Vawiin khan Saitual Public Playground-ah 73rd Independence Day lawmna neih a ni a, Power & Electricity Department Minister Pu R.Lalzirliana chu Khuallian a ni a, Hnam puanzar pawt pharhin Parade Contingent 26 te chibai buk a chhanglet a ni. 

Mizoram Home Guard Band Party (MHGBP) CTI, Sesawng te'n Parade an tawiawm a. MHGBP te'n India Hnam Hla an tum zawhah, BSI Choir, Saitual Area te'n India in Zalenna a neih lawmnan leh Saitual Lal Dorawta'n hmanlai kristiante hum him nana Saitual khua a lo din hriatreng nan  'Halleluiah Chorus' an sa bawk a ni.

Khuallian Pu R.Lalzirliana chuan India Independence Day Vawi 73-na lawm tur leh Saitual District thar lawm tura kalkhawm mipui hnenah lawmna chibai a buk a. India ramin Zalenna a hmuh theihna tura beitu, nunna hlu tak chan ta te, zalenna sualtute inpekna leh tawrhna nasa tak avangin India ram chu khawvela Democracy ram lian ber a lo ni thei ta chu a ropui hle a, ram tana zalenna sualtu zawng zawngte chu Independence Day a lo thlen hian zahna Chibai a buk nawn leh a ni. Saitual District-a hnam puanzar ropui tak Deputy Commissioner, IGP leh Superintendent of Police te uapna hnuaiah pawhpharh a lo ni ta chu lawmawm a ti a; Zoram tan, Ram leh Hnam hmangaihna thinlung nen hmasawnna hna mahni hmazawnah theihtawp chhuah tlang a, ram hmasawnna daltu ni lovin a puitu zawk ni theuh turin Saitual District mipuite chu a sawm a ni. 

Minister chuan sorkar Flagship Programme - Socio-Economic Development Policy (SEDP) a hlawhtlin nan Board hrang hrang 14 din niin chak taka kalpui tum a ni tih sawiin SEDP chuan a tum ber chu ei leh bara intodelh a, chhungtin ten eikhawp thawk chhuak a, ram sum leh pai dinhmun siam tha tura hmalak a pawimawh a ni, a ti. Raw hmun emaw, rubber chinna hmun emaw leilet buh hmun siam a nih dawnin a pawimawh hmasa ber chu Link Road siam a ni, a ti bawk a ni. Khuallian chuan India rama sumdawnna lian berte zinga Mizoram a tel theihna turin Sorkar laipuiin tan nasa takin a la a, chung mi atan chuan Act East Policy lian takin hma a la mek a; Zorinpui Land Custom Station sak zawh a nih hnuin Lawngtlai Trade Felicitation Centre buatsaih a ni a, Bangladesh nena insumdawn tawnna atana pawimawh tak Tlabung Trade Felicitation Centre pawh sak zawh niin, ramria Zorinpui LCS thlunzawm tur Kaladan Multi Modal Transit Transport Project (KMMTTP) chu Mizoram PWD ten an siam mek a, sorkar kum tharah zawh fel hman beisei a ni, a ti a.

Pu R.Lalzirliana chuan Saitual District chhungah hna hrang hrang thawh a ni a, Tuiriza leh Tuiching MHP, 100KW pe chhuak thei turin Tuiriza Lui ah leh Hrianghmun bula Tuiching Lui ah te siam niin, July, 2019 khan hlawhtling taka commission a ni, a ti a. NABARD hnuaiah Cheng Nuai 7430 man, 5MW tlawva SHP leh Cheng Nuai 4960 man, 4MW Kawlbem SHP thawh mek niin, kum in chhunga zawh fel beisei a ni a, SAUBHAGAYA (Pradhan Mantri Sahaj Bijli Hat Ghar Yojana) scheme hnuaiah Saitual leh a chhehvel khua electric la neilo chhungkaw 107 hnenah a thlawnin electric connection pek an ni a, Saitual KV Substation thawmthat hna thawh mek bawk a ni, tiin a sawi.

Pu R.Lalzirliana chuan Saitual District mipui, loneitute dinhmun chawikang a, an economy-in hma a sawnna turin Agriculture Department chuan scheme hrang hrang hmangin hma a la a, chung hmalakna te chu- Agriculture Link Road, Rigid Pavement, Culvert, Water Harvesting Structure, Secondary Storage Structure, Leilet bial awmna siam rem te a ni, tiin a sawi a. Loneitute khawl inhmantawm tur Tractor leh leilehna hmanruate sorkar laipui puihnain Mizoram-ah hmun 130-ah dah tawh a ni a, heng khawl awmna te hi Custom Hiring Centre tia vuah niin, Saitual District thar huam chhungah hian Loneitu Group 12 te hnenah Tractors leh Leilehna hmanrua bakah buhsengkhawl te pek tawh a ni a. Heng bakah hian Centre 2, Tuirizia Farming Society-II, Phullen leh FMC, Mimbung-ah te pawh pek leh tum mek a ni.

Khuallian chuan sorkara rinna leh beiseina nghat ngam chunga hna thawhpui zel turin tlawmngai pawl, Kohhran  leh mipuite a sawm a, Independence Day parade contingent leh zirlaite bakah he Ni lawmnaa tel zawng zawng chungah lawmthu a sawi bawk a ni. Independence Day-ah hian hnam inpumkhatna leh inunauna vawng nung zel turin theihtawp chhuah tlang a, ram Danpuia innghat tlat chunga ram tana chhenfakawm hnutchhiah thei turin Zoram mipuite a sawm a ni. 

Independence Day lawmna hunah hian Pastor V.Lalnienga, UPC (NEI) chuan hunserh hmangin Pathian hnena lawmthu a sawi a. Saitual khaw chhunga Primary School zawng zawng te'n Mass Dumb Bell Drill leh MHIP, Saitual Block te'n Par Lam an entir a, Saitual khaw chhunga YMA Branch 16 te'n Cheraw Bu 18-ah an kan bawk a ni.

Khuallian Pu R.Lalzirliana chuan National Award heng mite hnenah hian a hlan a ni:
1. T.Lalrinawma, W.Khawlek
2. Lalliansanga leh Vanlalduhawma, Phullen
3. Darchungnunga, Khawlian
4. John Neihlaia, IGP

Independence Day puala Faina Kawnga Inelna neihah Ruallung khua pakhatna, Saitual Venglai pahnihna leh Saitual VC-I chu pathumna an ni.

Saitual DC Pu C.Lalpeksanga chuan Contingent Leader-te hnenah lawmman a hlan a, 73rd Independence Day Lawmna programme hi Saitual DC Conference Hall ah DC At Home in a zui nghal a ni.