Vawiin khan Mizoram hmun dang rualin Tlabung-ah pawh Independence vawi 73-na lawmna neih a ni a, Khuallian Pu Henry C Lalrawnkima, Tlabung SDO (C) chuan hnam puanzar a pawt pharh a ni.

Khuallian Pu Henry C Lalrawnkima,Tlabung SDO (C) chuan thu sawiin India ram a zalen theihna tura nunna chan ta, zalenna sualtu mi huaisen leh hruaitu ropuite hre rengin zahna chibai a buk hmasa a. Zalenna hnuaiah mihring dikna, zahawmna leh tumruhna a parchhuak thin tih sawiin hnam hrang hrangten sakhua leh tihdan phung leh tawng hran vek nei mahse, India Danpui hnuaiah mitin an intluktlan thu leh zalenna thuhmun an neih vek thu a sawi. SDO(C) Pu Henry C Lalrawnkima chuan Tlabung chu India leh Bangladesh insumdawnna atana hmun pawimawh a la nih chhoh dawn avangin, a chhunga chengten hmathlir thui tak neia rilru an siamfel a tul a ni a ti a. Tlabung Sub-division-in hma a sawn theihna turin sorkarin hma a la mek tih sawiin Civil Sub-division inrelbawlna thuamthaa tihchangtlun mek a nih thu a sawi a, hemi atan hian cheng nuai 128 senga SDO (C) pisa thar sak mek a nih thu leh kuminah chuan luah theih a zawh hman beisei a nih thu a sawi bawk. Tun hnaia tuilianin chhiatna a thlen dante chu a hmunah chiang zawka enfiah a nih tawh thu leh report kimchang zawk pawh DC hnena thehluh tawh a nih thu a sawi a. Agriculture leh Horticulture enkawl lai thlai hrang hrang chhiat dan pawh thuneitu sang zawkte hnena thlen a nih tawhin chhawmdawlna awm thei apiang dilna pawh thehluh a nih tawh thu a sawi.

Thu a sawi zelnaah Tlabung SDO (C) chuan khawtlang nun a ralmuan zel theihna turin dan leh thupek tha taka kenkawh a nih thu leh hemi avang hian kumin chhungin Tlabung-ah thubuai 7 chauh ziahluh a la nih thu a sawi a. Ram dang atanga dan lova rawn lut turte ven kawngah theihtawp chhuaha hma lak mek a nih thu leh hetiang lama rinhlelh kaite pawh a tul anga chhui zui thin an nih thu a sawi. Ramri-a chengte dawmkanna tur BADP hmanga Tlabung damdawi in Block-I sak that a nih thu leh NEDP sum hmanga chhunzawm a nih thu te, Tlabung mipuiten tui thianghlim an hnianghnar theihna tura Tlabung Water Supply Scheme hnuaia tui siakna khawl pawh cheng nuai 180 senga tihchangtlun a nih thu te, PMGSY hmanga khaw kar inkalpawhna engemaw zat sial thar a nih thu te leh Tlabung khaw chhunga kawlphetha rualkhai leh tha zawka semchhuah a nih theihna tura hma lak mek a nih thu a tarlang bawk.

Vawiina Thangliana Mual-a India Independence Day lawmnaah hian parade contingent 5 awmin, kumin tuilianin a tihbuai avangin Tlabunga zirna in tam zawk an tel thei lo va; he Ni lawmna hun hman zawh a nih hnuah Khuallian Pu Henry C Lalrawnkima hian Sub-divisional Hospital, Tlabung leh Leprosy Hospital-te tlawhin Independence Day pual thilpek a hlan a ni.