrhsap pisa tualah Bawrhsap Pi Shashanka Ala, IAS chuan hnam puanzar pawt pharhin, zahna chibai a buk a. Chawhma dar 10:30-ah CYLA Playground-ah Khuallianin hnam puanzar pawt pharhin, hnam puanzar chibai buktu parade contingent 18 te chibai buk a chhang let nghal bawk.

Khuallian Pu Robert Romawia Royte chuan mipui pung khawmte chu zalenna chibai bukin, India ram zalenna atana beitu hnam pasalthate hre renga zahna chibai buk thar a, an thisen leh thlantui hmanga an valh sa India ram ropui nan leh hmasawn zel nan theih tawp chhuah turin a sawm a. Thalai nun suattu leh Kohhran pawhin a duh loh zu zawrh tihtawp a lo ni ta te, Minister-te Chairman-na hnuaia mipuite dawm kanna tura sawrkar programme SEDP Development Board 14 siam a ni leh chumi atana sawrkar budget-a sum dah a ni ta te, hna thawk theia Lok Ayukta siam a ni te, inrel bawlna felfai zawk a awm theihna tura district thar pathum - Saitual, Khawzawl leh Hnahthial District hawn thar a ni leh mipuite phurrit chhawkna tura Vehicle Tax Act siam that a ni ta te chu sawrkar tharin rei lote chhunga Mizoram tana a hna thawh sawi tur eng emaw zat zinga tar lan hmasak a duh a nih thu a sawi.

Khuallian chuan Mizoram leh Lawngtlai District hma sawnna hrang hrang sawi chhunzawmin, inkal pawhna kawngpui tha tak a awm theih nan National Highway-54 kawngpui Thingkah atanga Kawlchaw W thleng km 38-a thui chu zauh tura hma lak mek nih thu te, Kaladan Multi Modal Transit Transport Project (KMMTTP) kawngpui sial mek chu zawh thuai a nih theih nan sawrkarin theih tawp a chhuah thu te, District chhunga kawngpui dangte pawh thawm that reng a nih thu te a sawi a. District Hospital Lawngtlai khum 30 awmna khum 50 awm theihna tura sak that mek chu 85% vel zawh ni tawh a, hospital (IPD) building bakah, quarters leh trauma centre tur pawh sak tel a nih thu te, District Hospital Lawngtlaiin kum 2018-a Mizoram puma District Hospital fai leh thianghlim ber lawmman (Kayakalp Award) leh most beautiful award an la thei chu Lawngtlai District tihmingthatu a nih thu te a sawi a. DC Lawngtlai hma laknaa department hrang hrangte nen tang hova sikul huan siam project, “Kan Sikul, Kan Huan”, sikul, anganwadi centre leh naupang enkawlna hmun hrang hrang 214-a kalpui chu rampum huap chanchinbu lian te'n puangzar a, India ram Vice President pawhin Rajya Sabha House chhungah leh ama social media account-ah te hial a tar lang chu a chhuanawmin, district hmel a timawi hle a ni, a ti.

Sports Minister chuan dan leh thu pek kenkawh kawnga District Administration leh District Police hna thawh fakin, District Child Protection Unit te nen tang kawpa Lawngtlai Police Station-a Child Friendly Room buatsaih a nih thu leh Chawngte, Sangau, Borapansury leh Vasei Police Station-ah te pawh buatsaih tura hma lak mek a nih thu te, Mizoram chhim lam himna atana pawimawh em em Thingkah hmuna 3rd IR Battalion hmunpui Rs vaibelchhe 28 nuai 42 sing 2 sang 8 (Rs 28,42,28,000/-) senga sak mek chu December 2019-a hawn hman tum a nih thu te a tar lang a. AH&Vety Department hnuaia Sabualtlanga sial vulhtute tan ran tlatna 'grazing ground' siam zawhsak a, Mampui AH & Vety Farm-a ar note awp keuna (poultry hatchery) bun fel tawh a nih thu te, NABARD suma State Vety Hospital sak mek a nih thu leh Lungzarhtum khuaah sial leh bawng tlatna (grazing ground) siam tura hma lak mek a nih thu te a sawi.

Lawngtlai District-a zirna kawng leh naupangte enkawlna kawnga School Education Department leh Social Welfare Department hnuaia hma lakna chungchang te, agriculture leh a zawmpui department hnuaia kut hna thawktute hma sawnna tura ruahmanna hrang hrang awm te, thingtlang mi harsa zawkte chawi kanna tura sawrkar ruahmanna hrang hrang te, mipui mamawh tui, eng leh hriselna kawnga a mawhphurtu department te'n theih tawp an chhuah dan te tar langin, Information & Public Relations (I&PR) Department hnuaia chanchinbu leh arts peng hrang hrang hma sawnna atana hma lakna leh Mizoram Journalists’ Association (MJA) member-te tana India ram khawpui hrang hrang tlawhna hun press tour buatsaih thin a nih dan te, journalist damlohna khirhkhan tawkte tan Mizoram Journalists’ Welfare Scheme (MJWS) atanga an inenkawlna senso (MR) bill theihna ruahman leh journalist thite ralna ex-gratia payment pek thin a nih thu te a tar lang bawk.

A enkawl department - Sports & Youth Services, Tourism leh Information & Communication Technology hnuaia hma lakna tlangpui sawi chhunzawmin, Pu Robert Romawia Royte chuan sports thei bikte hnena sawrkarin a pek thin Incentive Cash Award tihpun a, a pek dan te pawh tihawlsam tum a nih thu te, Mizorama a vawi khat nan Mizoram Sports Policy 2019 duan mek a nih thu te, Olympics leh National Games zulzuia sports discipline hrang hrang huapa Mizoram State Games nei tura ruahmanna siam a nih thu te,    sports infrastructure tha siam tura hma lak mek a nih thu te, thalaite hmakhua atana sports, zirna, sumdawnna leh kawng danga hma lakna te, tourist destination pawimawha Mizoram siam tura hnam kut pawimawh hmang tangkaia mikhual hip thei tur programme siam tur leh Aizawl, Reiek, Thenzawl, Hmuifang, Rawpuichhip leh hmun dangah te pawh tourist hip thei tur thil chi hrang hrang siam mek a nih thu te, inbiak pawhna (communication) leh internet connection tha a awm theih nana hma lakna leh HSLC leh HSSLC top 10-a pass chin mi 55 hnenah laptop sem a nih thu leh kum tharah pawh topper-te hnena laptop sem hi chhunzawm zel tum a nih thu te a sawi.

Hemi hnu hian ceremonial parade lawmman sem nghal a ni a. Unarmed category-ah Don Bosco School NCC chu pakhatna niin, pahnihna Downtown English School Scouts & Guides leh pathumna Don Bosco School Scouts & Guides te an ni a. Secondary school category-ah Don Bosco School high school section chu pakhatna niin, pahnihna Jehova Jire HSS leh pathumna Govt College Veng HS te an ni a. Elementary school category-ah Govt Bazar Middle School chu pakhatna niin, pahnihna Don Bosco School middle section leh pathumna Jehova Jire HSS middle section te an ni a. Mizoram Police armed contingent leh Govt Model English School SSA pipe band te chu special participation prize leh parade contingent dang zawng chu participation prize hlan ni bawkin, parade commander leh judge-te pawh lawmman siamsak an ni bawk.

He'ng bakah hian Independence Day Football leh Badminton Tournament lawmman leh special award hrang hrang sem nghal a ni a. Football-ah hian Bazar Football Club chu champion niin, Lawngtlai-III Football Club chu pahnihna an ni a. Badminton category hrang hrang zinga men's singles-ah Lalhmangaihzuala, College Veng Badminton Club a champion a. Men's open doubles-ah Chandmary Badminton Club ai awh Vanlalchawisana leh F. Hrangena te inkawp an champion.

State department zinga thawk tha berah Lawngtlai Power Division thlan niin, LADC hnuaia department atangin Land Revenue & Settlement Department thlan an ni a. Health Care Award chu District Hospital Lawngtlaia Medical Officer Dr Zothanpari Chhakchhuak-in a dawng a; thisen pe tha chawimawina chu unit 49 petu HC Vanlalruatpuia, Lawngtlai Bazar Veng leh unit 35 petu LH Zauva Chenkual, Lawngtlai-III te hnenah hlan a ni a; best police on duty-ah T. Vanlalruata, C181, Police Station leh best traffic police-ah Constable Vanlalsanga te thlan an ni.

Best anganwadi worker award chu Lawngtlai Block atangin Lilyparvuli, AOC Centre-II; Chawngte Block atangin Sunita Chakma, Kamalanagar-III; Sangau Block atangin F. Lalthangkimi, Sangau Centre-II leh Bungtlang South Block atangin Chhimneidingi, Chamdurtlang Centre-II te'n an dawng a. MLA, MP leh VC inthlanpui leh MDC by-election neih zawh taka sector officer tha ber atan Tuichawng Constituency atangin C. Lalthlamuana, Asst Professor, Govt Lawngtlai College; Lawngtlai West Constituency atangin F. Vanlalhmangaiha, Lecturer, DIET Lawngtlai; Lawngtlai East Constituency atangin Lalneihthanga Colney, Block Development Officer te thlan an ni a; best polling party-ah Tuichawng Constituency hnuaia Udalthanasora-II polling party, Lawngtlai West Constituency hnuaia Damlui polling party leh Lawngtlai East Constituency hnuaia Bualpui NG-II polling party-te thlan an ni bawk.

Vawiin Lawngtlaia Independence Day lawmnaah hian Lawngtlai DC Pi Shashanka Ala, IAS, Lawngtlai SP Pu Amit Goel IPS, LADC CEM Pu T. Zakunga, Tourism Department Director Pu Saitluanga te bakah, LADC-a member te, state leh district council-a officer leh staff te, political party leh tlawmngai pawl ai awh te, khawtlanga mi challang tak tak leh thu thar theh darhtu te, sikul naupang leh mipui thahnem tak an tel a. Muala hun hman zawh hian Circuit House-ah Lawngtlai DC buatsaih VIP At Home hun hlimawm tak hman chhunzawm a ni.

Kumin Independence Day pual hian Lawngtlai District Independence Day Celebration Committee chuan Lairam Motherless Home leh District Jail-ah te tanpuina Rs 2,000/- ve ve an hlan a ni.