Vawiin hian ram chhung hmun dangte rualin India ram Zalenna Champha phak vawi 73 na chu Serchhip ah tluang takin hman a ni a. A lawmna pui ber Khawtetlang Playground-a buatsaihah Pu Lalchhandama Ralte, Minister of State, School Education etc chu khuallian a ni.

Serchhipah hian zing ni chhuah rualin sawrkar pisa zawng zawngah leh hmun pawimawh ah te Hnam puanzar zar a ni a. Zing dar 7 ah Hospital te, Home te, Rehabilitation Centre leh Jail ah te Independence Day pual thilpek sem an ni a. A lawmna pui ber chu chawhma dar 11 ah Khawtetlang playground-ah neih zui a ni.

He hunah hian Khuallian chuan India hnam puanzar pawtpharhin Parade Contingent te endikna a nei zuia, Contingent 16 ten hnam puanzar chibai an bukna a chhanglet a, thusawina hun a nei a ni.

Minister chuan, India ramin zalenna a neih theih nana theihtawp lo chhuah tawhtu hruaitu hmasate leh sipaite chibai a buk a. An thawhrah senga vawiina muang taka awm mek ten zahna chibai kan buk a. Zalenna zarah India ram chu hun reilote chhungin khawvela economy lian ber te zinga mi ah a inhlangkai a ni, a ti. Ram zalen leh inrelbawlna tha hnuaiah Mizoram pawhin nasa takin hma a sawn tih sawiin Pu Lalchhandama Ralte chuan, tun hnaia Mizoramin hmasawnna a hmuh te leh Mizoram sawrkar Flagship Programme thar; Socio Economic Development programme thiltum leh hnathawh tur tlangpui te a tarlang a ni. SEDP hmangin hmasawnna huapzo, ei leh bara intodelhna leh khawtlang nun tihhmasawnna hnathawh a nih tur thu a sawi a, chak taka hmalak anih theih nan Board hrang hrang 14 din an nih thu a sawi. Ram inawpna leh inrelbawlna awlsam zawk a awm theih nan District thar pathum; Saitual District, Khawzawl District leh Hnahthial District te siam thar an nih thu a sawi a, fel taka an kal nghal theih nan chak taka hmalak a nih thu a tarlang. Sawrkarin zirna a ngai pawimawh tih sawiin, 2018-19 chhungin H/S Science zirtirtu 66, Mathematic zirtirtu 48, Primary zirtirtu 100 leh Middle zirtirtu 60 lak an nih thu a sawi a. Aided teacher 36 dah ngheh thar niin zirtirtu indaihlohna phuhru tura MR zirtirtu Middle leh Primary atan mi 881 leh Fourth Grade MR 54 lak hna kalpui mek a ni, a ti. Tin, 2018-19 chhung vekin Private school 75 zet Adhoc Lumpsum GIA ah hlan kai an ni a, Mizoral State mila CCE her rem a nih tur thu a sawi bawk. Serchhip district ah pawh School thenkhar thuam thar an nih thute, SSA hmanga naupang 4552 hnena text book pek an nih thute, naupang 3311 te hnena uniform pek an nih thute, naupang 6354 te hnena chhunchaw pek mek an nih thute a tarlang a, Serchhip DIET leh Government Serchhip College te pawh nasa taka thuam that an nih thu a sawi a ni.

Dan leh thupek kenkawhna tihchak zel an nih thusawiin ni 28.5.2019 ah Chhingchhipah Police Outpost thar din anih thu a sawi a. Kum kal mekah case 106 register anih tawh thu leh 25 chu convict an nih tawh thu a sawi. Hriselna lama hmasawnna chu SEDP thiltum pawimawh a nih thu a sawi a, tun hnaiah pawh Serchhip District Hospital chu hmanraw thar engemawzat pek an ni, a ti. Inkalpawhna kawng tha zawk neih te, Power & Electricity hnianghnar zawka neih te, Agriculture & Allied Sector lama hmalakna chi hrang hrangte pawh nasa taka thawh tum anih thute sawiin, tun kum kal mekah Serchhipah MGNREGA atangin ni 49 inhlawhna siam a nih tawh thu a tarlang bawk.

Thu a sawi zawh hian Minister hian Parade Contingent tithate hnenah lawmman a hlan nghal a; School contingent-a lawmman dawngtute chu pakhatna Little Flower Convent School, pahnihna Millenium High School, Chhiahtlang leh pathumna Marian H/S te an ni a, Parade Commander hi SI Hrangchhuana, 3rd bn MAP a ni. A tel zawng zawngte hnenah Khuallian tawiawmtu Pu C. Lalmuanpuia, MLA chuan participation prize a hlan bawk.

Khawtetlang playground a hun hman zawh hian DC Bungalow ah VIP at Home Tea Party, sawm bikte puala neih zui a ni bawk.