Ram chhung hmun dangte rualin India Independence Day, Vawi 73-na chu vawiin khan Mamit GSA Playground-ah hman a ni a. Pu Lalruatkima, Minister, Rural Development, Land Revenue & Settlement, Information & Public Relations chuan khuallian niin hnam puanzar a pawtpharh a. Parade Contingents 16 te hnam puanzar chibai buk a chhanglet.

Khuallian chuan India ramin zalenna a hmuh champha Vawi 73-na lawm tura kalkhawm mipuite chibai a buk a. Zalenna kan hmuh theih nana sulsutu kan pasaltha tam tak nunna chantate, hreawm tak tuara lung in lo tang tawh te kan zaha kan ngaihhlut a pawimawh hle a. Zalenna kan hmuh theihna tur atana kan hnam pasalthate zinga damrei ber Pu Darthawma chuan thla hmasa khan Lunglei-ah min boralsan a. Zalenna sual anih lai khan National Army sipai rinawm tak niin theihtawpa ram tana lo beitu a ni a. Kan zingah awm tawh lo mahse kan thinlungah a hming a dai tawh dawn lo a ni a ti.

Minister chuan kan Sorkar Flagship Program, Socio-Economic Development Program (SEDP) chu theihtawpa hmalak zel a ni a. He Program hian a tum ber chu ei leh bara kan intodelh a, kan khawtlang nun tihhmasawn leh Gross State Domestic Product (GSDP) tihsan a, mipui mimir khawsak chawikan a ni tiin mau chin leh sawngbawl chu SEDP-ah ngaihpawimawh anih dawn bakah Infant Mortality Rate leh Maternal Mortality Ratio tihhniam kawngah nasa taka hmasawnna a thlen a beisei thu a sawi. Mizoram Sorkar chuan a tiam tawh angin zu khapna dan siam niin chak taka hmalak a ni a. Mizote kan hriselna a lo that zawkna atan Sorkar chuan a tul angin hma a la zel dawn a ni a ti. Mizo themthiam tak takte kutchhuak phochhuah nan Information & Public Relations Department chuan Kum 2018-19 chhungin tum hnih New Delhi-ah Art Exhibition a buatsaih a. Mizoram-a a vawikhat nan District hrang hranga Accredited Journalist te tan a thlawna Training turin thla thar September thla hian tirh an ni dawn a, Mizo thil hlui leh kan culture pholanna atan I&PR Directorate bulah Lianchhiari Run sak mek a nih thu a sawi.

Mamit District chhunga Sawrkar hmalakna hrang hrang a tarlan zingah Taxation Department Mamit Zone hmalaknain kum 2018-19 Financial Year chhungin chhiah (tax) chi hrang hrang, Goods & Services Tax, Professional Tax leh Entertainment Tax atangin Rs 134,61,643/- (Nuai za sawmthum pali singruk sangkhat zaruk sawmli leh pathum) hmuhchhuah a ni a. Mamit District-ah Kum 2018-19 chhungin Mulberry Cocoon 4404.47 Kg leh Muga Cocoon 7130 tharchhuah a ni a. Dan leh thupek kenkawhna kawngah hmalak chhoh zel niin Mamit, Zawlnuam, W. Phaileng, Marpara leh Kawrthah-a Staff Quarters hrang hrangte chu Rs 6,35,000/- sengin thawmthat a ni a. Mamit District Police Gymnasium chu a duh apiang hman theih turin siam a ni. Basic Life Support Ambulance, TATA Trust te'n an Donate chu District Hospital, Mamit-a hman turin hlan a ni bawk.

Rural Development Department hnuaiah Mamit District-ah MGNREGA kaltlangin chhungkaw 20737 te tan July 2019 thleng Ni 40 inhlawhna siamsak an ni tawh a. CM Rural Housing Scheme atangin chhungkaw 177 te chenna in sak leh thawmthatsak an ni a. PMAY (Gramin) hnuaiah chhungkaw 243 te In sak mek a ni a. Kum 2019-2020 chhungin chhungkaw 139 te pek belh tumin hmalak mek a ni a bawk. Fisheries Department hnuaiah Blue Revolution Scheme atangin chhungkaw pathum hnenah Dil thar 0.1 Ha a zau siamna tur Rs 56,000/- theuh pek an ni a, Farmers 15 hnenah sangha note khawina tur siam nan Rs 32,400/- theuh pek an ni bawk. Mipuite ei leh barah hnianghnar taka kan awm theih nan Buhfai September 2019 thleng daih tur Centre tinah chhekkhawl a ni a. Ration Card Digitization leh Aadhaar Seeding hna thawh mekah 91%, Ration Card 69% zawh tawh a ni.

Inkalpawhna kawngpui thuamthat kawngah chak taka hmalak niin Mamit khawpui chhung kawng 6.81 Km repair nan Rs nuai 174.87/- hmuh hmangin siam zawh tawh a ni a. Kum 2018 - 19 chhungin Mamit To Bairabi kawng thawmthat nan Rs Nuai 492.54/- hmuh chu kawng Black Topped bakah RCC Slab Culvert leh a dang dang te thawh a ni. National Highway 44A kawlsial hna thawh mek chu Ni 31 December, 2019 ah zawh hman tum a ni. Kawlphetha pekna kawngah P&E Deptt kaltlangin DDUGJY (New) hnuaiah thingtlang khaw 12 kawlphetha la nei lote tan Cheng Nuai 875.59/- senga pek chhuah an ni a. Mamit khawpui chhung kawlphetha tihchangtlunna atan Cheng Nuai 1858.37/- senga kalpui mek a ni a bawk. 132kv Single Circuit pawh hna kalpui mek a ni. Mamit-a Judicial Officer Residential Quarters Grade I, II, III October 2018 atanga sak hna thawh tan chu luah mai theih tura zawh fel a ni tawh bawk a ni. Local Administration Department kaltlangin Mizoram State Finance Commission Grant 2018-19 ah Rs 92,64,800/- dawn hmangin khawpui chhung hmasawnna hna hrang hrang thawh a ni.

Mamit District chu Aspirational District anih angin tehna hrang hrang hmanga enfiah leh buk a ni thin a. April 2018 a naupang kum 6 hnuailam buk zang lutuk(Underweight) ah naupang 792 awm kha June 2019 ah chuan 120 ah a tlahniam tawh a ni. District chhunga chhungkaw 15-te eizawngtu in a boral san avanga, harsa zual puih ngaite hnenah Rs 20,000/- theuh NFBS hnuaiah pek an ni a, Naupangte dikna leh chanvo humhalh turin District Child Protection Unit (DCPU) chu uluk leh chak taka kalpui mek a ni bawk.

Thalai infiammite hmasawnna chu Sawrkar ngaihpawimawh niin kawng hrang hranga hmalak a ni a, Mizoram Sports Policy duang turin chak taka ruahmanna kalpui mek a niin tun Sawrkar kum kal mekah Mizoram State Games neih tum a ni. Kum 2018-19 chhung khan Rs nuai 800/- sengin Sports Infrastructure 75 lai thawmthat a ni. Mamit-ah Multipurpose Indoor Stadium changtlung tak sak a nih dawn thu a sawi bawk.

Minister chuan Parade Contingents zawng zawngte, NGO, Kohhran leh kalkhawm mipuite zawng zawng chungah Sawrkar an thlawpna leh rinna an ngah ngam avangin lawmthu a sawi a. Mizoram hmasawnna atan pheikhai rual taka hmalam pan zel turin a sawm bawk a ni.

Mamit-a Independence Day hmannaah hian Parade Contingents 16 awmin Armed Contingents 1, School Contingents 13 leh Student Police Cadet 2 an awm a. MZP Pipe Band te chuan kalrem Music an lo rem a ni. Parade Commander hi Inspector Lalrintluanga a ni a, 2nd Commander hi SI Vanlalruata a ni bawk. School Contingents 13 zingah hian pakhatna St. Francis of Assisi High School, Girls Contingent niin pahnihna hi Presbyterian English School, Boys Contingent an ni a, pathumna hi JNV School Contingent an ni.

Independence Day pual hian khuallian hian District Hospital Mamit tlawhin harsatna an neihte an lo thlena, Mamit-a Home hrang hrang, Observation Home, Buannel Children's Home, Specialized Adoption Agency, Joshua Children's Home -te tlawhin thilpek a pe a.  Observation Home bikah hian mi paruk an awm mek a ni. Minister hian District Jail tlawhin Rs 10,000/- a hlan bawk a ni. Sawmbikte pualin At Home DC Bungalow-ah buatsaih a ni bawk.

Independence Day Vawi 73-na lawmna pual hian Football, Volleyball leh Badminton Tournament-te buatsaih a ni bawk.